Press "Enter" to skip to content

Malaysia Ram Ah Ruahsur Tuk Caah Umnak A Chuah Takmi Minung 21,000 Hrawng An Phan Cang

Malaysia ram ah ruah a sur tuk caah khua lak ah ti a lian i, minung 21,000 hrawng cu an umnak in thial an si cang, tiah state news agency, Bernama nih cun a chim. Ram chung vialte ah Perak state cu tilian a tuar bikmi state an si i,

Perak leng ah hin Malaysia hmun dang state paruk zong ah ti hi a lian, tiah theih a si. Malaysia Prime Minister Ismail Sabri Yaakob nih cun kan hnu zarh zarhte ni ah khan tilian a tuar mi 15,000 hna cu hmun him ah thial an si cang kong le relief camp 100 leng sak cuahmah a si kong a chim.

Kan hnu zarhte ni ruahsur kha thlakhat chung i ruahsur dihlak zat bak in ruah ti a tam kong an chim fawn. Tilian ruangah hin khua lak le motor lampi hna ah motor zeimawzat an taang hna i, hi hna pawl bawmhnak hi tuah cuahmah lio a si kong Prime Minister nih cun a chim rih.

Tilian tuar mi hna bawmchanh rian hi Palik, ralkap le fire department minung 66,000 hna nih an tuah cuahmah lio, tiah theih a si. Prime Minister Ismail nih cun tilian ruangah hartong mi, an inn le lo a rawk mi hna cu cozah nih bawmhnak a pek te hna lai kong le cozah thilri a rawk mi vialte sersiamnak ding ah $ 100 million a chiah kong a chim fawn. Crd; The Chin Post

Be First to Comment

Leave a Reply

Your email address will not be published.