Sagaing ramṭhen, Shwebo pengkomh Taze peng i Kanhtooma (ကံထူးမ) palek sakhan cu Feb 9, zinglei ah PDF ṭangrual hna nih an kah i sakhan chungah a ummi ralhrang a tlawmbik 40 an thi tiah Taze People’s Defence Force chungtel pakhat nih a chim.
PDF ralkap pakhat nih cun “Sakhan chungah hin ralhrang 60 hrawng an um i 7 lawng a himmi an si. A dang cu hliam fak ngai an tuar dih. A thimi hi a tlawmbik 40 hrawng cu an si hrimhrim lai. Kahdohnak cu zinglei 4:25am in 5:40am tiang a rau. PDF ṭangrual kan dihlak i bawm in kan kahmi hna a si” tiah a chim.
Kanhtooma sakhan kahnak ah hin Taze PDF Battalion-6/7/8, Minkin PDF battalion-1, Taze People Comrades(TPC), Myanmar Defense Force (Taze Tiger), Phoenix Defence Force -Taze, Dragon Warrior-Taze le Taze Mipi Vengtu Ralkap (တန့်ဆည်မြို့နယ် ပြည်သူ့ကာ ကွယ်ရေးအဖွဲ့) hna an i tel tiah theih a si.
PDF ṭangrual hna lei in minung pahnih nih hliam an tuar nain a fak lo. A dang cu hliamtuar um lo tein hnu kan tolh kho tiah Taze People’s Defence Force nih an cathanh ah an langhter. Ref: Khit Thit Media, The Chin Post
Demoso PDF Nih Meithal An Cawk Tharmi An Langhter! Kahdohnak a zual ngainak Kaya ramkulh Demoso PDF nih mizapi bawmhnak in meithal an cawk tharmi an langhter.
An cawkmi meithal cu RUGER PRECISION RIFLE a si i MMK (Myanmar Kyat) in sing 367 man a si. A kuanfang pakhat man hi MMK 55,000 a si. Hi meithal thar hi DMO-PDF sin a phan cang i kahdohnak ah hman dingin timhcia a si cang tiah an cathanh ah an langhter.
Be First to Comment