Kalay Khuachung Kahdohnak Ah SAC Ralkap 7 An Thi , 5 Hliam An Tuar, Kalay khuapi, Taungphilar sang , cozah riantuantu umnak inn ah umhmun khuar mi SAC ralkap hna cu CNDF nih nizaan May 10 zaan Sml8:00 hrawngah kan luhhnawh hna i kan kah hna SAC ralkap 6 an thi. Sanmyo , Moeyit zung zong CNDF, PDF – Kalay, GRF nih zaan Sml 10:00 hrawng ah suimilam cheuchung hrawng kan kah hna i SAC ralkap 1 a thih pin ah 3 hliam an tuar.
Kalay, Tahan Naykyataih pawng security a la mi SAC ralkap hna zong CNDF, PDF – Kalay, CSS, GRF nih rallam 2 i tthen in kan kah hna i SAC ralkap 2 hliam an tuar, Hliamtuar umlo tein hnu kan tolh kho tiah Chin National Organization(CNO) nih nihin May 11 ah cathanh chuah.
Dawai pengkomh, Mata peng Kyaukme Tuang khua, May 10 zaanlei ah SAC ralkap le Mizapi ralkap kar kahdohnak a chuak i khuami pakhat a nunnak liam pin ah Phungki pakhat hliam a tuar tiah Eastern Defense Force nih cathanh a chuah. May 10 zaanlei Sml 3:00 hrawngah Dawai pengkomh, Mata peng Kyaukme Tuang khua pawng ah SAC ralkap pawl cu KNDO ralkap nih kan kah hna i SAC ralkap pakhat a thi i 2 hliam kan tuar ,
Hriamnam cheukhat an lak piak khawh hna tiah Eastern Defense Force EDF nihcun an thanh. Kahdohnak ah SAC ralkap nih Hriamngan, hriamhme hna in minute 20 hrawng kahthlorh in an kah caah Kyaukme khua phungki sianginn campus chung ah hriamngan a tla i phungki pakhat hliam a tuar. Khuami pakhat a nunnak a liam tiah khuami hna le mi bawm chan tu phu hna sin in theih a si.
SAC ralkap security an laknak hmun cu KNDO Special Battalion le ttangtti hna nih kan kah hna i SAC ralkap meithal zuun 1 le kuan bawm 4, kuan 219 hna kan lak khawh tiah Eastern Defense Force EDF sin in theih a si.
SAC ralkap nih nihin May 11 zinglei sang ah Magway ramṭhen, Yezacu peng Yelayhcun(ရေလယ်ကျွန်း) hmun ram ah khua pathum cu an khangh ṭhan, tiah theih a si. SAC ralkap pawl cu nihin May 11 zing lei sang ah Mayzun(မြေစွန်း) khua, Sedihmin(ဆည်သည့်မြင်) khua le Bisatkung(ဘိစပ်ကုန်း) khua hna ah an lut i mei in an khangh caah Tualchung mi a thong in inn le lo an zaam tak, tiah theih a si.
SAC ralkap pawl cu May 10 ah Yelayhcun hmun ram lei ah rallam an rak sial i Phyobu(ဖြုံဘူး၊), Miphaya(မိဖုရား), Bukung(ဘိုကုန်း), Mekung le Bungtawpih(ဘုန်းတော်ပြည့်) khua hna cu mei inn an khangh caah khuami dihlak an zam, tiah tiah a si. “Nihin May 11 hi uico pawl khoika dah an kal te lai tiah khuami nih kan ngiat ko hna. Kan khua lei an rat ahcun ngeihchun mansung thilri hna zampi ding timhcia a hau.
PDF nih bomb an puahhnawh tawn hna caah khoika khua dah an khangh te lai ti cu, aho hmanh nih chim khawh si rih lo,” tiah Yezacu khua ummi pakhat nih a chim. Yelayhcun hmun ram i rallam a sialmi SAC ralkap cu Maytaw palik sakhan ah zu an ding. Nihin May 11 sml 8:20 hrawng ah Setimyint(ဆည်သည်မြင့် ) phungki sianginn chung um thilri zong an hrawh, tiah theih a si.
Be First to Comment