Press "Enter" to skip to content

Mipi Ttelhkhawn A Hmang Mi Hna Cu Kan Chin Ralkap Le Police An Si

A tu ah kan Kawlram sining vialte cu nan theih cio dih cang. Phunghram ning lo pi in Min Aung Hlaing le a hnu zul ralkap pawl nih kan Kawlram uknaak le nawlngeihnaak cu hramhram in an kan chuh. Mipi nih kan thlah duh ve lo I an kan chuh ka in nihin ni tiang mipi nih kan tlaih peng ko rih.

Mipi nih rampi aanaa cu thlah kan duh hrimhrim lo caah a tu nikul deng tiang kan thlah duh lonaak kha Kawlram chung khuazakip ah lung nem thin fual te in kan langh ter cio. A tu ah cun nanmah ralkap le palek pawl nih mipi tu runven le humhim hngin lo te in mi nung tamtuk thisen nan chuah I an nunnaak nan laak cang hna. A tu tiang ah kan CHINMI chung in ralkap le palek a ttuanmi hna zong phung ning lo in mithat le lainawng ah nan I tel dih ve.

Nanmah taktak nih nan kut nan hler lo zong ah uniform nan I hruk paoh le meithal nan I tlaih I ralkap le palek riahnaak umnaak I nan um ve paoh ah cun na lung a tling I naa tel ve tinaak a si. Cu cu upadi a simi Criminal law. Criminal procedure le Evidence law ning bak a si. ( Mah ka timi hi hramhram in Kawlram uknaak aanaa a la mi pa Min Aung Hlaing nih upadi lei ah ruahnaak apeetu dingah aa chiahmi kan Chin miphun thangchiat tertu a si ti in CHIN miphun upa tampi nih an timi pa Dr. Ngun Cung Lian zong nih a hman bak a ti ko lai.

A hman a ti ah cun ka let hlah seh law a hman hrimhrim lo a ti ah cun vun ka let seh law kan I phomh ko lai ka ngamh tuk ).Cu ca ah mah hi dohnaak lam cho kan chuah cun Min Aung Hlaing le a hnu zul ralkap le palek vialte cu nan mah lawng si lo in nan chung le le nan ngeihchiah dihlak vialte tiang in hloh dih nan si te lai. zulh dawi dih nan si te lai.

Na Pastor, na khrihfabu, na innpa le na rualchan hna zong nih nan ruak hmanh an in vui duh te hna lai lo. Nangmah CHIN miphun a si vemi nih na CHIN hawi mipi meithal in ramsa hrang bang van kah ngai cu nan ruah khawh taktak ko maw? Cu ca ah mah hi ka ca kuat nan theih le cangka te hin nan uniform, nan meithal le nan zen thong vialte kal tak law nan chungkhar dihlak he CDM ahrak lut tiah upatnaak he kan sawm hna.

A tu hi a caan dongh lei a si cang I a tu a caan um lio te I nan luh lo ah cun ngaichih naak caan a luan lai I ngaichih vai nan bar dih lawng si lo in nan nunnaak hrim hrim nih a hlawh lai ti kha CHIN miphun in ralkap le palek a ttuanmi hna nan dihlak sin ah ca kan kuat hna. Credit : J. P. Baik Tin Sang ( LL. B )

Be First to Comment

Leave a Reply

Your email address will not be published. Required fields are marked *