Press "Enter" to skip to content

Mirang nu nih:CNLD a tanh nak kong’Video bakin a van chuah cang laimi kan lungfim a hau(+video)

Tutan ka van chiah mi video hi laimi tampi nih kan i fiang awk a si tiah ka ruah’Chim duh mi cu mirang hman nih CNLD an tanh ah cun laimi nih cun kan tanh ve hrimhrim awk a si ko ruah tiah ka ruah’Mirang nu nih a chim ning ah cun I supported CNLD tiah a chim video hi rak zoh ve hman uh a tang hi video asi.

Nizan ka tial cia asi a tang hi:

Zeiruangah dah 2020 US President thimnak ah US biaceih zung sangbik, Supreme Court biaceihtu hi an biapit khun? Zeiruangah khrihfa hna nih President Donald Trump dirpi a herh? timi September thla chuak Muko Mekazin ah ka tial. Mah ka tial lio ah Supreme Court Associate Justice Ruth Bader Ginburg a thih hlan ah ka tialmi a si. Chirhchan tampi he kan tialmi a si caah lungsau tein nan ka rel piak lai zong ka duh. Careltu nan dihlak cungah ka lawm cia cang.

2020 US President Election le US Supreme Court
*************************************************
Biahmaithi
US President thim nak ah thimfung thlatu khrihfa mi hna nih President a cuhmi nih Supreme Court le Federal court ah zeibantuk baiceihtu dah a thim hna lai timi hi biaktak tein an zohmi a si. Biaknak ngei lomi, khrihfa zumhnak he a kalhmi ruahnak ngeimi, Liberal biaceihtu a thim lai maw? Khrihfa tha, zumtu tha, conservative ruahna a ngeimi le US funding father hna nih an serhmi phunghram a zulmi a si lai maw? timi hi US khihfa thimfung thlatu hna nih nih an ngiat bikmi pakhat a si. Tukum 2020 US President thimnak zongah evangelical khrihfa hna nih biapi bik in an zoh dingmi cu khrihfa zumhnak a dripitu le biaknak zalonnak religious freedom a dirpitu hi thimfung an thlak rih lai tiah zumhnak ka ngei.

Supreme Court Umtuning
*************************
Supreme court timi cu US biaceihnak sangbik le a dihdonghnak biakhiak tu an si. Supreme court nih tazacuainak kongah bia an chah cangmi cu President zong nih hnon khawhnak nawl a ngei lo. Supreme court lila lawng nih hnon than khawhnak nawl an ngei. Asiloah congress [ Senate le House ] nih phung an thlen, law amendment tuah hnu lawng ah hnon khawh le remh khawh a si.
Supreme Court ah biaceihtu minung 9 an um. Biaceih bawizik timi, Chief of Justice minung pakhat le a tangah biaceihtu, associate justices timi minung 8 an um. Supreme court ah biaceihbawi thutdan a lawn ahcun President nih a duhmi biaceihtu kha a thim lai I, Senate ah a chuahpi lai. Senate nih biahalnak, hearing an tuah dih hnu ah Senator minung 100 nih thimfung an thlak lai i, Senator minung zatceo nak tam nih duhnak thimfung an thak hnu lawng ah cohlan le fehter a si.

Conservative Biaceihtu le Liberal Biaceihtu
********************************************
Supreme court ah biaceihtu minung 9 an um. Biacehitu minung 9 chung ah minung 5 cu conservative ruahnak lungput a ngeimi an si I, adang 4 cu liberal ruahnak a pommi hna an si. Conservative biaceihbawi hna cu, Republican President hlun, George H.W. Bush nih a thimmi Clarence Thomas , Republican President hlun George W. Bush a thimmi, Samuel Alito le Chief Justice John Roberts. Tulio Republican President Donald Trump thimmi, Neil McGill Gorsuch le Brett Michael Kavanaugh hna an si.
Liberal biaceihbawi hna cu, Democrats President hlun, Bill Clinton nih a rak thimmi, Ruth Bader Ginsburg le Stephen Breyer, Democrats President hlun Barack Obama thimmi, Sonia Sotomayor le Elena Kagan hna an si. President hlun, Gorge W.Bush nih a rak thimmi, chief Justice John Roberts cu nai hrawng biaceihhnak le biachahnak an tuahmi ah liberal lei ah vote a tlak pah lengmang , conservative a si nain a dirhmun a feh lonak tete a um pah lengmang caah conservative pawl an lung a tuai ngai cang hna.
Supreme Court ah thutdan pek cangmi biaceihtu hna cu an chan chung caah a si. Hmailei kum 30 in kum 40 tiang a hmun dingmi biaceihbawi thutdan a si. President nih biaceihtu minung pakhat thim apalh sual ahcun kum 30 in kum 40 tiang mipi nih tuar khawh a si. President Obama chan ah Antonin Scalia cu a thih caah a zaka ah liberal biaceihbawi Merrick Garland cu Obama nih thim ding in Senate ah a chuahpi nain Republican party nih caan karlak senate thimnak ah teinak an co caah majority an si I, an kham khawh caah Obama nih president tuan caan a dongh tiang ah a thim kho thai lo. Khrihfa tampi nih Pathian khuakhannak a si lai tiah an zumh.

