Mipi Ralkap Hna Nih SAC Ralhrang Minung (15) Leng An Thah Hna, An Hriamnam Zong An Lak Chap
Demoso Peng Nihnih Chung Kahdohnak Ah SAC Ralhrang 15 Leng An Thi. Karenni ramkulh, Demoso peng nichuah lei ah SAC ralhrang rallam sial mi cu tualchung hriamtlai phukomh a si mi KA, KNDF/B(10), KNDF/B(15) le KNDF/B(7) hna nih March 29 in 30 ni hnih chung kahdohnak ah ralhrang 15 leng an thah hna.
“Nihnih chung kahdohnak ah SAC ralhrang 15 nak tam kan thah hna pin ah hliam tuar zong an tam, ralhrang sin in meithal MA-1 zun(3), MA-2 zun(2), MA-3 zun (1) le hriamnam zeimaw zat zong kan lak chih”tiah KNDF/B(1) March 31 ni ah thanh ca an chuah.
Ralhrang lei cu raltuknak vanlawng 2 nih a rak chanh hna i voi 10 tluk Bomb a thlak. Cun kahdohnak a um lo nak khuate pakhat sianginn ah bomb voi 2 zong a thlak caah khuami pakhat a a nunnak liam, Daw-ta-ma-kyi tlang cung ah voi 2 a thlak fawn.
Karenni ram chung ah SAC ralhrang he nifatin kahdohnak a um leng mang caah ramchung ramleng um mipi hna nih a kaa kip in nan kan dirkamh rih nak lai zong zaagfah kan in nawl hna tiah thanhca an chuah mi ah aa tel. #KNDF #Lungmili_post
Adang; PDF Sakhan SAC Ralhrang Nih An Luhhnawh Caah PDF 3 Tlaih In An Thah Hna. Sangaing ramthen, Myaung peng, Sagaing PDF-B(1) sakhan cu SAC ralhrang nih an luh hnawh hna, an zam pah ah PDF an hruaitu pakhat telh in minung 3 ralhrang nih tlaih in an thah hna.
March 30 zing suimilam 5 ah SAC ralhrang thazaang 80 leng nih an luh hnawh hna hi a si, “ralhrang hna hi kan i ruah lo nak, kan hnu lei in an rak kan luh hnawh caah a si, kan hruai tu pakhat hi an tlaihnak hmun ah an thah colh i minung pahnih tu hi cu ralphaw ah an hman hna hnu ah lampi ah an thah hna’tiah PDF tuanvo ngei minung pakhat nih a chim.
“A kan hruaitu pa an thah mi ruak hi a ni ah kan vui colh nain a lu cu an rak cik. A thai zing March 31 ah minung 2 ruak le kan hruaitu pa a lu zong khua pakhat pawngah kan lak hna i tha tein kan vui hna. Midang pawl cu a himnak hmun kan phan i hriamnam kan sungh mi zong a um lo”tiah a cunglei upa nih a chim. #MAT #Lungmili_post
