Press "Enter" to skip to content

LBC Khrihfa Bu An Lung A Rawk Tuk Zeitin Dah Thla Kan Cam Awk A Si Cang

Zeitin dah thla kan cam awk a si cang? Atutan ram buainak kongah Kawlram Khrihfa zate nih hehtiah thlacam cio a si. Zeitin dah kan cam timi hi fiang tein ka thei ve lo. Asinan a tlangpi in kan thlacammi ah a tel ttheu lai tiah ka ruahmi cu CRPH le Dr. Sasa an hlawhtlingnak ding, Suh Kyi le U Win Myint te pawl an luat zaunak ding, Myint Aung Hlaing a lung a thlen I uknak a ap than ding, federal democracy kan ngah khawhnak ding, kum 2008 phunghrampi remh khawhnak ding, dinnak le daihnak le remnak a um zau nak ding, UN le US nih an kan bawmhnak ding tipawl hi an si lai ka zumh. A dang zong a um len rih ko lai. Mahhlan vialte kum 60 deng zong hehtiah thla cu kan rak cam len cang ko nan zei ngai thlengnak a um lo.Pathian nih a caan a za rih lo a ti zong si men ko lai. Siloah kan thlacam ning a lung a tling deuh lo ruang zongah a si men ko lai. A phunphun a um ko lai. Keicu mah ti hin thla kan cam cang awk a si ka ti.

Myint Aung Hlaing le ralkap pawl le palik pawl an lung an I thlengnak ding nak in MAH le ralbawi pawl le palik pawl karlak ah buainak le I rem lonak a umnak hnga ding le MAH le ralbawi pawl fak piin Pathian nih dan a tatnak hna ding in kan cam awk a si cang ka ti. Anmah le anmah karlak ah rem lonak le lung I hmuh thiam lonak te hna a umnak ding in le kan cungah an tuah bantuk tein Pathian nih an cungah teirul a kan champiak nak hnga ding in kan cam awk a si ka ti.Phundang in kan chim ahcun Pathian nih tthat lo nak lei tuin fak piin teirul a kan champiak nak hnga ding in kan cam awk a si ka ti. Thiang Thlarau nih an thinlung chungah rian a ttuan I pakhat le pakhat hruaitu karlak ah fak piin I huatnak le I rem lonak le I tthennak le I huatnak a umter nak hnga kan hal awk a si ka ti. Myint Aung Hlaing le ralbawi pawl cungah anmah a congtu hna nih pakhat khat an tuahnak hnga zong kan cam awk a si ka ti. Mah bantuk thlacam phun hi Bible chung zongah tampi kan hmuh khawh ko. A bik in David siangpahrang nih Salm cauk chungah thla a cammi khi zohchunh awk ah a tthabik lai tiah ka ruah. Nan theih cio bang David cu a ral nih thah ding in hehtiah an dawi an dum len.

David zongnih a Pathian sinah voi tamtuk thla a cam I a ral hna cu Pathian nih fak piin dan a tat hna I teirul a champiak nak lai a hal. David nih a ral pawl cungah Pathian nih tuah seh ti a duh I a halmi khi ttih a nung tuk. Biafak pipi le bia ttha lo pipi zong a hman len hna. Zaangfahnak um loin Pathian nih a ral cungah teirul a champiak nak lai le thih lohnak le harnak a phunphun a tlungternak ding zong in thla a cam. Mah a thlacam cu Pathian nih a leh ve I Saul le a fale cu zohchia ngai in an thi I amah fapa Absalom zong a ralkap pawl nih an thah. A siang lo tukmi a fapa tiang thihnak a tuar ve ko, a fapa kha a ral a si ve caah.David nih Pathian a hal bantuk tein Pathian nih David a ral pawl cungah teirul chamnak fak piin a tuah ve ko. Amah Pathian hrimhrim nih pei a ti ko cu na ral caah thla va cam law teirul cham cu keimah rian a si a ti ko cu. Kan ral caah tthatnak lei in kan cam caan zong cu a um ko lai nan atu cu tthat lonak lei in kan cam awk a si cang ka ti. Salm cauk khi va rel tthan u law David nih a ral pawl cungah Pathian nih tuah seh ti a duhmi a thlacamnak tampi nan hmuh ko lai.

David bantuk in thlacam ve hna u sih law MAH le ralbawi le palik le Tuluk le Russia cung zongah Pathian nih dantatnak fakpi le teirul chamnak a kan tuahpiak ve hrim2 lai ka zumh. Keimah nunnak zongah voi tampi cu David bantuk in thla ka cam caan a tampi ve. Ka nunnak ah hnahnawhnak, harnak, buainak, tthat lonak, zertiang in thil ttha lo a tuahmi pawl cungah Pathian nih fak piin dan a tat hna I teirul a ka champiak nak lai hehtiah Pathian sinah thla ka cam ve. Ka cam bantuk tein voi tampi cu Pathian nih ka cungah thil ttha lo a tuahmi pawl cu dan a tat hna I teirul a cham ve ko hna. Mah kong hi tampi chim awk ka nei ve ko. Ka cungah tthat lonak a tuahmi le ka ral pawl cungah Pathian nih dantatnak fakpi a tuah ve ko.Mandalay I B.Th ka rak kai lio kum 2000-2004 ah LBC Khrihfa bu nih biakinn saknak ah tiah phaisa hehtiah an I khong I mah an phaisa cu bank pakhat ah an chiah. A bank min le a neitu min cu ka chim lai lo. Mah an phaisa cu bank a neitu pa nih a hlohthlau piak viar hna. A vaivuanh piak viar hna I a pe duh ti hna lo.

LBC Khrihfa bu an lung a rawk tuk. Voikhat pumhnak ah Rev. Hrang Hmung nih thla a cammi cu uar a um ngai I David thlacam bantuk a si ve. A cammi cu Pathian, Nebuchadnezzar siangpahrang zong kum 7 chung ram a ei tertu cu nangmah na si. Kan phaisa a kan vaivuanhpiak tupa zong hi Nebuchadnezzar bantuk in van hrem ve ko a ti. Mah bank a neitu pa kong cu kum 2009 hrawngah a thawngpang ka theihmi cu a sipuazi vialte a sung dih I umnak inn hmanh a nei lo ti si. A bank zong cu ralkap nih an chuh ti si. Curuang ah atu cu MAH le Tuluk le Russia an thinlung an I thlennak ding cun thlacam ti ding a si lo. Pathian nih Nebuchadnezzar siangpahrang le Faro siangpahrang le a ralkap pawl cungah a tuah bantuk tein MAH, ralbawi pawl, palik, Tuluk le Russia pawl nih thil ttha lo an tuah bantuk tein Pathian nih an cungah a let tampi in teirul a kan champiak nak dingah thla kan cam awk a si cang ka ti. David nih a ral caah bia fakpi hmang in thla a cam bantuk in cam ve cang hna u sih tiah kan sawm hna. Credit: Saya Van Tum.

Be First to Comment

Leave a Reply

Your email address will not be published.