Press "Enter" to skip to content

Khrihfami Nih Zaangfah Thahnak Hi Kan Tuah Aw A Si Hnga Maw? (Mercy Killing or Euthanasia) Rel ve hrim hrim

Khrihfami Nih Zaangfah Thahnak Hi Kan Tuah Aw A Si Hnga Maw? (Mercy Killing or Euthanasia)
Khrihfami nih zaangfah thahnak hi kan tuah awk a si maw si lo timi Khrihfa tuanbia thluangthluan ah a dong lomi ceihmainak a si.

Zaangfah thahnak kan timi a can theo tawnnak cu, mi pakhat cu damlonak faktuk a tuar ruang ah a dam lonak kha a hlan sining bantuk in khirh than kawh ding a si tomi dirhmun a phanh tik ah, amah, mizaw, le a chungkhat lungtling tein a temhtuarnak zaangfahnak he mizaw nunnak cu Sibawipa nih a lak hnga.

Silole, ral ram ah ralkap pakhat cu hliamhma a tuar mi a fahtuk caah a dam than ti lo ding dirhmun ah a um tikah a hawi pakhat khat kha a nunnak lak ding in a hal a si lole a hawipa nih a temhtuarnak kha a zaangfah tuk caah meithal in a nunnak a lak timi kha “zaangfahthahnak tiah (mercy killing or euthanasia) tiah ti a si.

Cu lawng si loin, nu nih nau a pawi tikah a pawi nau cu pum tlamtling lo le nunchan ngei lo dirhmun in a si kha a hngalh tikah a chung ummi nunnak zaangfahnak ruang ah a fa cu a hrawh. Cu cu, zaangfah thahnak phun khat a si ve.

Hi zaangfah thahnak hi ram tampi nih acozah phunghram nih cun a pom nain ram cheu khat nih cun a cohlang kho lo. Myanmar ram zongah zaangfah thahnak hi cu phung nih onh hlah seh. Siibawipa rian cu mizaw nih a donghnak thaw a chuah tiang zohkhenh kha a si awk timi a pom ve. US Khrihfa tam deuhnak ram zong State paruk nih cun a pom nain a dang State pawl nih cun an pom ve lo.

Phun dang in chim ahcun, zaangfah thahnak timi cu, mah le mah thah bawmhnak, physician assisted suicide, ti zong in phun dang auh khaw a si. Amah le mah nunnak donghter a duh ko nain zeihmanh a tuah khawh ti lomi kha an nunnak va lak piak ti khi a si ko.

Hi kong hi Laimi Khrihfa zatlangnun ahcun theih tukmi a si lo nain zalonnak nih a kan den deuh tik ah hrial awk tha loin kan ton te dingmi khi a si.

Khrihfasinak in zaangfah thahnak hi kan tuah awk a si maw si lo timi Theologian tampi ruahnak aa kalh len. A pommi an um i a duh lo tu zong an tampi ve. Khrihfa sinak in kan zoh a si ahcun, minung nih kan tuah khawh lomi le kan tlaih khawh lomi hi nunnak lawng lawng a si i Pathian nih hin cu nunnak cu a sermi minung hi tonghter ah rian a kan pe lo tiah ka ruah. cu caah zaangfah thahnak timi Khrihfami nih kan tuah awk a si hrim lo timi hi kei ka pom. Pathian nawlngeihnak le lianngannak kha minung nih kan lonh awk a si lo.
Nunnak lak timi hi cu a tha hrim lo, lungdongh ruangah mah le mah nunnak i lak le zaangfah ruang ah mi pakhat khat nunnak lak timi hi cu Khrihfami nih cun kan hrial awk a si ko .

Crd. Salai Lian Thawng Hnin.

Be First to Comment

Leave a Reply

Your email address will not be published. Required fields are marked *