Press "Enter" to skip to content

Mizoram Ah Kawlram Mi Bing An Tlaih Than Cang

India ram, Mizoram ramkulh, Aizawl khuapi lei a kal ding motor pakhat cu Khawzawl chek gate ah Mizoram palik nih nizan July 19 ah 252.64 Gram a ritmi Bing kan tlaih, tiah Mizoram palik phu nih cathanh an chuah.

Bing a phortu hna cu Tamu peng Khampat, Michael Tawk Lian Mung(kum30) le Mizoram Zokhawthar khuami Lalchhandama(kum31) an si i, chek gate ah palik nih an tlaih hna. An tlaihmi Bing cu India tangka sing 126, kawlram tangka in sing 3150 man a si, tiah theih a si. Credit: The Chin Post

General Nedar Bo Mya Hruai Mi Ralkap Phu Dirh A Si I, Venom Commando He An I Bawm Lai: General Nedar Mya(နယ်ဒါးမြ) hruaimi ralkap phu “KAWTHOOLEI ARMY”( Karen People’s Army tang um) cu dirh a si i Venom commando hna he i bawm in SAC kan doh lai, tiah Saw Win Myint(စောဝင်းမြင့်) hruaimi Venom Commando nih nihin July 19 ah an thanh.

KAWTHOOLEI ARMY cu General Nedar Mya hruainak in July 17 ahkhan dirh a si. Venom Commando hna he Karen People’s Army tang ah ṭangrual in SAC ralkap hna cu faak ngai in kan doh cang hna lai. Cucaah Karen mizapi nih a kan cohlang ding in thawng kan in thanh hna, tiah an thanh.

Tanintharyi Ramṭhen Ah SAC Ralkap Hriam In Tualchung Mi Pakhat Nunnak A Liam!: Tanintharyi ramṭhen, Palaw peng Ping Ne Taung(ပိန်နဲ) khua ah SAC ralkap kahmi hriamngan kuan a tlak caah mino pakhat cu a nunnak a liam, tiah tualchung mi nih an chim. July 19, zinglei suimilam 1:30 ahkhan Palaw no.285 battalion ummi SAC ralkap nih hriamngan in Ping Ne Taung khua lei cu an kah, tiah theih a si.

Mit hmutu pakhat nih cun, “SAC ralkap hriamngan kahmi cu khuachung i a tlak caah tualchung mi pakhat nunnak a liam i, pakhat zong hliamhma pu, a hliamhma cu a fah ngai caah sizung ah an kalpi” tiah a chim. Hriamngan hliamhnak ruangah nunnak a liammi cu Ko Zin Wai, kum 20 a si, tiah tualchung mi nih cun an chim.

Palaw peng ah tualchung hriamtlai phu hna le SAC ralkap hna cu atu le tu an i kap i, a luancia July 13 ahkhan SAC ralkap le tualchung hriamtlai phu kar kahdohnak ah tualchung hriamtlai phu lei in ralkap 3 an nunnak a rak liam. TCP

Be First to Comment

Leave a Reply

Your email address will not be published.