Mipi Hriamtlai LeRalkap Kahdohnak Ah SAC Ralkap 10 An Thi, CDF 1 A Nunnak Liam

Kalay Peng Kahdohnak Ah SAC Ralkap 10 An Thi, CDF 1 A Nunnak Liam, Sagaing ramṭhen, Kalay peng Ashihshi(အရှေ့စည်း) khua le Shiaphu(ရှားဖို) khua kam ah SAC ralkap le CDF, PDF cu May 1 le 2 tiin nihnih chung an i kap i SAC ralkap 10 an thi, PDF -Kalay in ralkap 1 a nunnak a liam ve, Kum 15 hrawng nu pakhat cu hriamngan nih a khen caah a nunnak a liam, tiah CDF sin in theih a si.

Ashihshi khua kam hrawng ah May 1 zing sml 6:00 hrawng ah kahdohnak a chuak , cu hnu ah SAC ralkap le Pyusawthi cu rallam an sial lioah mizapi hriamtlai nih an kah hna caah SAC ralkap 5 an thi i, CDF(KKG) in 1 pakhat a nunnak a liam, tiah theih a si. Shiaphu khua kam kahdohnak cu May 2 zinglei in aa thok i SAC ralkap pawl cu, AungMingalar(အောင်မင်္ဂလာ) khua in Shiaphu khua leiah rallam an sial caah chun nitlak kahdohnak a chuak. SAC ralkap 5 an thi i, meithal zun 4 an chuh hna, tiah theih a si.

Cu kahdohnak ah CDF-KKG၊ PDF(Kalay), VAKOK (CNDF)၊ Ringger (RKDF) le Pa Ka Pha phu an i fonh. May 1 kahdohnak ah SAC ralkap hriamngan kuan cu Yeshin(ရေရှင်) khua ah a tla i, khum 15 hrawng nu pakhat a khen caah a nunnak a liam. Kum 10 hrawng nu pakhat zong aa hliam, tiah theih a si.

Htichaih Peng Ah SAC Ralakp Bomb Puah An Tong, 6 An Thi, 8 Hliam An Tuar, Sagaing ramṭhen, Kata(ကသာ) pengkomh, Htichaih(ထီးချိုင့်) peng Indaungkone(အင်ဒေါင်းကုန်း) in tlhang leiah a kalmi SAC ralkap palwl cu, May 2 ah bomb in kan puahhnawh hna i SAC ralkap 6 an thi, 8 hrawng hliamhma an pu, tiah Eagles Army – HPDF nih cathanh an chuah. SAC ralkap pawl cu Ayechanlwin(အေးချမ်းလွင်) khua in Indaung khua leiah rallam an sial i, Eagles Army – HPDF he sml 3 chung hrawng an i kap, tiah theih a si.

Indaung khua in an chuah lioah bomb lung hnih in voikhat an puahhnawh hna, Kutye(ကိုးတဲ) khua kam ah Eagles Army – HPDF le ṭangrual phu hna nih, an puah ṭhan hna i SAC ralkap 6 an thi colh, 8 hrawng hliamhma an pu, tiah Eagles Army – HPDF nih cathanh an chuah. Cun, Mawleik(မော်လိုက်) peng Panthar(ပန်းသာ) khua um palik sakhan cu, PDF nih May 2 ah an va kah i palik bawi chang telh in 3 an thi i, sakhan chung ummi ralkap le palik tam ngai hliamhma an pu tiah theih a si. the Chin Post