May 5 Kahdohnak Ah A Nunnak Liam Mi Salai Hrang Lian Hnin Cu Ni 2 Hnu Ah A Ruak Hmuh A Si Ee

May 5 Kahdohnak Ah A Nunnak Liam Mi Salai Hrang Lian, Ni 2 Hnu Ah A Ruak An Hmuh. May 5 , Tlangzar kahdohnak ah a nunnak liam mi Salai Hrang Lian Hnin (Thau) cu Ni 2 a rauh hnu Nizaan, May 7 zing ah a ruak an hmuh i an khua (Thau )ah an tlun pi i suimilam pakhat chung ruak an suan hnu a zaanlei ah a ruak an vui colh.

May 5 Tlangzar kahdohnak ah Chin ralkap 9 an nunnak a liam ti a si nain The Chin Post nih minung 8 lawng kan fehter khawh. Chin ralkap a nunnak liam mi hna cu: 1. Salai Thawng Hup Lian, 2. Salai Tha Hlei Sang 3. Salai Dawt Tha Cung, 4. Salai Van Biak, 5. Salai Thawng Tha Peng, 6. Salai Zo Thang Lian, 7.Salai Biak Hlei Sang le 8. Salai Hrang Lian Hnin hna an si. Chin ram le Miphun caah nunnak a pe mi Chin ralkap vialte upatnak sangbik kan in pek hna. Credit; The Chin Post

Thawngdang Relchap>>><<<<< HAKHA PENG KAHDOHNAK AH KHUAMI MIZAPI 4000 LENG AN ZAAM. Lawngtlai, 7 Biangreithlep 2022 : Chin ramkulh, Hakha peng, Chuncung khua le Falam peng Dokțhek khua kar ah ralhrang le mizapi ralkap 3-5 Biangreithlep kahdohnak a chuahnak lamcung i a ummi khua Chuncung, Dokțhek, Ramthlo,Tlangzar,Țaal, khua in khuami mizapi 4000 leng nih an inn lo an chuahtak tiah RFA nih a tial.

Min langhter awk tha lo mi khuami pakhat nih ” Ralhrang an rat caah kan zaam, khuapawng zong ah kahdohnak a chuak fawn, cucaah ramlak ah kan zaam, kan zaam hnu ah ralhrang nih khua mei in an duah” tiah a chim. Ralhrang kutin a kaangmi hna cu Ramthlo khua 4 Biangreithlep ah inn 10, 5 Biangreithlep ah Tlangzar inn 16, innkaang mi dihlak hi inn 26 a si.

Tulio hi Chinram ah ruah a sur ngai caah ramlak i a dormi hna cu sipalin i zat lo ruang harsatnak an tong. Ralhrang nih 3 Biangreithlep ah Hakha in thongtla 15 cu motor in Kalay lei ah kuat a timh hna caah lampi ah mizapi ralkap hna CNF/A ah a fonhmi hna he kahdohnak a chuak. Hi kahdohnak ah ralhrang lei in 18 an thi i, mizapi ralkap lei in 9 nih miphun le ram caah an nunnak an pek.

Ralhrang nih nawlngeihnak an lak hnu ah Chin ramkulh ah a cangmi kahdohnak ruangah khua 313 in minung singkhat leng nih inn lo an chuah tak i an zaam hna.
Hi chungah minung 60000 hrawng cu ramchung ah an zaam cio hna i a dang minung 40000 hrawng cu Mizoram chungah an i dor hna. Credit; The Lairam Times