Press "Enter" to skip to content

KNU/KNLA nih kahdohnak voi 5 chung ah Kawl ralkap 4 an thah hna

KNU/KNLA nih kahdohnak voi 5 chung ah Kawl ralkap 4 an thah hna
=============================
KNU Brigade No.5 hmunhma, ni 3 chung ah kahdohnak voi 5 a chuak i Kawl ralkap 4 an thi, tiah theih a si. The Hakha Times

Thawngpang dang dang : thawngpang dang : Oct 28, Thawngpang Biapi Deuh Hna Hi Van Cuanh Hna Usih

Mandalay Ramthen NLD Party Zung Bomb Puah: Mandalay khuapi, Chan Aye Thar(ချမ်းအေးသာ) peng , Lam 33 le 34 lam kar , 62 lam cung ah ummi National League for Democracy (NLD) Zung cu October 28, tuni zing Sml 1:00 Am hrawng ah bomb an puah tiah theih a si.

Aung May Thar ( အောင်မြေသာ) peng in NLD party pakhat nih “Ralhrang nih kharmi zung hna cu zantim ah bomb in an puah hna, cun a puahnak hna hi zaan ah lengchuah lo dingin nawl an chuah lioah a puah a si caah ho nih dah a puah ti cu a fiang tuk ko ” tiah a chim.

Ramthen NLD zung puahkeh nak a can hi Madalay pengkomh chung zaan Sml 10:00 Pm in Sml 4:00Am kar lengchuah lo ding in nawl an chuah chung a si i Mandalay ramthen zunginn cu Dot 5 a si i Dot 3 nak le Dot 4 nak ah puahkehnak a chuah hi a si.

NLD Party ramthen Zung bomb puah ruangah a rawkmi le a hliammi fiang tein kan thei kho rih lo i nawlngeihnak lak hnu Mandalay khuapi chungah a dang NLD party zung hna zong bomb puah mi an um len .

Mandalay khuapi ah October 27 ni zaan zongah hmun kip in a tlawmbik voi 8 hrawng puahkeh nak a um i Hluatthaw chung umhmun khuar mi ralhrang hna i an gate zong kah a tong tiah The Irrawaddy nih a tial.

PRDF Nih Ralhrang Mawtaw Bomb An Puah, Ralhrang 3 Nak Tlawmlo An Thi I 20 Leng Hliam An Tuar: Palaw ( ပုလော) peng mizapi vengtu ralkap PRDF he aa fonh mi phu hna nih ralhrang mawtaw hna cu bomb in an puah i ralhrang 3 leng nak tlawmp an thi i 20 leng hliam an tuar tiah PRDF nih tuni October 28 ah a thanh.

October 26 zinglei Sml 5:30 hrawngah Zayat Sik ( ဇရပ် ဆိပ်)khua pawng ah PRDF he aa fonhmi mipi vengtu ralkap nih mawtaw 15 he a ra mi ralhrang phu hna cu bomb puah in an doh hna.

Mah kahdohnak ah ralhrang mawthaw 3 a rawk i minung 3 an thi, cun 20 leng hliam an tuar. Bomb puah hnuah ralhrang nih ruahdamh in an kah caah sualnak ngei lo khuami pahnih hliam an tuar tiah Than Lwin Khet News nih a tial.

Kyaukhtu Peng I KNLA he Kahdohnak Ah Ralhrang 8 An Thi, 5 Hliam An Tuar: Oct 27, nizan zinglei ah Mon ramkulh, Kyaukhtu (ကျိုက်ထို) peng Mupawng khua pawngah hmunhla la in a cawlcangmi ralhrang hna le Kayin ralkap KNLA brigade 1, battalion 3, tat-khuai 1 kahdohnak a chuak i ralhrang 8 an thi, 5 nih hliamhma an tuar tiah KNU brigade 1 nih thanhnak an tuah.

Cu ralhrang na cu Kyaukhtu (ကျိုက်ထို) hrambunh khah-lah-yah (ခလရ) 96 an si tiah KNLA brigade 1 in nawlngeihtu pakhat nih a chim.

