Lumin Cu CDM A Tanh Ruangah Ralkap Nih An Tuah To Ning Cu A Fak Ko A Sining A Dik Cang Ti Loh

Kawlram Minta Minthang Actor Lu Min Thawng-inn ah a ngandam lo ning a zual, a dirhmun a ttha ti lo tiah an langhter. Ngaihchia bak khi a si. Kawlram mipi nih uar bak mi Minta Actor Lu Min cu Ralkap nih Nawlngeihnak an lak bak khan Ralkap uk duh lo nak a langhtertu ah hmasa bik zong a si, an hruaitu zong a si. A thazaang le a ngeih chiah bak in aa pumpe mi a si. CDM cawlcanghnak zong biatak ten tha a pe mi a si i, an umnak Inn tiang hmanh CDM cawlcanghnak caah a zuartu a si. Ralkap uk duh lo langhternak zongah minthang dirhmun in a lang bik hruaitu pakhat a si.

Cucaahcun Actor Lu Min cu Ralkap nih a inn ah an kalhnawh i, an tlaih mi a si. An tlaih hnu thawk in caansau nawn a thawngpaang theih a si lo. Nain, nihin ahcun Actor Lu Min cu Thawng-inn chungah a ngandam lo nak a zualhma ngai, a dirhmun a ttha lo tiah an langhter hi a si i, lung a ttha lo taktak. A caah fakpi thlacampiak cio usih tiah an langhter.

Actor Lu Min cu a thawngpaang cu nihin ah mahtihin an langhter i, thinlung a ttha lo, zaangfak ngaingai a si. “Actor Lu Min cu Thawng-inn chungah a ngandam lo ning a zual, a dirhmun a ttha ti lo. Ei din awk ti rawl zong tthaten an pe ti lo. An vuaknak hliamhma tampi zong a um chih rih. Thawng-inn chung mei van lo nak, mui lakpi ah an chiah. Mei ceu fukfak te lawng an vanpiak. Ti zong aa kholh kho ti lo. Thil hruk aih zong ai thlengti lo. A tu hi thurnawn ngai le hartuk in a um. A caah thla cam piak cio hna usih tiah” an langhter hi a si.