Miphun ning in cihmih a si tiah US nih a thanhmi Kawl ralkap nih a cohlang lo. 2022 March 23 – Rohingya mipun cungah Kawlralkap nih an miphun ning in a cihmih hna tiah a thanhmi cu SAC nih a cohlang lo.
American cozah nih a thanhmi hi a dik lomi thli sinning kha i charhchan in bia khiahnak a ngeihmi a si tiah March 22 zaanlei ah SAC Minister of Foreign Affairs nih a thanh. Kawl ralkap cu miphun cihminnak (Genocide) a buar ko tiah March 22 Washington DC ah a ummi Holocuast museum ah tuahmi Rohingya miphun cihmih an tonnak caizin langhternak ah phungning tein a thanh.
2017 ah Kawl ralkap nih Rohingya miphun cungah a buarmi sualnak hi Genocide tiah auhmi miphun ning in cihmihnak le Crimes against Humanity tiah auhmi miphun cungah sualnak buarmi a si tiah Antony Blinken nih a chim.
“Nuhrin covo phu hna sin in hmuhmi kapṭhanhnak aa tel lomi thil sinning pawl le thawngpang dik le American ramdang lei committee nih kan mah tein ṭha tein zohfelnak kan ngeih hnu ah biakhiahnak kan ngeihmi a si” tiah a chim. American cozah i biakhiahnak hi lunglawm tein kan don ko tiah Bangladesh Minister of Home Affairs Assaduzzaman Khan nih a chim.
Rohingya kong he pehtlai in cawlcanghnak a ngeimi hna le Bangladesh a phanmi Rohingya ralzaam hna zong nih a tu bantuk in American nih a thanhmi hi kan i lawm. Kawl ralkap hi American cozah nih hinak faak deuh in a ziizut hram ko seh tiah forhfialnak an ngei. The Chinland Post
Kanpetlet peng ralzaam hna nih sii-aii le eidin bawmhchanhnak an herh. 2022 March 23 – A luancia zarh chungah, Chin ramkulh, Kanpetlet peng ah kahdohnak a chuah lengmang caah khua 10 in mipi 10,000 leng cu ram tangah an zaam dih i bawmhchannak an herh ko tiah Kanpetlet peng Red Cross phu sin in theih a si.
Thazang 300 hrawng a simi SAC ralkap hna cu CDF-Kanpetlet Headquarter lei ah March 11 thok in hmunhma pathum ṭhen in kahdohnak an tuah i hriamngan in an kah caah Sammathi, Saneinnu khuami hna cu ram tangah an zaam dihnak hi a si. “Kanpetlet ah kahdohnak aa thok bak in zaam a si i a cheu cu khua pawngkam ah zaam a si.
Khuachung vialte ah SAC ralkap nih kahdohnak an tuah caah kahdohnak lioah a zaam na, ram tangah a zaammi hi a thong leng an si lai. A biapimi cu, SAC ralkap nih khuachung hna le a pawngkam hna ah hriamngan in kahthlorh an kah caah um ngam a si lo” tiah Kanpetlet Red Cross phu chungtel pakhat nih a chim.
A tu bantuk in ramtang a zaammi chungah nu pawl, fapawi lio pawl le hngakchia hna an i tel i fa a pawi liomi nu pahnih cu an zaamnak ah an nau a rawk tiah a peh chap. “Nu pawl, fapawi lio, hngakchia an zapi te fonh in 400 hrawng an si lai. An zaam lioah a nau rawkmi nu pahnih zong an um” tiah a chim.
Ralzaam mi hna caah thaumnak sii, hngakchia hna caah sii-aii, Dat-sa dip, chungtlik, zawt, khuh le ṭangfah zawtnak hna caah sii an herh i eidin tirawl zong an chanbau ko tiah Khonumthung Burmese nih a langhter. The Chinland Post
Be First to Comment