Tuzing March 5, 2022 Chin ramkulh Rihkhuadar ralhrang umnak sakhan cu Chin mizapi vengtu ralkap phufonh nih an doh hna caah SAC ralhrang phu chungtel minung 5 an thi i, hliamhma tuar an tam, tiah Chin Defence Miliaria(CDM-Siyin) nih cathanh an chuah.
Nihin March 5, zinglei suimilam 5:55 ah mizapi vengtu ralkap phufonh le ralhrang phu kar suimilam pakhat tluk kahdohnak a chuak, tiah theih a si. Cu kahdohnak ah cun Chin mizapi vengtu ralkap phufonh PDF-Zoland, CDM-Siyin, CNDF, CNA, CDF-Hualngo phu hna nih Rihkhuadar um ralhrang phu sakhan cu doh an si, tiah CDF-Siyin nih an cathanh ah an langhter. Credit: The Chin Post
March 2 in nihin March 5 tiang(ni 3) Kahdohnak ah SAC ralhrang 5 nak tlawm lo an thi, tiah nihin March 5 ah Demoso-PDF nih an thawng an thanh. Kaya ramkulh, Demoso peng, Dawkami(ဒေါကမီး) khua le Pupha(ပူဖား) khua ah hmun 3 in rallam a sial mi ralhrang phu pawl cu DMO- Local PDF(Demoso),
Central Region Task Force, KNDF, KA, Loikaw- PDF le a dang dohthlennak tuahtu phu hna he i bawm in an doh hna. Ralhrang 5 nak tlawm lo an thi i PDF phufonh hna lei zong aa khawng mi an um ve, tiah DMO-Local PDF nih a langhter. Kahdohnak a chuah lio ah hin ralzaam inn 15 cu hriamngan kuan nih a tlak i, inn 17 nak tlawm lo ralhrang nih an khangh.
February 16 thok in Shan-Kaya ramri Moebe ah nizaan March 4 tiang kahdohnak a faak, tiah theih a si. Ralhrang nih Demoso lei ah thazaang tam tuk in rallam an sial caah Demoso peng chung ah a ummi dohthlennak tuahtu phu pawl mipi nih bawmh ding le mipi nih mah le himnak caah i ralrin cio ding in PDF nih theihternak an tuah. Credit: The Chin Post
Nawlngeihnak latu SAC ralhrang nih National Unity Government(NUG) hruaitu telh in minung 11 cu nizan March 4 ah ram mi sinak an hlihpiak hna, tiah theih a si. SAC ralhrang nih ram mi sinak an hlihpiak mi hna cu, Dr. Zaw Win Seo, U Yee Mon, U Lwin Ko Lat, U Aung Meo Min, Dr. Sa Sa, Daw Zin Mar Aung, U Min Ko Naing,U Meo Yan Naung Ting, Mah Ih Pan, Ih Ta Maung le Htin Lwin Aung hna an si.
NUG i Human Rights Minister U Aung Meo Min nih cun hi bantuk ralhrang nih Democracy le nuhrin covo cawlcanghnak lei ah aa tel mi hna sualphawt le ram mi sinak hlihpiak cu an tuah khel an tuah mi a si ko, an tuah mi thil nih hin zei hmanh kan rianṭuannak ah a kan dawn khan lai lo, tiah a chim.
Myaung peng Nay Po Kung Khua Ralhrang Nih An Khangh!: Sagaing ramṭhen, Myaung peng Nay Po Kung(နေပူကုန်း) khua, Simikung(ဆီးမီးခုံ) Yenet(ရေနက်) lawng dinhnak ah umhmun a khuar mi SAC ralhrang nih nihin March 4 zing Sml 9:30 tluk ah Nay Po Kung khua cu an khangh i mipi ngeih mi thilmansung pawl zong an lakpiak hna, tiah khua mi nih an chim.
SAC ralhrang phu minung thazaang 60 tluk cu zing 9:30 ah tilawng 1 le motor 2 in Ayeyawady tiva ral a um mi hna cu an va panh hna. Nay Po Kung khualu lakphakti dawr, lumehnak dawr, le inn pakhat an khangh i sui, ngun, caw le vawk pawl an laakpiak hna, tiah theih a si. Nay Pu Kung Khua hi inn 150 tluk le minung 500 tluk an umnak a si i SAC ralhrang nih an an laakpiak mi thilri hna hi atu lio phaisa man cun sing 200MMK man si, tiah theih a si.
March 1 ah khan khua vengtu ralkap phu nih SAC ralhrang raltuknak tilawng RPG in an kah ruangah atu bantuk in SAC ralhrang nih lehrulh an cham bia a si, tiah an chim. March 1 ah Simikhung Yenet lawngdinhnak ah SAC ralhrang Tank a phortu tilawng 2 cu PDF phufonh hna nih RPG in an kah hna caah tilawng 1 an rawk i kaphnih kar kahnak a rak chuak. Credit: The Chin Post
Be First to Comment