Poi Taktak Min Aung Hlaing Le A Ralkap Nih Mipi Hriamtlai An Riahnak Ah Tam Tuk An Thah Hna

Sagaing ramṭhen, Myinmh peng Peku(ပဲကူ) khua pawng ah um mi Black Eagle Defense Force-MMU sakhan pakhat cu SAC ralkap nih an luhnawh i PDF 8 an thah hna, tiah CDSOM sin in theih a si. Nihin May 9 zinglei ah Black Eagle sakhan luhhnawh an ton i minung 8 an nunnak a liam kong cu CDSOM nih Nwe Oo (Myaung) ti mi Facebook cahmai ah an tarlangh.

SAC propaganda page ah cun, Black Eagle Defense Force-MMU cu sakhan pakhat luhhnawh a si i, ruak 8, kutser meithal 4, kutser bomb lung 5, phone 15, bomb sernak ah hmanmi hrikual kual 3, solar panel, inverter, battery le bomb sernak thilri he aa pehtlai mi thilri dangdang pawl zong laak a si, tiah an langhter.

US First Lady, President Biden thaisung Jill Biden cu Europe ah a tlawng i, thawngthanhnak zeihmanh tuah hmasa loin May 8, Mother’s day ah Ukraine a tlawng. Ukraine ah cun Ukraine first Lady Olena Zalenska, president Zalenskyy nupi he an i tong i, US first lady Jill Biden nih cun Russia ral lak ah Ukraine a dirkamhnak a langhter. Jill Biden nih cun, Ukraine le Russia tukdohnak cu dai zok cang sehlaw, tiah a duhnak kong a chim i, Mother’s day thengmang te ah Ukraine tlawn a duh kong zong a chim.

Jill nih cun Ukraine mizapi nih Russia ral an dohnak phen ah US cu kan um peng lai, tiah a chim fawn. Olena Zalenska zong nih president Zalenskyy pawng ah a um kho peng lo nain a fale pawng ah cun a um peng kong a rak chimh ve. Tutan Jill le Olena an i ton hi Russia ral a thawh hnu ah Ukraine first lady Olena media ah aa langh hmasa bik a si. Hilio US president Biden le Ukraine president Zelenskyy hna cu mui hmuh khawh in an i chawn i.

Hi caan ah hin Vawleicung ram ṭhawng 7, G-7 zong an i langh ve. G-7 nih cun faak deuh in Russia phihkharnak an tuah ṭhan lai kong an chim. Cupinah Russia mirum le media vialte an rengh hna lai kong le ramdang in Russia oil cawk cu donghter dih an i tim kong an chim. Hilio ah hin Ukraine nichuahlei Luhansk khuapi i Sianginn pakhat cu Russia missile nih a khen i, siangngakchia 60 hrawng cu an thi lai, tiah ruah a si, ti in president Zelenskyy nih a chim.

Thailand ram, Chiang Mai khuapi ah Myanmar mi Thailand ram um hna tawlrelnak in ‘Market for Myanmar’ phaisa kawlnak cu May 7 ah tuah a si i, kawl rawl le Myanmar ram um tlangchung mi eidin rawl hna zong zuar a si. Market for Myanmar in hmuh mi phaisa pawl cu Myanmar ralzaam hna bawmhnak pek ding in timhtuah a si i, phaisa kawlnak ah hin a dihlak ah $ 6,000 leng an hmuh, tiah theih a si.

“Tlamtling tein puai kan tuah khawh, thazaang a kan petu zong an tam, thil kan zuar mi zong kan manh ngai. Phaisa kan hmuh mi hi IDP (ralzaam) camp ah a dang tein bawmhnak pek kan i tim,” tiah phaisa kawlnak tawlreltu nih an chim. Phaisa kawlnak tuahnak ah cun dawr 40 a um i, kawl rawl le Thai rawl zuarnak dawr zong an um lengah kutser mi thilri pawl zong an zuar, tiah theih a si. The Chin Post