Cun Kyaukhtu (ကျိုက်ထို) peng Theinzayat khua zongah October 27 ni ah hmunhma zohfel in bomb thianhlimhnak a tuahtu ralhrang phu hmaikal 4 cu an hmuhmi bomb hrawhnak an tuahmi bomb nih a puah hnawh hna caah an pali in an thi tiah Salween Press nih a tial.

Shan ramkulh ah hriamnam a phormi ralhrang mawtaw cu MNDAA nih an kah, mawtaw pahnih a rawk i a thimi zong an um: Shan ram thlanglei Kokang Lungkham, Hayshan(ဟေးရှန်း) le Mukung Phawngsai hmunhma lei ralhrang hna caah hriamnam a phurmi mawtaw cu 48 hna cu Lashio in Theinni(သိန္နီ) leiah a kalmi hna cu MNDAA nih lampi ah an kah hna caah ralhrang mawtaw 2 a rawk, ralhrang cheukhat an thi tiah The Kokang thawngthanhnak nih a langhter.

An i kah chung hi Minutes 20 leng a rau. Kokang hriamtlai MNDAA lei a thimi le hliamtuamir an um lo. Ralhrang hna nih an mawtaw cu a rannak in an mawngh i an zaam dih tiah theih a si.

October 26, chunhnu suimilam 1:00 hrawngah ralhrang phu tat-mah 99 kuttang um battalion 417 in minung tahzaang 40 leng cu Manpha(မန်းဖာ့) in Talungkanphinzi(သာလုံကန်ဖင်ဇီ) ah an phan i MNDAA her kahdohnak a chuak, cu kahdohnak kong he pehtlai in kaphnih a thimi le hliamtuar kong ah tlamtling in langhter nak a um rih lo tiah Khit Thit Media nih a tial.

Meiktila(မိတ္ထီလာ) ah dothlennak tuahtu PDF mino pakhat cu a nu le pa nih fa sinak in an hlawt: Mandalay ramthen, Meiktila(မိတ္ထီလာ) in Spring Revolution (khuapau dothlennak) tuahtu PDF chungtel Mg Tan Soe Hlaing cu a nu le pa nih fa sinak in kan hlawt cang tiah nihin October 28 ah an phuan.

Tan Soe Hlaing he aa naihniammi a hawi pakhat nih “A lungthin le a ruahnak cu dothlennak tuah dingah biakhiahnak thatuk in a ngei, a chungkhar cu a dawt tuk ve ko hna, asinain dothlennak caah kar a hlang cang” tiah a chim.

Tan Soe Hlaing nu le pa nih “Kan fapa Mg Tan Soe Hlaing cu nu le pa cawnpiaknak tang ah um duh lo in, voitampi lungrethei in a kan chiah, amah ruahnak le thinlung tein chungkhar in a chuah caah nihin thok in a thih hlanlo tiang fa sinak in kan hlawt, amah he aa pehtlaimi thil kong ah zeihmanh tuanvo kan la lai lo” tiah ralhrang phu kuttang thawngzamhnak ah an langhter.

Yangon, Mandalay le hmundang dangah ralhrang kahdohnak ah aa telcang. Tutan dothlennak ah aa telmi mino hna lakah nu le pa nih fa sinak in hlawtmi an um pah ngai tiah Mizzima nih a tial.

PDF bawmhnak peklo dingin mirum hna le bawmchantu hna cu palik bawingan (ရဲချုပ်) Tan Hlaing nih a thihphaih hna: Sagaing ramthen ah nunnak thap in mipi kilven rian a tuanmi PDF hna cu bawmhnak pek lo ding tiah bussiness lei rianngeitu mirum hna le bawmchantu hna cu ralhrang bawi Tan Hlaing nih tuni ah a auh hna i, PDF sinah bawmhnak peklo ding in a tlerhkhonh hna tiah khuami hna nih an chim.

