Press "Enter" to skip to content

New York Times Nih Trump China Ah A Riantuannak A Phuan Viar Hoi! (Adong tiang na rel ahcun nai chir lai lo)

“Biden hi China he a tangti mi a si,” tiin Trump nih a chim zungzal nain, a taktak ah cun, amah tu hi China he pehtlaihnak a rak ngeimi a si ziar kha a tax record nih a langhter. Tuan i min langhter lo in bank account a tuahmi zong ai tel rih, ti a si. China cungah Biden hi ai neemtertuk, cun a fapa zong hi China he riantuantinak an ngei, tiin Trump le a riantuanhawi pawl nih Biden a sual an kawl zungzal.

“Biden fapa Hunter hi vawleicung ramkip ah ramdang cozah le pumpaak minung tam taktak he pehtlaihnak a ngeimi a si i, cu hna lakah cun Chinese businessman he zong i hrawm in bank account an tuahti,” tiah Senate Republicans nih report an tuah.

Asinain, Trump a business tuanbia zoh tikah, amah tu hi ramdang he chawva lei in deal (lungtlinnak) a tuahtu a si i, cu hna lakah cun China zong hi ai tel ve. China ah projects dirh tiim in kum 10 chung ai zuam bal ko nain, a hlawh a tling lo. President ai cuh hmasabik lio ah khan China ah office pakhat ai ngeih i, China cozah nih a ukmi company ngan taktak he pehtlaihnak ngeih kho dingin heh tiah ai zuam.

“Chawlehnak ca i Trump nih a pehtlaihmi ram i 3 an si i, China, Britain le Ireland hi an si. Cu ram pawl ah cun Trump nih ai sermi bank account pawl hi tutiang ai ngeih ko rih hna,” tiah a tax record a zohfelnak capaar (analysis) nih a langhter. Cu an langhtermi capaar cu The NY Times nih a vun i laakchin ve hi a si. Trump nih mipi sin i a chawva cazin kong a langhter lio ah hin ramdang i bank account a ngeihmi kong hi a langhter hna lo. A ngaite ti ah cun, cu ti a langhter lio ahcun a pumpaak chawva ngeihmi vialte hi a langhter awk a si, zeicahtiah hi vialte hi company dang he pehtlaihnak an tuahmi min tangah tuahmi dih an si. A phaisa pawl hi credit in maw a chiah, asiloah zeibantuk identity in dah a chiah hna, ti hi a fiang fawn lo.

Chinese account ai tuahmi cu Trump Internatioal Hotels Managment L.L.C. nih a control mi a si i, China cozah sin i a pekmi tax hi $188,561 a si, tiah a tax record nih a langhter. Tax a pek lio ah 2013 in 2015 karlak hrawnghrang i licensing deal tuah ai zuam lio ah a si.

Ramdang i an riantuannak hmangin an hmuhmi income vialte langhter dih dingin Internal Revenue Service nih a hal ko nain, ramdang ah ai sermi bank account hmangin zeizah dah phaisa a luhchuahter, timi hi tutan a tax record ah ai tel lo. British le Irish ah ai tuahmi bank account pawl hi cu Scotland le Ireland ah Trump nih golf tuknak kuun a tawlreltu company nih an tlaih i, cu ka ram in gold in an hmuhmi phaisa hi kum khat ah million tam taktak a si zungzal, tiah cu a company pawl nih cun report an pek tawn. Trump International Hotels Management nih China i a chawva lutmi report a pekmi belte hi cu a thong a sang vial lawng a si.

“US ah office tampi ai ngeihmi Chinese bank pakhat ah Trump a company pakhat nih bank account ai ser i, China ah business tuah a duh ve caah, anmah China tu ah tax a pek. Asia ah hotel deals tuah khawhnak lam a um hnga maw, tiin ngiatthlainak tuah a duh caah China ah office pakhat a dirh. Cu ti office a dirh hnu cun bank account a ser hi a si,” tiah Trump Organization ca i sihni an hmanmi Alan Garten nih The Times biahalnak cu a leh hna.

“2015 tein khan China i office kan onmi cu kan dinhter cang. Cuhlan hrimhrim zong in hi office hmangin zeibantuk deal hmanh siseh, cun phaisa kuatnak siseh, cun a dangdang chawlehnak he ai pehtlaimi cawlcanghnak hi pakhat hmanh kan tuahmi a um lo. Bank account belte cu kan on (open) peng ko rih nain, zeidang kongah kan hmang hrimhrim bal lo,” tiin Garten nih a chim.

