Press "Enter" to skip to content

Khrih Zultu Siruangah Aman Pek Ahau mi “Zultu Si Man” le “Khrih Hnu Zulh Lo Man” Timi Rak rel ve Hmanh..Atha KhoTaktak..

Zultu Sinak i aman pek a haumi “zultu si man” timi kong he pehtlai in thawngtha an chim (ka chim ve tawn) mi le caa in an tial mi tete zong ka rel pah tawn hna i Khrih zultu si hi zeitluk in dah a sunlawih ti le zultu si ruang i kan ton hnga dingmi thluachuah siseh, thihnak zong siseh vun ngaih le van rel cu fimnak zong tampi mi a pe i thazaang zong tampi kai lak. Asinain, Khrih hnuzultu si lo ruangah aman kan pek a hau ve mi kongah Rev. Dr. Billy Graham nih a rak chimmi ka ngaih hnu in Khrih hnuzulhlo hi zeitluk indah a rak poi ti hi ka lung a pem chin2. Cucaah, Billy Graham nih ‘Khrih hnuzulhlo man” (The cost of not following Jesus Christ) timi tlaangtar in thawngtha a chimmi a point (4) te hi hrawmh kan duh ve hna.

Jesuh hnu na zulh lo tikah zeidah a cang?
(1) Pathian he aa remmi na si rih lo caah, na nun ree a thei zungzal lai…….
‘Pathian he remnak ngeih lo’ asiloah Pathian he aa rem mi kan si rih lo ahcun Khamhmi kan si rih lo, Bible nih mitlau a timi kan si rih ti nak a si. Jesuh a hnong mi hna Pathian he ai rem mi zumtu a ho hmanh an um lo. Zeicahtiah, Pathian he ral a rak si mi Pathian he kan i remnak cu a Fapa Jesuh thawngin asi. “Judah mi le Jentail mi kha miphun phunkhat ah a ser hna thawngin Khrih nih kannih cu daihnak a kan pek” Efe. 2: 14. Mirang ahcun Jesuh cu kan remdaihnak a si – “(Jesus) is our peace” tiah a ti. Cucaah Jesuh kan zulhlo ahcun Pathian he remdaihnak kan hmu bal lai lo caah, milung rethei le ruahchannak nung a ngei lomi kan si ko lai.

(2) Lawmhnak taktak na ngei lai lo……
Pathian hlawt hi a nuam ngaimi a lo zeicahtiahcun duhmi paoh zalong tein tuah a ngah tiah kan ruah tawn caah a si – a hlei in sualnak. Asinain, khamhnak a comi hna nih an ngeihmi lawmhnak cu na tepbal lai lo. Zeicahtiah lawmhnak taktak cu Jesuh cohlan i amah hnuzulhnak thawng lawng2 in co mi Pathian laksawng asi. Cucaah Khrih ruangah tlaih le tuk an rak si hmanh ah khan zultu hna cu an rak i lawm kho thiamthiam – “…Jesuh ruangah Pathian nih ningzah in awk nan i tlak tiah a ruah hna caah an i lawm ngaingai” (Lam. 5: 41). Asinain, Jesuh hnu kan zulh lo ahcun mirum tlangval pa bangin ngaihchia ngai in Jesuh hnu a chit tak mi kan si ve thotho ko tinak a si. A phichuak cu, Jesuh zulh lo cun khamhnak a um kho ve lo.

(3) Ruahchannak zong na ngei lai lo……
Hi ka zawn i ruahchannak tiah kan ti mi hi ruahchannak taktak asiloah ruahchannak nung (1 Pet. 1: 3) tiah Bible nih a kawh mi kha kan chim duh mi asi. Jesuh zulh lo zongah hin mirum le thiltikho pawl hna caah cun kum tam pi caa zongah ruahchannak a tha2 ngeih khawh a si ve ko hnga. Asinain, thihnak in an luat hlei lai lo caah thih hnu Pathian mithmai tha hmuh lai cu an i ruahchan ngam ti lo. Nihin niii ah hin kum 20-30 nak tam ca i ruahchannak na ngeih zongah Jesuh na ngeih lo ahcun Bible nih a chimmi ruahchannak bel cu zeitik hmanh ah na ngei lai lo zeicahtiah mah hi a nungmi ruahchannak (van kai nak) cu Jesuh hnuzultu hna lawng nih an ngeih mi a si caah asi.

(4) Nanunnak sullam a ngei lai lo…….
Tinh mi ngeih ciocio hmanhah hin sullam a ngeimi le ngeihlo mi tinhmi (purpose) an um. Jesuh a huatu hna zong hi vawlei ah tinhmi tha2 tampi an ngei ve kho ko. Asinain, an i tinhmi le tuanmi hi Bible mit in cuanh ahcun chikkhat ca lawng an si. Asinain, zumtu cu vawlei cung kan nun hmanh ahhin zungzal a hmun mi thil a tuah mi le tuah ding zongah forh kan si fawn – “Taksa zuamnak in cawlcanghnak zong hi san a tlai ve ko, asinain Pathian tihzahtu sinak i cawlcanghnak nih cun a tu nunchung le hmailei caah biakam a ngeih caah a lamkip in san a tlai” (1 Tim. 4: 8). Cun Paul nih, “a rawk kholo mi luchin hmuh awk ah kan i zuam” (1 Kor. 9: 25b) tiah a chim than. Cucaah Jesuh kan hlawt ahcun vawlei ah hin chikkhat cu aa nuam ngami zong kan lo ko hnga, asinain, hi vawlei i kan tuanmi vialte nih hin a kan khamh kho te lai lo i kan tuanmi vialte hna zong hi an uai dih te lai. Asinain, Jesuh a zulmi hna lawng2 nih an ngeih mi cu sullam a ngeimi nun asiloah zungzal a nguh mi laksawng Jesuh an zulh ruang i an hmuh te dingmi cu asi.
A donghnak ah, Jesuh zulh hi a har kan ti ahcun a hnuzulhlo hi a let in tih arak nun deuh caah, minung nih Jesuh hnuzulh hi a let in kan i thim deuh awk a si. Aluan cia caan ah na zulh rih lo zongah, ni hin nii thok in a hnu zul cang ko. Bawipa Jesuh nih a hnuzulh dingah a velngeihnak in a kan sawm ve-“Ahohmanh nih zulh nan ka duh ahcun, nanmah le nanmah nan i hlaw lai i nan vailamtahnak nan i put i nan ka zulh a herh”. Asiloah, Jesuh hnuzulh hi a hartuk na ti maw? Unau, a dnogh tiangin zul thluahmah rih ko usih tiah thazaang pek kan duh. Vawlei ah hnon mi kan hei si ko hmanhah Pathian nih a cinken mi le laksawng a pek te dgmi hna hi a hnu a zul mi kanmah pei kan si te lai cu.
Note: Dr Billy Graham nih a chimmi kha translate (leh) mi si loin, a chim mi a point tete tu hi tawifiannak in thazaang lak mi chungin ktial mi asi. Bawipa nih thluachuahnak in pe ko hna seh.

Crd. Pastor Ngun Nawl

Be First to Comment

Leave a Reply

Your email address will not be published. Required fields are marked *