Mara Chin Miphun Nih Anmah Lawng In Anram An Veng Bal Maw?

Mara Chin Miphun Nih Anmah Lawng In Anram An Veng Bal Maw? MDF Maraland Defense Force nih Ralhrang Rallokap le MAH doh a herh lo, Mara ram tu kan veng lai le kan khumzual lai timi Social Media ah a rak kai. Mara Army le CDF – Mara Fonh in MDF pakhat ah an dirh in CHIN mi vialte kan I lawmh dih. Kan I lawmhnak a ziam hlan le kan thangṭhat hna can rau te ah MAH doh lo ding in MDF Ralbawizik nih an Policy a chimh tikah, khuaruahhar cio asi.

CHIN mi le CDF lawng nih Ralhrang Rallokap ral in I veng hi a har tuk lai, Kawlte le Tlangcung miphun dang he ṭanrual ṭi lo ahcun, kan ti lio ah, Mara Miphun Ralkapbu Lianngan bik le cungnungbik asimi, MDF lawng nih Mara kan veng lai I kan khumzual lai ti hi asi khawh hnga maw. Theory in a ṭha tuk nain, practical ah asi khawh lai maw tihi Mara miphun vialte nih tuak cio a herh. MAH kan thluk khawh rih lo mi cu Kaya, Chinram, Chinram he ramri asimi kawlte umnak cheukhat, Kachin, Karen hmun cheukhat lawng ah biatak tein, lungthin tak in ral kan doh caah asi.

Salai Thet Ni Biachim A Tang Video Hin Zohhmanh>>>><<<<

Kawlrawn hmun tamdeuh le Tlangcung hmun tampi ah biatak tein ral an doh rih lo caah asi. Dr. Sa Sa (Mara) hruaimi NUG kuttang PDF 100000 leng nih Federal Army in MAH thluk awk ah kan I timh. Cu lio ah Dr Sa Sa Miphun Mara nih nan phete. Dr. Sa Sa Ke phelh nan I timh. Minung phung le asi ko ahcun MDF hi hmainawrh hmasat ding nan si. PDF Bantukin Hriamtling le thlahlawh pek asilomi CDF hmanh nih Nunnak le thisen relcawk lo pek in MAH kan doh lio ah, Dr. Sa Sa phun hawi Mara nih hi tluk lawmmam in nan um hi cu lungfak bak ko.

EAOs vialte, CDF / PDF / LDF vialte nih voikhat in tempo ruang tein, hmunkip ah kan doh khawh rih lo caah MAH kan thluk rih lo hi asi. Cutin dohkhawh lo ding in MAH nih aazuam. A ṭih fawn. EAOs he PEACE ka tuah lai ati. Phu khat adoh hna lio ah phukhat cu a remh chung hna, atongh hna lo. Bukhat tein, hmakhat te ah dohṭi can nih MAH a thluk cikcek te lai. Culio ah amah lawng in a tang mi MDF hi MAH nih anamh lai lo tiah nan chimh ngam maw. MAH minung nan si belte ah an doh hna lai lo. BGF ah an chiah hna lai i, CDF le CNA an doh ter hna lai, ZRA Bantukin. Cucu Dr. Sa Sa Miphun Mara upa nih nan cohlan I nan hnatlakpi ko maw?

Dr. Lian Hmung Sakhong nih Tuanbia tazakhan ati mi nan hluan ve lai dakaw. MAH he hnatlak Senthuhnak nan ngeih ahcun doh loin um uhlaw, Ralhrang Rallokap adohtu ding le ZaUk pennak telin, Mara Autonomous District aduh ngaingai mi nan si ah cun, CDF he I fonh law law cang uh. Nan kik ah kik uhlaw, nan lum ah lum law law uh. Kik lo lumlo ti nansi ahcun CHIN MI vialte nih kan in chak cang hna lai.

MDF nih Mara ram kan veng lai nan ti caah, Mara nih nanmah lawng bakin Mara ram le Mara miphun nan veng khawh bal maw? Nan khumzual khawh bal maw timi tuanbia zoh ta a hau ko. Mara nih mah tein ram le miphun kan veng khawh lo, kan khumzual khawh lo caah hauhruang caah tiah, kan lak mi Bawiphun hna cu, Chin – LAIMI Bawiphun an si. Cinzah, Hlawnching, Khenmual (Zokhua bawi), Zathang an si.

