Dr. Ngun Cung Lian nih hin Dr. Sasa hi a doh, zei ah ai rel ter lo ngai in hmuh khawh a si. Anmah pahnih hi Chinmi ahcun pa za veve bak an si. Mara miphun veve an si fawn. Mara miphun le Chin miphun nihcun fimthiamnak lei ah kan pa le an si kan ti khawh hna. Dr. Sasa cu NLD party a si. NLD nih teinak an hmuh khawhnak hnga ding caah kum 2020 thimnak lai ah khan biatak tein tlang a rak au.
Chin ramkulh NLD nih teinak an hmuh khawhnak ding ah a biapi ngai in a rak cawlcang mi a si. Kha lio ah khan NLD nih teinak an hmuh ahcun Dr. Sasa cu union vuanci pakhat khat a rak si te lai tiah rak ruah cio a si. NLD nih teinak an hmuh i Dr. Sasa cu Suu Kyi sinah a kal. Suu Kyi nih union vuanci pakhat khat ahcun rak thim dawh a rak si ko.
Cu lio ahcun Dr. Ngun Cung Lian cu Dr. Sasa kong an chimmi ah a nih a rak chuak. Dr. Sasa hna Vice President a si lai nan ti. Union vuanci pakhat khat a si nan timi cu nihchuak ngai a si tiah a rak chim bal. NLD party nih CRPH an hun dirh. NUG an hun dirh i Dr. Sasa cu union vuanci ah an hun thim taktak. Biatak tein ralhrang dohnak ah ramdang he pehtlaihnak ah a cawlcang bikmi pakhat a hung si.
Dr. Ngun Cung Lian nih a miphun hawi bak a simi Dr. Sasa kha NUG cozah union vuanci tiang a tuan a thei ko nain Min Aung Hlaing lei ah a tang i ralhrang ruahnak petu lei ah a lut diam. Phun dang in kan chim ahcun Dr. Sasa le Dr. Ngun Cung Lian cu fak ngai in an i doh tinak kha a si ko. Mipi lei ah Dr. Sasa a dir i ralhrang lei ah Dr. Ngun Cung Lian a dir. Mahhi zawn ahhin kan unau Mara hna an vanchiatnak cu a si. An mifim veve pahnih an i doh. Credit; HC Cungte
Relchap>>>>><<<<<<< Ka Nu a sunlawi khunnak. NU le sunlawih ni sunglawi ah hringtu nu le hna cu sunlawih an si. Hi NU le sunlawihnak Ni hi zeitindah a rak i thawk ti cu chim hau ah ka ruat lo, kan theih dih mi khi a si ko. Chim ka duh deuh mi cu Nu le sunlawinak le nan sinak a sang tuk mi van chim ve hi a si. Hi kong hi tampi nan theih cangmi a si ko lai cu bu te cun rak rel ve ding ah kan sawm.
Vawlei cung ah kan rak chuah ve hi Pathian min thangtthat si ko seh. Kei hi ka nu thawngin vawlei ahhin ka rak chuak tiah ka chim khawh ve. Zeicahtiah Pathian nih vawlei ah ka rak chuah nakhnga ka nu le pa a rak hman hna. Cucaah ka Nu le pa ttihzah loin a um ngan ding hi ka si hrimhrim lo ee. Sihmanhsehlaw ka rak theithiam kho hrimhrim lo. Hi kong hi mitampi nih cun kan thei tawn lo ee.. Kan Nu le nih an kan hrin hnu in an kan zohkhenhnak lawng khi kan theih tawn i, hla phuah thiam tampi zong nih an kan zohkhenhnak kong khi biapi deuh ah chia in hla an phuah tawn ee.
A si, zohkhenhnak hi a biapi tuk mi cu a si ve ko. Ka chim duh mi cu kan Nu le hi fale caah an rak kan pawi lio khan an sunglawi tuk cang ee. Cu hnu ah har lengmang in thihnak lungpang cung kal bantuk in an kan hrin, cu hnu ah kum tampi kan si tiang a chun, a zaan in an kan zohkhenh ee..Fale kan caah Nu le hi an va sunglawi lawmmam ve. Norman Williams nihcun “Pathian thil tuah ropui cem pakhat cu NU hi a si” a ti. Pathian nihhin sunglawituk hin a rak ser hrim ko hna.
Kei hi ka Nu biachimh a ngai theng ballo mi pakhat ka si ve. Phungthluk ah kan hmuh mi cu “ka nu biachimh rak ngai ning law, Vom pi sumsuk ka hmu hnga lo” ti a si. Hi phungthluk hi ka nun cu a si ee. Pathian nih sunglawituk in a cawisanmi Nu chimh ngaih lo cu a hlawknak pakhat te hmanh a um lo. Kei ka caah ka Nu a sunglawi cem ka tinak cu, Nun a ka chimhnak, a rak ka cawm zohkhenhnak hna le ka caah a tuah mi vialte lakah “ a ka ngaihthiamnak” hi a si.
A ka dawtnak a langhnak zawnbik cu midang mithmuh ah a chia tuk mi, ai rawk dihmi le cohlan awktlak ti lomi ka si bu zong ah a rak ka ngaihthiam khawh rih mi hi a si. Mahatma Gandhi nih “Mi ttawnttai hna nih mi an ngaithiam kholo, ngaihthiamnak hi mi ropui hna nih an ngeih mi ziaza a si” a ti. Cu bantuk in ka Nu nih a ka ngaihthiam khawhnak hi a fa ka caah a sunlawi cemnak a si ko rua tiah ka ruah.
Ngaihthiamnak nih mi a remh ee, ka nu nih a mitthli he a ka ngaihthiamnak thawng lawng in Cung Pathian thluachuah ka tong kho ee….Ka nu thin ka alh ter lio ah ka nu nih ngaithiam loin chiathna ka serh sehlaw Pathian thinhannak ka cung ah a tla men ko hnga. Ka Nu kai lawm, Pathian nung nih nunkhuasauhnak in pe sehlaw, fale caah thlazacam in le thluachuah hamtu si peng ko sawh.
Nu pawl hi nan sunglawituk ee….Pathian nih an dawt tuk hna ee….cucaah nan mah le mah zong nih a sunglawituk mi nan si hi philh hrimhrim hlah u law…an cawisangtu hna Pathian nung cu thangtthatnak pe ko u tiah in forh ko hna ning. Innchungkhar ah nan biapi tuk, Theodore William nih “Nu hi vanram tawh kengtu an si” a ti. H.Benson zong nih “Nufel cu ram hrang ah raldotupawl nakin man an ngei deuh” tiah a ti ve. Nu pawl an sunlawi zia an chim duhnak an si. Cucaah Nu hna,,,na fanu, fapa caah na sunglawi maw? na pasal caah na sunglawi maw? Hihi biatak tein ruat ve u law, a sunglawi chinchin mi NU si ko u. Crd; Salai Van
Be First to Comment