Kalay pengkulh, Sitha khuapawng ah SAC ralkap nih CNDF ralkap pakhat cu March 14 chun ah an rak tlaih i nihin March 18 ah a ruak in an hmuh, tiah theih a si. A nih hi kum 40 hrawng a si cang caah “Ral hmai ahcun ka kal kho lai lo i, rawlchuan tu in kan bawmh hna lai, rawl chuan in ral ka do ve lai,” tiah CNDF ah a lut mi a si.
A naule an dam lo caan hmanh ah zaanṭim ah tho in, mei a kau i rawl lumsa te a chuan piak tawn hna. Ralkap min ah President, Bohmu, Japan sobul ti in an kawhmi a si. CNDF chimphuannak nawlngei tu pakhat nih cun, “Cawn nikhat ni ah khan an khua ah Mawtaw saikel lak ah a kal i SAC ralkap nih an rak tlaih hi a si. Nihin March 18 ceo ah a ruak kan va hmuh i a nam pah cang. An tlaih ni a siloah a thaizing ah an thah colh i si lai,” tiah a chim.
relchap…Aizawl Khuapi Ah Youth For Myanmar Nih Ralzaam Bawmhnak Caah Ei-din Zuarnak An Tuah!Myanmar ramchung buainak ruang ah Mizoram chung ah ralzaam in a phan mi hna bawmhnak ding caah Youth for Myanmar tawlrelnak in nihin March 18 ah a nikhatnak ei-din zuar in fund kawlnak ngeih a si.
Ralzam Bawmhnak ding caah ei-din zuarnak hi nihnih chung tuah a si lai i, zinglei suimilam 9:30 in zanlei 4:00 tiang tuah a si lai. Charity Concert zong tuah chih a si i, Chin Hlasak thiam Thun Kham, Biak Hlei Par, Iang Len Sung le hlasak thiam tampi zong nih an telpi hna.
Youth For Myanmar nih a luancia February 2 ni zong ah ralzaam bawmhnak ding ah Eidin zuarnak an rak ngei cang i, cutan an tuah mi ah India phaisa 60,000 renglo an rak hmuh i Mizoram hmunkip um ralzaam sin ah bawmhnak kan pek khawh hna, tiah Youth For Myanmar hruaitu Tluangte nih The Chin Post ah a chim.
Hi ei-din zuarnak nawl a kan petu Aizawl DC cung ah le kan herhnaknak kip ah a kan bawmtu Central YMA hruaitu hna cung ah kan i lawm, tiah a chim chap.
Be First to Comment