Ahnu ah Lautu Chin Bawi Fachhai phun zong Mara ram ah khuasa in Mara ram khumzual tu le vengtu ah an um ve. Lautu Bawi Zakhen Fapa Nam Hlun cu Mara ram Capi khua atla I Mara bawi ah aacang ve. Fachhai bawiphun ti an si. LAI mi asi mi Cinzah, Hlawnching, Zathang, Khenmual chung hna nih Mara ram cu an khumzual, an veng, an nunnak an pek caah tu dirhhmun hi Mara nih kan phan ti zong philh ding asi lai lo. Lai Chin kut le Lautu Chin kut in Minung ah aachuah mi le Minung asimi Mara ti khawh asi.

Tu hnu cio ah LAI le Lautu huat hi a um lai lo nain, aum sual ahcun thlau uh law a ṭha lai. Pathian Thluachuah tampi a comi Mara kan si ruang ah Lai Chin le Lautu Chin kan herh tilo timi Theory le Philosophy nan ngeih sual nak hnga lo a biapi ngaingai. Cu bantuk Political Ideology le Political Science cu Chin Mi kan virus tumbik asi. Chinram le miphun damlonak a chuak pi tu asi lai.

Sa le ral chan, mah le mah kan I tukdoh lio chan ah Mara miphun hmun zungzalseh tiah Lai Chin Bawiphun han Mara Bawi ah kanput hna cu asi ko lo maw? Cuhmanh ah Mara hlohral tu Ral Lian cu tampi ngeih thotho asi. Mara kan Unau a doh I cihmih aduh mi paoh cu pawngkam u, Kan Unau, kan miphun hawi rual Chin Miphun hna le Lai Chin miphun nih kan thah dih tawn hna kha nan philh cang maw? Cucaah Kan Ni le tampi cu nan ṭhit hna I PU Tu kan si dih asi ko lo maw? Zeitik ahdah Mara lawng te in ral nan doh bal.

Raldoh ṭi phun hawi sinak langhter nak caah kan in pek mi Kan Ni le cheukhat zong anungdam rih mi an tampi rih dakaw. An tufa zong tampi an um rih ko lai cu ta. Chim duh mi cu, Miphun ahlohral I a cihmih khawh tu ral poah cu Mara lawng nih kan doh ballo. Nan Unau CHIN miphun nih kan in doh pi hna, kan dawi dih hna, an cihmih asi mi zong an um ko, chimh ngam asi lo caah asi. Vawleicung Ralhrang minthang bik pakhat asi ve mi MAH le Kawlte Ralhrang Rallokap cu Nan Unau Chin Miphun Ralkapbu CDF / CNA he doh ṭi loin, mah tein kan doh lai nan ti mi hi, Mara tlaupi cikcek nak lam nan zawh sual lai dakaw. Zeitindah MAH cu Mara lawng in nan dirhonh khawh lai.

Jacob (Israel) le Esau (Palestine) hi Unau bak ansi. Faphir an si. Esau hrinsor cu Philistine asiloah Palestine ti asi. Israel ral viate kha an doh pi ballo, Ceih uh, Israel miphun cihmih siseh tiah thla an cam. An Unau ral an doh lio ah, annih ral he an I remh I Isreal tu an doh lehlam hna. Nihin tiang Isreal phun caah ral nganbik ansi lan. Palestine ram si awk ah Pathian nih a sian lo caah, Palestine ram ah um buin, Israel mi nih an uk hna. Hna ngeih mi nih theih uhlaw, mit a ngeih mi nih hmuh cang ko uh.

MDF le Mara Miphun nih Ralhrang MAH te Ral cu, nan doh duh ve lo ahcun, Jacob le Esau, Israel le Palestine kan hluan lai lo kan ti khawh cio lai lo. Cucaah, MDF le Mara upa & Hruaitu hna nih, policy le mumal kan thlen piak hram uh law tiah kan nawl ko hna. Nan Unau Chin miphun he hmunkhat, thinkhat, awkhat, Chunmang khat, tbk in Mumal le dundan kan thlen piak uhlaw, nan lam tlaunak in arannak in rak kirh awk ah, kan sawm hna.

Chinram ah ZRA (2-3) um rai asilo. Pathian nih Esau cu ka huat I Jacob cu ka dawt ati mi bia kha. Na Aw cu Jacob aw asi nain, na taksa le na rim cu Esau na si ti kan si ve khawh nak hnga Mara Upa hruaitu hna nih khua fakpi in kan ruat piak uhlaw, CDF / CNA he pum le thlarau banging ṭhen khawh ti loding in CHIN mi nan unau sin ah rak kir cang uh tiah sawm buin ka bia ka dongh ter. Crd; Zingtincuai Cinzah