Min Aung Hlaing Ralkap Tam Tuk An Thi Than

Sagaing ramtthen, ShweBo peng ah May 5 in 7 tiang SAC ralkap le NaTuang Naga mizapi vengtu ralkap, Wattlat PDF hna karlak ah kahdohnak a chuak i SAC ralkap 17 an thi i, PDF 3 an nunnak i 2 hliam an tuar. May 5 ah ShweBo peng nichuah lei, Kyauk Myiang pengtthen, Hinthar Kyi ( ဟင်္သာကြီး)khua le Kalamah Latkoh Kyiah khua lei ah thazaang 50 hrawng a si mi SAC ralkap hna rallam an sial i Hinthar Kyi khua cu mei in an duah.

Cu hnu ah Kalamah Lattkoh Kyiah khua lei an rat pah ah PDF ttangual nih bomb in an puahhnawh hna i SAC ralkap 10 hrawng an thi tiah Natttuang Naga( နတ်တောင်နဂါး) mizapi vengtu ralkap phu hna sin in theih a si. Cu ni ah cun SAC ralkap hna cu Kalamah Lattkoh Kyiah ( ကုလားမလက်ကောက်ကျ) khua cu mei in an duah i umhmun an khuar.

May 6 ah Maangin Tung Pin khua lei ah rallam an sial lio ah PDF hna nih an bawh hna i an kah hna SAC ralkap 7 an thi, SAC ralkap lei in hriamngan, hriamhme in an kah hna caah PDF cu hnu an tolh than tiah theih a si. Ni 3 chung kahdohnak ah SAC ralkap nih ShweBo le Wattlat ramri hmun Hinthar Kyi khua, Kalamah Lattkoh Kyiah(ကုလားမလက်ကောက်ကျ) khua, MaanGin Tung(မန်ကျည်းသုံး) Pin khua, Pale Tue (ပုလဲသွယ်), Ta Nuang Thar ( တ‌ေနာင်းသာ)khua cu an khangh hna.

Nizaan May 9 zaanlei ah thazaang 50 hrawng a si mi SAC ralkap nih khuami 30 hrawng an tlaih hna i SAC ralkap thilthuam an hruk ter hna hnu ah rallam an sialter hna tiah Nattaung Naga sin in theih a si. Credit; The Chin Post

Shan ramkulh nichuah lei Namkham(နမ့်ခမ်း) peng Manṭat khua ah umhmun khuarmi, SAC ralkap Battalion 144 in Battalion Commander le Captain nih anmah Battalion riahcaw ca ah tangka an chuahmi cu an i zampi, tiah theih a si. Battalion Commander Yar Za Min le Captain Aung San Oo nih April 20 ah anmah Battalion riahcaw ca ah tiah sing 600 cu an chuah i an zampi beh, tiah ralkap chung thawngpang petu sin in theih a si.

Cu hna pahnih cu CDM tuah in a zammi an si lo i, riahcaw ca ah tiah tangka an chuahmi an i zampi mi lawng a si. Khoika hmun ahdah an i thuh ti cu hngalh a si lo, tiah a chimchap. April 4 lio zongah Shan ramkulh nichuah lei Palaung(ပလောင်) hmunram Nansan peng Nankhe khua ah, umhmun khuarmi SAC ralkap Battalion 252 in ralkap 4 zong an rak zam bal cang.