Press "Enter" to skip to content

Min Aung Hlaing Nih Myanmar Mipi Phaisa Ningcang Lo In A Hman Dih

Uknak chut tu le mipi a kan that cuahmah tu Lainawng pa Min Aung Hlaing hruaimi phu nih Kawlram mipi nih Covid-19 zawtnak in kan luat khawhnak ding caah International Monetary Fund (IMF) nih bawmhnak a pekmi phaisa $372 millions cu mipi caah hmang loin le hmannak cazin zei hmanh langhter khawhmi um lo bak in an hloh thlau viar tiah IMF in biachimnak nawl nei tu simi Gerry Rice nih nizan November ni 3, kum 2021 ah khan a chim.

Min Aung Hlaing te phu nih uknak an laak ni, a luan ciami February ni 1, kum 2021 hlaan deuh ah khan Myanmar ram chung Coronavirus dohnak ding caah tiah IMF nih hin bawmhnak phaisa $372 millions bak an rak pek, a si nain thla 8 a hung rauh hnu zongah mah phaisa cu cazin langhternak zei hmanh um loin a tlau tiah IMF lei nih cun an chim chap.

Ralhraang pawl nih IMF bawmhnak pekmi phaisa hi kan i timh ning bantuk in an hmang maw hmang lo timi zong theih khawh si ri lo, IMF nih hin a luan ciami kum 2020 June thla ah khan Covid dohnak caah tiin a voikhatnak bawmhnak phaisa $365 millions kan rak pek hna, mah kan rak pek hnami cu NLD cozah nih an hmannak, an hman ning vialte cu onine cung in tuahmi meeting ah an langhter dih bantuk in lungtlinnak kan rak nei.

IMF nih hin Myanmar ram Covid dohnak ding caah a pekmi dihlak hi $728 millions leng si cang i mah bawmhnak phaisa pekmi cu a hlaan kan tein rak timh bantuk in IMF nih a neihmi phung le phai ning tein kum 10 chungah cham tthan ding a si, a si nain ralhraang nih uknak an laak hnu in IMF bawmhnak phaisa pekmi an hmannak cazin an langhter kho ti lo.

NLD cozah nih cun IMF nih bawmhnak pekmi phaisa hmang in kut hruk, Mask le thlobolnak caah herhmi sii le thilri dang dang cawknak caah an hman bantuk in an hmannak zong an rak langhter khawh dih, a si nain ralhraang nih cun an hmannak cazin langhter loin a tlau bak in an tlau ter.

Uknak an laak ka te ah khan thanhca an rak chuahmi chungah rampi cozah nih neihmi Myanma Economic Bank in Kyat 30 Trillions (mah lio caan ah $22 millions) cu Covid Vaccince cawknak ding caah tiah an rak langhter nain a taangmi cu zei hmanh langhter a um ti lo ruangah uknak la tu ralhraang pawl nih ramdang bawmhnak phaisa hi ningcang loin an hmannak a lang thluahmah.

A luan ciami kum 2009 lio ah John Hopkins University nih hlathlainak an tuahmi cazin ning ah cun Nargis thlichia a tuar tu Myanmar ram mipi caah ramdang lei nih bawmhnak pekmi phaisa vialte zong ralhraang nih an laak dih hnu ah mipi sin ah a zuar bak in an zuar tthan ti si.

UK launches booster dose trial of seven Covid-19 vaccines

Cun Myanmar ram chung i Covid-19 zawtnak a linhsat lio, a luan ciami October ni 17 tiang ah khan Myanmar ram chungah milun 53 millions lak in 8.5% lawng nih Covid-19 Vaccince an i chun, Russia le Tuluk bawmhnak in ram chungah Covid Vaccince ser chuah ding in timhlamhnak an neih lio ah Tuluk sin in Covid Vaccince 24 millions a cawk tthan.

IMF nih Covid pulrai dohnak ding caah tiin Myanmar ram mipi caah bawmhnak a pekmi phaisa cu ralhraang pawl nih an thlau dih nain lainawng pa Min Aung Hlaing nih cun ramdang sin ah Covid Vaccince bawmhnak a hal thluahmah rih ko. Hi bantuk in ralhraang nih an tuahmi ruangah IMF nih ralhraang pawl he pehtlaihnak a tuah ti lo bantuk in $700 man simi IMF Special Drawing Rights (SDRs) zong an phih piak hna.

Be First to Comment

Leave a Reply

Your email address will not be published.