Pako ramṭhen, Htantapin (ထန်းတပင်) peng, Shasaephu (ရှားစေဖိုး) le Yeshan (ရေလျှံ) khua pawng ah, May 7 zaanlei ah khan SAC ralkap khah-lah-yiah 84 in duh-tat-yin-hmu le tat-kyat-gyi nih an i citmi motor le KNLA, PDF phufonh cu hmaitonh in an i tong i, SAC ralkap ralbawi 2 cu motor in an tum i an zaam nain KNLA le PDF nih an tlaih hna.
Lampi ah zaam ṭhan an i timh caah an kahthah beh hna i, motor khaltu cu a luat, tiah Htantapin (ထန်းတပင်) tualchung hriamtlai phu chungtel pakhat nih a chim. Thah a tong mi SAC ralkap bawi hna sin in Htantapin (ထန်းတပင်) pengchung um SAC ralkap sakhan hna le
SAC ralkap chungtel min cazin a langhnak catlap cu kan laak, tiah Htantapin (ထန်းတပင်) tualchung hriamtlai phu pakhat nih cun a chim chap. Nihin May 8 zinglei ah SAC ralkap 2 ruak cu SAC ralkap nih an rak char hna i Yeshan(ရေလျှံ) khua le Ziphyukung(ဇီးဖြူကုန်း) khuachung cu SAC ralkap nih luhhnawh in chekhlatnak an tuah, tiah theih a si.
Kayin ramkulh, Pharusu (ဖရူဆို) le Shataw (ရှားတော) pengchung kahdohnak ah SAC ralkap 6 an thi i, hriamthil zong zeimawzat tualchung hriamtlai phu nih an lak, tiah theih a si. Nihin May 8 zinglei ah Shataw (ရှားတော) nichuahlei Tanlwin tiva kam Tatamaw(တာတမော) sakhan ah ummi khah-mah-yiah 428 le KA hna cu minutes 30 tluk an i kap.
Cu kahdohnak ah cun SAC ralkap lei duh-tat-yin-hmu telh in SAC ralkap 6 an thi, tiah KA nih an thanh. Nizan May 7 zong ah khan Pharusu (ဖရူဆို) peng Makharaw (မာခရော်) khua le Lawjaykhu(လောကျေခူ) khua kar ah riahcaw a phortu SAC ralkap cu KA, KNDF/B-04,
KNDF/B-15 nih an kah hna i cu kahdohnak ah cun SAC ralkap motor 4 meikhangh in an hrawh lengah SAC ralkap 30 leng an thi i, hliamhma tuar zong an tam lengah hriamthil zeimawzat an laak, tiah an thanh. Credit; The Chin Post
Relchap; Magwe ramṭhen, Laungshi camp in Palik Aung Kyaw Lin, pumpak No. La(လ)/277404 cu SAC kuttang rianṭuan a duh ti caah CDF-KKG sinah aa fonh. Aung Kyaw Lin cu M22 meithal zun khat, kuan bawm 2 le kuan 91 he a zaam i, lawmman tangka an pek dih hnu ah a himnak hmun ah an an chiah, tiah theih a si. CDF- KKG sinah a rak zaam mi, CDM tuahtu hi ralkap le palik 8 an si cang.
Cun, hriamnam he a rak zaam mi cu a himnak hmun ah chiah an si lai i, lawmman tangka zong pek an si lai. Hriamnam he kan sinah a rak zaAm lo mi cu ṭuanvo kan in la hna lai lo, tiah CDF-KKG nih cathanh an chuah. Htilin Khua Lei Ah Sakhan Ṭhial Ding In A Kal Mi SAC Palik le Ralkap Doh An Tong: Magwe ramṭhen, Htilin peng, Semintaw(ဆေးမင်တော) palik sakhan in Htilin khua lei ah i ṭhial ding in a chuak mi palik hna le tat-mah 11 in SAC ralkap hna cu nizaan May 7, ah bomb puahhnawh an tong, tiah theih a si.
Palik 40 le SAC ralkap 80, an dihlak minung thazaang 120 cu Htilin khuachung lei ah sakhan ṭhial ding in an kal lio, Zitaw(ဇီးတော) khua pawng ah YDF-Htilin nih cuai 30 tluk a rit mi bomb lung 2 in an doh hna, tiah YDF-Htilin in ṭuanvo ngeitu nih a chim. Kahdohnak a chuah hi May 7, chunhnu suimilam 1:30 hrawng ah a si i, Cu kahdohnak ah cun SAC ralkap 10 an thi, tiah tualchung hriamtlai phu hna nih an chim. SAC ralkap hna cu hmai fong ti lo in atu tiang Zitaw (ဇီးတော) khua ah umhmun an khuar, tiah theih a si.
Be First to Comment