Kyankhin (ကြံခင်း) peng Akoktaung (အကောက်တောင်) kalnak lam ah nihin April 29 zing Sml 7 ah rianttuan pawl a phurtu mawtaw pakhat chengpalang ah a tla, minung 3 an thi i 8 hliam an tuar tiah theih a si. Chengpalang ah a tla mi mawtaw cu Kyankhin khuapi cement industry ah rianttuan mi minung 11 a phurtu hna light track mawtaw a si tiah kyanmaselo(ကျန်းမာစေလို) mibawmtu phu in rian ngeitu pakhat nih a chim.
” Nu pahnih cu a hmun ah an thi colh, pakhat siizung a phanh hnu ah a thi,” tiah a chim. Hliam a tuar mi hna cu Seih Thar(ဆိပျသာ) siizung in Hinthada(ဟသျာတ) siizung pi ah pa 2, nu 2 le ngakchia 1 kalpi an si i a dang a tang mi 4 cu Seih Thar siizung ah an thlop hna lio a si tiah khuauk bawi he aa neihniam mi pakhat nih a chim.
A thi le hliamtuar mi chungkhar hna cu khua uk bawi nih a peh tlaih hna lio a si tiah theih a si. Mawtaw aa let mi cu Akohtaung(အကောက်တောင်) mipi bawm tu phu, Kyanmaselu(ကျန်းမာစေလို) volunteer group, Shwe Myat Ta(ရွှေမေတ္တာ) mipi bawm tu phu hna i bawm in an zohkhenh hna tiah khua chung mi sin in theih a si. Ayeyawady ramthen, Pathein- Chaung Thar mawtaw lam zong ah March 19 chunhnu ah khan mawtaw an i pah sual caah mawtaw a kang i minung 7 an rak thi bal cang. Crd; The Chin Post
Relchap; India ram chung ah Charity Concert le Refugee min in Fund Kawl nak tuah hi kan ngolh a herh cang tiah Salai Dokhar nih a tarlangh. Cu chung ah a biapi ngai in ngol le tuah ti lo a herhnak tiah a ruah mi zong a langhter chih. “Hi bantuk in nuam tuk in Charity Concert le Refugee min in bawmh halnak kan tuah mi ruang ah, India ram chung ah a um mi Zatlaang bu cheukhat pawl nih, ziah Myanmar ralzam pawl,
Myanmar ram mi pawl hi nan i nuam tuk ko hi ta, duh chung in pei nan i nuamh khawh ko hi’ timi soiselnak a um cang. Cu caah atu bantuk in nuam tuk in Charity Concert hna kan tuah mi nih hin India ramchung ah a um mi Chin Ralzam 50000 hrawng hna i an harsatnak kha nan khuh piak hna, mipi nih an hmu kho ti hna lo” tiah Salai Dokhar nih cun a langhter.
Cu lawng si loin “Atu bantuk in Charity Concert, ti bantuk Refugee min in Fund kawlnak (nuam ngai in caan hmannak in) tuah mi ruang ah, India ram chung Civil Soceity a simi, Refugee a rak dirkamh tu le bawmtu phu a si mi hna zong nih, ziah nan har tung lo, nan i nuam tuk ko hi teh timi ruang ah Refugee caah harsatnak fak a tlung kho mi asi.
Cu caah Refugee caah Fund kawlnak kan tuah lai ti hmanh ah, a thlithup deuh in, India ram mipi, a bik in Zatlangbu cawlcanghnak phu pawl nih an kan theih lo in cawlcangh a herh cang” tiah a langhter fawn. Cun a biapi ngai in a langhter rih mi cu “India ram chung (Delhi) ah Charirty Concert le Refugee caah bawmh halnak program ngan pakhat khat kan tuah tik paoh ah, India Cozah lei in hlathlaitu (Spy) an rak thlah peng timi zong hi philh hlah usih, thei usih”
Cu caah a zei a si hmanh ah, Charity Concert ti bantuk hrimhrim cu tuah ti hlah usih, India ram chung ah hi bantuk lamnak le nuamnak in phaisa kawlnak hi cu ngol cang usih, tuah hrimhrim ti hlah usih’ tiah Salai Dokhar nih cun fak ngai in a langhter hi asi. Crd; Salai Dokhar
Be First to Comment