Min Aung Hlaing

Shan ramkulh le Kayah ramkulh ramri Moebe kahdohnak ah ralhrang lei in 20 nak tlawm lo an thi i, mizapi vengtu ralkap lei in a thi mi le a hliam mi zong an tam, tiah Moebe mizapi vengtu ralkap -MBPDF nih cathanh an chuah. Moebe hmunhma chung ah ralhrang le Karenni ralkap phu hna cu nizan chunnitlak dengmang an i kap i zanlei Sml 6:00 hrawng ah Karenni ralkap phufonh hna cu hnulei an tolh cuahmah lio ah Tank le hriamngan in an kah hna i,

cunglei zong in an kah hna caah Karenni ralkap 20 nak tlawm lo an nunnak a liam, tiah theih a si. February ni 17 zinglei thok in Moebe khuapi chung, Hi Kwei Se(ဟိုက်ကွီဆည်) le War Re Soe Fa Hliang (ဝါရီဆူးဖလိုင်) khua pawng ah chunnitlak tluk kahdohnak a chuak i Moebe PDF, Loikaw PDF, Demoso PDF, Phe Kone PDF, KA, KNDF, KGZ, JPDF, GZ – 21 le mizapi vengtu ralkap phudang hna i bawm in an doh hna.

Ralhrang in a thi mi le aa hliam mi an tam caah chun Sml 1:00 hrawng in Tank 2 le ralhrang thazaang 100 hrawng cu anmah bawmtu ding ah an rak thlah hna, tiah MBPDF nih a thanh. Ralhrang lei in 20 nak tlawm lo an thih hnu ah hriamngan tamlak an hman i zanlei Sml 5:00 hrawng ah Vanlwng 2 in voi 7 hrawng an rak kah hna.

Ralhrang pawl a dohtu mizapi vengtu ralkap hna nih Moebe ralkap 7 an thi i 6 hliam an tuar, tiah an cathanh ah an langhter chih. Ral hmaikal hna bawmchantu sii-bawi pakhat zong kahdohnak ah cun nunnak a liam i PDF bawmtu motor 1 zong a rawk. Loikaw PDF cathanh i a langh ning ah Loikaw ah kahdohnak faakpi a chuak i, kahdohnak ah ralhrang le mizapi vengtu ralkap a thi mi an tam.

Nizan zinglei zong ah War Re Soe Hliang khua ah kahdohnak faak ngai a chuak fawn. KGZ hna zong anmah le an si khawh tawk in February 17 Moebe kahdohnak ah an i tel ve i cu kahdohnak ah cun ralhrang 11 an thi i 5 hliam an tuar. A thi mi le aa hliam mi an tam caah ralhrang nih hriamngan tamlak an hman, tiah theih a si.

KGZ ralkap lei in minung 2 hliam an tuar i hnu an tolh. Cu hliam a tuar mi hna cu sii-inn ah thlop an si, tiah thawng an thanh. Shan- Karenni ramri ramkulh ṭhennak hmun ah War Re Soe Pa Hliang khua ah nihin February 18 zinglei ah ralhrang pawl an lut i mizapi inn hna cu mei in an khanghpiak hna i Sml 10:00 hrawng ah ralhrang le Karenni aa fonhmi ralkap phu karlak kahdohnak aa chuak colh, tiah theih a si. Nizan february 17 ah ralhrang kah mi hriamngan kuan cu War Re Pa Hliang khua chung ah a tla i, a puah caah inn pakhat a kaang i khua mi pakhat a thi, tiah theih a si. Crd; The Chin Post

Karenni (Kaya) ramkulh, Loikaw khua ah hram bunhmi Palek zung ah rianṭuanmi Palek Soe Hein Thu cu nihin febuary 18, chun ah Karreni Democratic Front (KDF) le Karenni State Police(KSP) sin ah a rak phan i CDM a tuah, tiah KDF nih a thanh. Palek Soe Hein Thu nihcun G-3 meithal zuunkhat, 7.62 kuan 104 le kuan bawm pahnih a rak i zaampi i KDF le KSP sin ah a ap hna, tiah theih a si.

Mizapi lei ah a dirmi palek Soe Hein Thu cung ah lunglawmhnak le amah bantuk in Palek le ralkap nih CDM tuah cio ding in KDF nih a forhfial hna pin ah CDM nan rak tuah tik ah nan kuan le nan meithal van i ken uh, tiah KDF nih sawmnak a thanh. Pago Ramṭhen Chief Minister Hlun U Win Thein Cu Ralhrang Nih Thong Kum 20 Thlak Ding In Dan A Tat:

NLD cozah chan ah Pago ramṭhen Chief Minister U Win Thein cu case 7 in tazacuai a si hnu ah kum 20 chung thongtla i rianṭuan ding in Pago ramṭhen ralhrang biaceihzung nih Febuary 17 ah bia a khiahpiak. U Win Thein nih a rian Chief Minister (CM) a ṭuan lio ah rampi caah hlut mi phaisa le Covid-19 runvennak caah hlut mi phaisa hna cu amah nawl in a hman pin ah rianngeitu cheukhat sin in ziknawh a laak tiah ralhrang nih sual an puh i taza an cuai hi a si.

Cun, Pago ramṭhen Sakṭuannak phu pakhat (BRCCA) timi cu amah nawl in a dirh i, a ṭuan pin ah 2017-2018 in 2018-2019 budget kum ah a hlei mi phaisa hna in mei le lam tuahnak ah tender Zulhphung zul loin company pakhat sin ah rian a pek dih caah budget in a hleimi tamtuk a vaivuan, tiah ralhrang nih a puh chap. U Win Thein cu ralhrang nih uknak an laak february 1 bak in an tlaih ve i June 15 ah phungrelnak caang 55 in case an rak serpiak. Crd: The Chin Post