Press "Enter" to skip to content

Mi Damlo Nutung no Pakhat nih Doctor Sin ah A Min A Chim Ruang ah A Cung ah Thil Duhlo Tuk mi A Cang

Afghan nu pakhat a min “Rabia” timi cu a zawt a zual deuh ruang ah sibawi pa sin ah a vai i piah.Sibawipa nih cun sii ei ding le cawkding tete cu ca in a rak tialpiak i cu a tialpiak mi ca te cu ai ken i a inn lei ah a lawi than . Sibawi pa nih ca a rak tialpiak mi cu a pasal a hmuhter ve.Sibawi pa nih ca a tialpiak mi cung ah mizaw min tialnak zawn cu a zoh i “Rabia”timi a hmuh cun a pasal cu a thinhung tuk i a nupi cu a zaw i a damlo tizong tuak lo in a vuak colh .

A pasal nih cun “Zeiruang ah dah nangmah na theihlo mi pa sin ah na min cu na va chimh’tiah a vuak hi a si .Afghanistan ah hin nupawl hi nawl ngeihnak pakhat te hmanh an ngei lo ti a si . Culawng silo in an phunglam ah hin nupawl nih an theih ballo mi pa sin ah an min an chim a si ah cun an pasal le a silo ah an pa le mual an photer hna tiah ruah a si fawn .

Cun nupawl an auh tik hna zong ah hin an min in au lo in ka nu,ka farnu ,ka naunu ,ka unu tilawng in auh an si tawn ti a si .Nau an ngeihtik zong ah an chuahka in minsak an si bal lo i an pa le min cu an i hrawm colh i can zeimawzat a liamhnu pi lawng ah min sak than an si tawn cucu Afghanistan phung a si ve .

Cun nupawl nih pasal an ngeihtik zong ah an puai sawmnak ah an min tarlangh a si bal lo i damlo nikhua zong ah an min langhter a si fawn lo .An thihsual hmanh ah an thlanmual ah an min langhter a si fawn lo ti a si .Curuang ah an min ngeihmi zalong tein hmankhawh ve nak hnga “Where is my name” timi hmangin Afghanistan nupawl nih lamzawh tiangin an duhnak an rak langhter ve nak a rak si .

Hi cawlcanghnak hi a liamcia kum 3 lio ah khan Osmmani hruainak in nupawl mah min hmanh hman khawhlo cu kan nuhrin covo kan sungtuk tiah an rak aupi cang i tu ah cun Afghanistan cozah nih a van ngeihven ve deuh cang hna i nupawl nih nau an ngeih tik ah an ngeimin tialnak zawn ah nu an si zong ah tha tein an min tial le langhter a si cang lai tiah an buaipi cuahmah lio a si .

Cun,hmatpungtin (NRC) le naute min tialnak ah nu min tialchih dingin tuanvo ngeitu pawl zong nih cozah sin ah an nor thluahmah lio hna a si fawn.Afghan nu MP hlun pakhat nupawl covo biapi ngai ah a chiatu Fawzia Koofi zong nih nupawl cawlcanghnak cu a lungtlinpi tuk hna ti a si ve fawn .Asinain Parliament chung ah hlanlio rak kalpi mi a thlah kholo tu ,fektak in ai tlaih peng rihmi an tamtuk ruang ah nupawl an cawlcangh nak hi cutluk in sullam a ngeilo kho men i cupin ah ttihnung ngai zong a si kho lehlam tiah a thinphang mi mi tampi an um ve. chinlandtodaynews

Be First to Comment

Leave a Reply

Your email address will not be published. Required fields are marked *