Press "Enter" to skip to content

Mipi Hriamtlai Le SAC Ralhrang Kahdohnak Ah SAC Ralkap Minung Tam Tuk Lawmmam An Thi Tthan Cang Ee

Mandalay ramṭhen, Mataya(မတ်တရာ) peng , May 24 ah SAC ralkap le PDF kahdohnak voi 4 a chuak i, SAC ralkap 13 an thi, tiah Mandalay PDF nih cathanh an chuah.

Mandalay PDF cu Mataya peng ah hmunhma venhimnak an tuah lioah SAC ralkap an rat caah kahdohnak voi 4 a chuak i, SAC ralkap 13 an thi. Kanmah lei in a thimi le aa hliammi kan um lo, tiah Mandalay PDF nih an langhter.

Yangon ramṭhen, Mingalartaungngut(မင်္ဂလာတောင်ညွန့်) peng palik camp ah, May 25 zan sml 9:15 hrawng ah bomb a puak i, meithal thawng zong a thang ngai, tiah tualchung mi hna nih Khit Thit Media ah an chim.

“Zan sml 9:15 hrawng ah Mingalartaungngut palik camp ah bomb a puak, 9:17 hrawng ah meithal thawng pehtlai in a thang. Sii-inn motor, ralkap motor le palik motor zong an kal len,” tiah tualchung mi pakhat nih a chim. Cu bomb puahnak ah palik le ralkap a thimi le aa hliammi cu tualchung mi hna nih fehternak an tuah kho rih lo.

“Sagaing ramṭhen, Chaung U-Myinmu lam ah SAC ralkap nih an i citmi Mark 2 motor cu, May 25 ah PDF nih bomb kan puahhnawh i, a thimi le aa hliammi an um le um lo kan fehter kho rih lo,” tiah Chaung U PDF pakhat nih a chim.

Cu kahdohnak ah Chaung U Revolution Army (C.R.A) Companny 2၊ Farmer Revolution Force FRF (CHU) Battalion၊ Black Eagle Defence Force le Zarmini MMU hna i bawm in an kah hna, tiah theih a si. Credit; The Chin Post

Magway ramṭhen, Myaing peng ah PDF nih SAC ralkap an kawl hna i, May 25 zanlei ah hriamngan in an kah hna, tiah theih a si. “Myaing peng, Bahin palik camp in meng 6 aa hlatnak Kyauk Khuat(ကျောက်ခွက်) khua le Suwin khua karah mitlung kal a chektu SAC ralkap pawl cu, zanlei sml 3:00 hrawng ah Myaing PDF nih kan kah hna i SAC ralkap 6 an thi,” tiah Bo Let Ya nih a chim.

“Kan theih ning ahcun 6 an thi, an ruak zong kan zoh kho rih hna lo, a thimi hna pawngkam in seh meithal in an congh hna. Kyuak Khuat khua ah palik 45 hrawng nih an cheknak gate a um. Kanmah phu chungin phih khamnak le cheknak an kan tuah. Nihnih chung kan ngiat hna hnu May 25 zanlei sml 3:05 minutes ah kan kah hna, sml cheu chung kan i kap,” tiah a chimchap.

SAC ralkap 70 hrawng cu Kyuak Khuat khua ah umhmun an khuar i, 57 hrawng lawng an taang, tiah Bo Let Ya nih a chim. A luancia May 17 zinglei ah Myaing khua in a chuakmi Pyusawthi le SAC ralkap pawl cu, Myaing PDF nih an rak kah hna i, Pyusawthi 20 hrawng an rak thi.

#Myanmar Ram Pumpi Nikhat Chung Kahdohnak Ah SAC Ralkap 68 An Thi. Myanmar ram pumpi in May 25 nikhat chung kahdohnak ah SAC ralkap 68 an thi i PDF 2 an nunnak a liam ve tiah Khit Thit Media nih a langhter.

Khit Thit Media nih cazin a khawmhsuat ning ah SAC ralkap a thimi hna cu Magwe ramthen , Kyaukthu ah 30 , Sagaing ramthen Chaung Oo ah 36, Minmu ah 2 an thi i Sagaing ramthen Minmu ah PDF 2 an nunnak liam ve.

Relchap >>>>>><<<<<<<< Nihnih chung ah SAC ralkap nih Yunmarpin pengkomh khuate 20 hrawng an khangh caah tualchung mi 10000 leng inn le lo an zam tak, tiah ralzam zohkhenhtu bu sin in theih a si.

May 24 le 25 nihnih chung ah SAC ralkap nih, Yinmarpin pengkomh chung khuate Aung Chan Thar, Sihlaw, Aung Chan Aye, Sihlawchaung le Myayaih(အောင်ချမ်းသာ၊ စည်လှောင်၊ အောင်ချမ်းအေး၊ စည်လှောင်ချောင်း၊ မြရိပ်၊) khua 5 telh in khua 19 mei in an khangh, tiah theih a si.

SAC ralkap nih Yinmarpin peng khuate an khangh caah tualchung mi 10000 leng inn le lo an zam tak i, ralzam dirhmun in an um. Ruahkham angki, eidin ti le rawl, sii-aii le thilri an herh tuk, tiah ralzam zohkhenhtu hna nih an chim.

Sagaing ramṭhen chung ah SAC ralkap nih internet le phone line an phih. Ralkap thazaang tam tuk in rallam an sial, khuate tam tuk mei in an khangh pin ah tualchung mi an thilri man sung zong an firpiak hna, tiah theih a si.

Be First to Comment

Leave a Reply

Your email address will not be published.