Myaung Peng Memataw Khua Ah Rallam a Sialtu SAC ralkap Kahdohnak Ah Ralbawi Telh In Ralkap 5 An Thi: Sagaing ramṭhen, Myaung peng, Memataw (မယ်မသော်) khua ah rallam a sialtu SAC ralkap cu May 5 ah Myinchain (မြင်းခြံ) pengkomh no.5 battalion, Hnalung Hlah Lu Mait Gyi(နှလုံးလှလူမိုက်ကြီး) phu nih sniper in an kahhna i, SAC ralkap ralbawi bo 3 pakhat telhin ralkap 5 an thih lengah midang 3 nih hliamhma an tuar, tiah Hnalung Hlah Lu Mait Gyi(နှလုံးလှလူမိုက်ကြီး)phu an chim.
SAC ralkap lei ralbawi bo 3 pakhat le hriamngan tlaitu pakhat telh in minung 5 an thihnak le SAC ralkap chungtel hliamhma tuar mi 3 kahdoh an tonnak vedio cu Hnalung Hlah Lu Mait Gyi(နှလုံးလှလူမိုက်ကြီး)phu nih nihin May 10 an langhter. Kahdohnak ngol a si hnu ah Myinchain(မြင်းခြံ) pengkomh no.5 battalion, Hnalung Hlah Lu Mait Gyi (နှလုံးလှလူမိုက်ကြီး) phu nih hmunhma zohfelnak an tuah lio ah, SAC ralkap ralbawi pakhat nih aa tlaih mi 380 pistol 1 le kuan bawm 1 kan lak, tiah Hnalung Hlah Lu Mait Gyi (နှလုံးလှလူမိုက်ကြီး) phu nih an thanh.
SAC ralkap nih remdaihnak ding tonbiaruah sawmnak ah lungtling in minthutnak a tuahtu hriamtlai phu 7 le NCA ah min thutnak a tuah rih lo mi hriamtlai phu 3 an i tel lai, tiah theih a si. Nationwide Ceasefire Agreement(NCA) minthutnak tuah ding in SAC ralkap sawmnak ah tel aa tim mi phu hna cu ALP, RCSS, KNLA-PC, DKBA, MNSP, PNLO le LDU hna an si.
NCA minthutnak ah aa tel rih lo i SAC ralkap tonbiaruah sawmnak ah tel aa tim mi phu hna cu UWSP, SSPP le NDAA hna an si. Thazaang a ṭhawng ngai mi hriamtlai phu KIO, KNU, KNPP le CNF hna nih cun SAC ralkap sawmnak, tonbiaruahnak ah kan i tel lai lo, tiah fiang tein an thanh. Kokang (ကိုးကန့်) MNDAA, TNLA le AA hna cu SAC ralkap sawmnak tel le tel lo ding ah biaruahnak kan tuah lio, tiah an chim nain SAC ralkap nih thawng thanh ṭhan ding in a hnubik rikhiahnak an tuah ni, May 9 tiang ah bialehnak an tuah rih lo.
NCA minthutnak a tuahtu All of Burmese Students Democratic Front-ABSDF zong nih kan i tel lai lo, tiah an langhter. Ramkhel lei buainak kong tawlrelnak ding caah biapi ngai a si mi NUG cozah le PDF cu lanhtak in, SAC ralkap nih daihnak ding ca tonbiaruahnak tuah cu a dik mi a si lo, tiah tlangcung hriamtlai phu hruaitu hna nih an chim. The Chin Post
Be First to Comment