Sagaing ah ralhrang phu hruaitu dirhmun in a phanmi palik uktu(ရဲချုပ်) Tan Hlaing nih nihin October 28, Monyua collective office ah tuahmi bussiness kong he pehtlai in dirhmi phu hna le khuachung bawmchantu phu hna cu auhin a tuabantuk in tlerhkhonhnak a tuah hna hi a si tiah khuami nih an chim.

Palik uktu Tan Hlaing nih Sagaing ramthen chung ah PDF sin bawmhnak peklo ding in hotel and tour operator hna le bawmchantu phu hna cu auh in tonnak ah a tubantuk in tlerhkhonh nak a tuahhna tiah Khit Thit Media nih a laughter.

Buhtalin (ဘုတလင်) lei ah a kalmi ralhrang mawtaw cu bomb in doh an tong, ralhrang 5 an thi, hliamhma tuar an tam: Nitlaklei regional military headquarters(နမခ) in Buhtalin (ဘုတလင်)peng ah a kalmi ralhrang mawtaw cu mipi vengtu ralkap nih nihin October 28 ni ah bomb in an doh hna i ralhrang phu minung 5 an thi, minung tampi nih hliamhma an tuar tiah mipi vengtu ralkap pakhat nih a chim.

“Nah-mah-khah (နမခ) in Buhtalin (ဘုတလင်) lei ah a kalmi ralhrang thazaang 30 hrawng a phurmi mawtaw pakhat cu bomb in puahhnawh an tong ralhrang phu lei a thi le hliamtuar an tam, atu tiang ah ralhrang a thimi 5 lawng kan theihfian khawh rih” tiah PDF chungtel pakhat nih cun a chim.

Ralhrang 20 hrawng cu Nah-mah-khah (နမခ) lei kalnak lamthluan ah meithal le bomb puah pah in an hawile bawmh dingah an ra tiah theih a si nain cu hna zong cu lampi ah PDF nih voithum bomb an puahhnawh hna.

Nihin chunhnu tiangah ralhrang hna nih Buhtalin-Monyua mawtaw lampi cu an phih i zeibantuk mawtaw hmanh umkalnak nawl an pe lo tiah Than Lwin Khet nih a tial.

Nawlngeihnak Lak Hnu Ni 269 Chungah Thah A Tong Mi 1218 An Si Cang: AAPP nih October 27 ni tiang cazin a lakmi a thanh ningah ralhrang nih hramhram in uk nak laak hnu ni 269 chungah an thahmi 1218 an si cang tiah theih a si. Tlaih a tongmi 9281 an si i tu tiang thong chung a um rihmi hi 7190 an si. An tlaih i an thlah than mi minung 1954 an si.

Kalaymyo Chin Social Association i Oxygen seh cu tlamtling in bunh a si cang, Litre 40 tlum dur pakhat cu MMK 5000 in zuar a si lai: Kalaymyo Chin Social Association i Oxygen seh cu tlamtling in bunh a si cang i Litre 40 tlum dur pakhat cu MMK 5000 in zuar a si lai tiah theih a si. Nikhat suimilam 24 chung seh on a si ahcun litre 40 dur, lung 120 leng oxygen a chuahkho mi seh a si.

Kalaymyo Chin social association (ဗဟို) sin ah oxygen le oxygen rawnnak dur hlan a si ah cun oxygen litre 40 tlum durkhat cu MMK 6000 in hlanh a si lai. Cu oxygen chuahternak seh cu ramchung ramleng um zawnruattu hna bawmhnak tangka in cawkmi a si.Cu seh cu TTC Bible sianginn haukulh chungah chiah a si.

Atu ah Chin ramkulh chung Falam le Hakha ah Covid zawtnak cu a karh ngaingai. A tulio Hakha khuachungah Covid zawtnak in nifatin ti awk in nunnak a liam mi an um tiah Zalen nih a tial.Credit :The Chin Post

Be First to Comment

Leave a Reply

Your email address will not be published.