Myanmar Ralkap nih “Miphun Cihmih Thahnawnnak” an Tuah tiah US nih Fehter. Min Aung Hlaing hruaimi Myanmar ralkap nih “Miphun Cihmih Thahnawnnak” (Genocide) an tuah, tiah US cozah nih nihin March 21 (Myanmar Time) ah thawngthanhnak a tuah. 2017 ah a rak cangmi Rohinyga pawl thahnawnnak kong he pehtlai in US nih “Genocide” timi biafang a rak hmang ballo nain atu ah a hun hman hi a si.
US nih atu bantuk in thawngthanhnak a tuah tik ah vawleicung biaceih zung ah fawi khun in Myanmar ralkap tazacuai khawh a si cang lai, tiah nuhrin covo zatlangbu hna nih an chim. 2017 Rohingya thahnawnnak ah minung tampi an nunnak a rak liam i, atu tiang ah Rohingya milu 730,000 hrawng ralzaam dirhmun in Bengladesh ram ah an um hna.
US Democratic Senator Jeff Merkley nih, “Biden cozah nih atu bantuk in biachahnak a tuahmi cung ah lunglawmhnak nganpi ka ngei. Biachahnak tuah awk ah caan saupi rak rau ko hmanh sehlaw atu bantuk in biakhiahnak an tuah khawhmi nih hin Myanmar ralkap dantatnak kong ah hmual a ngeihter khun cang lai,” tiah CNN ah a chim.
Myanmar ralkap nih Rohingya miphun cung ah “Miphun Cihmih Thahnawnak” a tuah timi thawngthanhnak cu Washington khua i, US Holocaust Memorial Museum ah US ramleng vuanci Antony Blinken nih a tuah. The Chin Journal
Khualtlawngmi 133 A Phortu Tuluk Vanlawng Pakhat A Tla! Tuluk ram China Eastern Airlines in khualtlawngmi 133 phortu vanlawng pakhat cu Guam Syi peng chungah a tla tiah anmah ramchung thawngzamhnak nih a langhter. Atu tiangah a thimi le hliammi zat hi theihfian a si lo. A tlami vanlawng cu Bu-Ing 737 phun a si i, tlang le horkuam chahnak laakah a tla i, mei kanghnak a chuak tiah an chim.
Khualtlawngmi phortu MU5735 cu anmah ramchung caan tuak sml 1:15 ah Ku Min in Guam Gyu khuapi ah kal ding a si. Bawmchannak petu hna cu atu caan ah vanlawng tlaknak hmunah kalter an si cang tiah CCTV thawngzamhnak nih a langhter. Cu vanlawng cu Wu-Yu peng Taan pengkomh ah a tla i, Guan Syi peng cu Tuluk ram nichuahlei ah a ummi khuapi biapi taktak a si i, Guam Gyu pawngah a ummi ramkulh a si. Crd: Voice of Myanmar, TFT
Be First to Comment