President Trump le Conservative Biaceihtu
*******************************************
Donald Trump nih election campaign lio tein President ka tlin ahcun Supreme Court ah zumtu tha, conservative biaceihtu ka chiah lai tiah bia a rak i kam. A biakam bantuk in President Donald Trump nih President thimnak ah teinak a co le cang in Antonio Scalia zaka ah Conservative Judge, Neil Gorsuch a thim. Senate cu Republican party nih an hip cang caah Senator minung 100 nih vote an thlak I, 54-45 in fawi tein an fehter.
Supreme Court i Conservative judge a simi, Anthony kennedy cu conservative ah ruahmi a si nain a dirhmun a thlen lengmang caah zumh awk tlak a rak si lo. Supreme court ah Same Sex Marriage an cohlan khawhnak kha Anthony Kennedy nih Liberal Judge lei ah thimfung a thlak caah, 5-4 in consevative an rak sung i, liberal pawl nih teinak an rak co. Anthony Kennedy cu kum 2018 ah amah duh tein pension ala I a dinh caah a zaka a lawng.
President Donald Trump nih conservative ruahnak a pommi, Brett Michael Kavanaugh cu a thim i, Fehternak tuah dingah Senate ah an chuahpi. Brett Kavanaugh cu democrats pawl nih an huat ngai caah a phunphun in asualnak an kawl. Christine Blasey Ford, Deborah Ramirez le Julie Swetnick timi nu pathum nih sualpi le tlaihrem an puh caah Senate i hearing an tuahnak ah a rak buai ngaingai I caan saupi an rak rau. FBI nih a sualnak an kherhhlai nain a sulanak an hmuh lo caah Senate nih Brett Kavanaugh Nomination tuahmi cu Senator nih vote an thlak I, 51-49 in an cohlan than . A thaizing ah Senate nih vote an thlak than I, 50-48 in an fehter caah conservative pawl le khrihfa pawl cu an ilawm ngaingai.

Supreme Court Buainak
************************
US constitution cu a thuk, a kau, a sangmi a si caah biaceihtu hna nih anmah le duhning le an khuaruahning cio in sullam an laak I biachahnak an tuah. Biaceihtu hna an khuaruahning in federal court le supreme court cu an kalpi. Anmah duhning poah in definition le interpret an tuah tawn caah President a chuakmi hna nih a duhmi policy kal khawhnak caah le a rianhma a kal khawhnak caah a zumh bikmi biaceihtu Judge cu a thim tawn hna. Democrats President an chuahcaan poah ah liberal biaceihtu an thim hna I, Republican President an thim caan poah ah conservative biaceihtu an chiah ve hna.

Supreme court ah social issue a simi, same sex marriage a pommi le pom lomi karlak tazacuainak, nauhrawh le nau thah a pom le pom lomi hna karlak tazacuainak, nule pa sinak thlen a pommi le pom lomi karlak buainak, miphun a khat lomi hna karlak i tazacuainak, biaknak a khat lomi hna karlak tazacuainak a chuah tik ah a donghnak biachahnak an tuahtu cu Supreme court an si. Conservative biaceihtu hna nih conservative pomning in biachahnak an tuah bantuk in Liberal biaceihtu hna zong nih liberal pomning in biachahnak tuah a si ve. . President Donald Trump nih kum 4 hlan ah Supreme court biaceihtu minung 2 le Federal judge timi federal biaceihtu conservative minung 194 rian a pek cang hna Cucaaah Supreme Court I biaceihtu cu President thim tluk tien a biapit khunnak a rak si.
Tulio Supreme court biaceihtu lak ah democrats president nih an rak thimmi biaceihtu pahnih cu an tar ngai cang caah a ra laimi kum 4 chungah hin pension an la lai I, an thutdan a lawng lai tiah zumh a si. Bill Clinton nih a rak thimmi, Ruth Bader Ginsburg cu kum 87 a si cang, cancer zawtnak zong a ngeih caah a ngamdam zong nih tlinh dawh a si ti lo i tuan ah a din lai tiah zumh a si. Bill Clinton thiamthiam nih a rak thimi, Stephen Breyer zong kum 82 a si ve cang caah caan sau tuan khawh dawh a si ti lo. Cucaah tutan US president thimnak hi President thimnak sawsawh si loin Supreme court ah zeibantuk biaceihbawi kan thim lai timi zong zoh chih in thim ding a si caah kum dang President thimnak nakin a biapi khunnak a si.

Biafunnak
**********
Tutan US President thimnak hi President thutdan lawng si loin kum 30 in kum 40 tiang a hmun dingmi Supreme court ah President thimmi nih conservative judge maw a thim lai asiloah liberal judge dah a thim lai? timi hi a biapi tukmi a si. Donald Trump chan chungah hin Supreme court ah minung pa 4 tiang thimnak caan tha a ngei lai tiah zumh a si. Minung pahnih cu a thim cang hna. Tukum thimnak ah teinak a co than ahcun a dang pahnih a thim chap khawh lai tiah zumh a si. Supreme court ah hin Pathian a hngalmi, Pathian a ttihmi, Pathian a bochanmi, khrihfa zumhnak a dirkamhtu conservative a si lai maw? asiloah Pathian a hngal lomi, Pathian a tih lomi, khrihfa a dirkamh lomi Liberal pawl a dirpi tu judge dah an chiah lai timi hi US um Laimi khrihfa hna zong nih biatak tein kan rak I buapi mi a si ve.

US ah hin zumtu le zum lotu hna biaceih zung an phak tik ah zum lotu liberal biaceih bawi hna nih zumtu pawl sungh a pek tawn hna. Cucaah khrihfa hna nih kan zalonnak a hnursuan tiah an zumh. Cucaah tutan President thimnak zongah khrihfa zumtu hna nih cun khrihfa a dirkamhtu le conservative biaceihtu a thimtu ding Donald Trump cu 2016 lio bantuk in thimfung an pek rih hau lai tiah ruah a si.

Be First to Comment

Leave a Reply

Your email address will not be published. Required fields are marked *