Myanmar Le India Ramri Thah Lainawng Nak Kong Ah CDF-Zophei Nih Cathanh An Chuah

India-Myanmar Ramri Ah A Cangmi Mithah Lainawnnak Kong He Pehtlai In CDF – Zophei Nih Cathanh Chuah. India-Myanmar ramri Ngalang khua pawng a cangmi mithah lainawnnak kong he pehtlai in Chinland Defence Force – Zophei nih a tanglei bantukin cathanh an chuah.

2023 March 21 ah India-Myanmar ramri Zophei hmunram Ngalang khua le Mizoram Ainak khua ramri ah a cangmi mithah lainawnnak kong ah CDF – Zophei zong kan lung a ṭha lo. Hi thil cangmi kong ah fak piin kan doh. Tantakmi chungkhar hawikom nan ngaihchiatnak vialte i hrawm in kan in tuarpi hna.

Hi thilcang kong he pehtlai in CDF – Mindat nih cathanh a chuahning ah Magway ramṭhen, Pakokku pengkomh Myaing peng in Ko Jack le Mindat peng in hriamthil puaisa a tuahtu Salai Aung Ling hna cu pehtlaihnak an ngei tiah fiang tein kan theih. Kan hmunhma chung ah tuksapur sualnak a tuahtu hna cu tlaih in upadi he aa tlak in hmalaknak tuah an si lai.

Kanmah CDF-Zophei zong nih thahnawnnak a cannak hmunhma le a pawngkam hrawng ah kal in chekhlatnak kan tuah, leilawng pakhat cu Ngalang khua ramri Bawinu tiva kalnak lamthlang ah kan hmuh. Leilawng hi tutan thilcang kong he pehtlaihnak a ngeimi a si ahcun a ngeitu sin ah pek ṭhan ding in timhtuahnak kan ngei.

Atu bantuk ngaihchiat lungfahnak hmailei ah kan ton ti nakhnga lo mizapi hmanmi lampi cu kaphnih i pehtlaihnak a ṭhatnak hnga ding caah, tualchung biaknak lei phu le Humanitarian Organization phufonh nih kan zohkhenh lai tiah CDF-Zophei nih March 31 ah cathanh a chuah. Crd; The Chin Post

Pindaw Oo Le Nansaungpu Khua Kar Ah Kahdohnak Fak Ngai In A Chuak, Tualchung Mi Dihlak Ngawt In Ral An Hrial. Sagaing ramṭhen, Kalaymyo nitlak chaklei Pindaw Oo le Nansaungpu(နန်းဆောင်းပု) khua kar nihin March 31, zinglei ah tualchung hriamtlai phu le SAC ralkap kar fak ngai in kahdohnak a chuak tiah theih a si.

Tutan kahdoh a chuahnak hmunhma hi Kalay-Tamu Asia lampi le Kalay-Yazagyo leilawng lampi ah kaphnih kar kahdohnak a chuak.

Nihin, March 31 zinglei suimilam 8:00AM hrawng in SAC ralkap nih hriamngan an thlah hnu ah Nansaungpu khua le Pindaw Oo khua kar ah SAC ralkap le CNA, CDF KKG, CDM Siyin, KRF, CNDF tiin tualchung hriamtlai phufonh kar kahdohnak a chuak tiah theih a si.

Nihin March ni 31 zanlei suimilam 4:00PM hrawng ah SAC ralkap Mi 35 raltuknak Helicopter in bomb zong a thlak tiah theih a si. Hliamtuar le nunnak liammi kong ah biafiang theih a si rih lo. Kaphnih kar kahdohnak ruang le SAC ralkap lei nih vanlei kahdohnak an tuah ruang ah hriamngan an hman ruang ah tualchung mi dihlak ngawt ral an hrial tiah theih a si.

Pindaw Oo khua hi Kalaymyo he meng 12 hrawng aa hlatnak ah a ummi khua pakhat a si i, Chin miphun tampi an umnak, inn 800 tluk khuasaknak khua ngan pakhat a si.

Atu tiang ah Pindaw Oo, Letpanchaung, Myaukchawtaw, Chaintakyi khua in tualchung mi hna cu Kalaymyo/ Tahan le a him deuhnak hmunhma ah ral an hrial cio hna tiah theih a si. TCP