China i bank account an tuahnak bank a min belte cu Garten nih a langhter duh lo. Ni kum ah khan China cozah nih a control mi bank vialte lakah a nganbikmi nih Trump Tower ah dot 3 ning bak in an vun hlaan colh. President nih China thang a chiat len lio i a tu bantuk i a Tower ah China bank hmunhma a pekmi cungah thangchiat le soisel a tong ngaingai.

2020 presidential campaign zongah hin China kong hi biasu pakhat a si peng rih. President nih China he trade war a tuahmi le pulrai ai thawhkehnak ram a simi kong cu ceihcum peng a si ko rih. “Biden hi China a uifate a si. China a thawn chinchin mi hi vice president dirhmun in a ralrin awk hmanh ah a thei kho ti lo, tiin Trump a campaign nih Biden cu an camchiat. “Biden office a thut lio ah, a fapa Hunter Biden nih ramdang he chawlehnak a tuah,” tiin Trump nih Biden thilh duh ah bia a kawl zungzal.

“Hunter Biden hi hmunphiah he ai lo – a pa kiangkap a tla mi hnawmtaam pawl thenhpiak dingin a hnung a zuldawitu a si. Zeitluk vanciat dah a si. Misual chungkhar bak an si” tiin Trump nih an thang a chiat hna.

A fapa Donald Trump Jr. le a sihni Rudolph W. Giuliani hei ti bantuk a minung pawl nih a si lo le si lo pi in bia an ronh caah, Trump nih Hunter Biden hi ti taitai in a thang a chiat hi a si khun. “2013 lio i a pa Biden China lei offcial trip a kal lio ah khan Hunter nih a zulh ve i, a kir lei ah cun $1.5 billion he inn a phaan” tiin Trump nih a chim. “Asinain, a ngaingai ti ah cun, hi phaisa tom hi Biden nih office a chuahtaak hnu i a fapa Hunter nih 10% stake a chiahnak investment firm nih fund-raising an tuahmi ca i an hmuhmi phaisa a si,” tiah news article tampi le fack-checking tampi nih an langhter.

An Firm hi China cozah nih a control mi state bank ngan pakhat nih chawva in a dirkamh mi a si. Asinain, fund-raising an tuahmi a tlam a tlin le tlin lo belte fiangin theih a si lo. Cun, amah Hunter nih a pumpaak caah zeizat dah a tinco, timi a fiang fawn lo.

Biden belte nih cun lungtho tein a income tax returns cazin a langhter i, pumpaak in China he business a tuanti nak kong pakhat hmanh a um lo. Amah Trump belte hi China ah caan saupi chung business a tuah cangmi American company tampi he riantuantu ai tim, timi tehte fiangpup in a um – cu tehte hna cu tutan a Trump siseh, cun a company hna an tax record an langhtermi nih hin fiangtein an langhter.

Russia khualipi Moscow belte ah cun hotel le tower (innsaang pipi saknak) project tuah ai tim nain a hlawhtling lo i, China tu ah licensing deal tuah khawh dingin caan saupi thazaang a chuah cang. Cu ti thazaang chuah hram ai thok hi 2006 lio tein khan a si cang i, cu kum ah cun Hong Kong le China ah chawlehnak tuah dingin sohluah a rak tial bal. President a si le cangka Chinese cozah sinin cohlannak (approval) tampi a sin a phan than. A fanu Ivanka Trump zong cu White House staff ah ai tel khawh hnu khan cun a pumpaak business caah China lei in chawleh onhnak tampi ai hmuh ve.
2008 ah Trump nih Guangzhou, China, ah office tower project thok ai tim nain a tlaam a tlinh kho taktak lo. Asinain, cu ti thazaang a chuahmi cu 2012 ah a tlam a hung tling kho i, Shanghai ah office pakhat a dirh i, China he pehtlaihnak a ngeimi Trump a company – THC China Development L.L.C. – nih a tax pekmi zat cu $84,000 tiangin an thumhpiak. Travel cost, legal fees le office hmanmi caah, tiin an thumhpiakmi a si, tiah tutan a tax record nih a langhter.

China ah Trump nih a company flag thatein a thlai khawh hnu in cun, State Grid Corporation ah rian a tuanmi hawi pakhat ai hmuh. Hi Corporation hi China cozah nih a control mi lakah a nganbik pawl ah ai tel ve. Hi partnership chungah hin licening le Beijing khua thanchoternak rian management tuahnak ai tel ding khi a si. US president i cuh dingin timhlamhnak ai ngeih lai temman tiang in hi partnership hi a sok peng ko rih. Asinain, China cozah nih State Grid i eihmuarnak a tuahmi an paoh caah Trump nih a chuahtaak diam hna.

China i business thok dingah Trump nih phaisa zeizat dah a hman, timi hi tutan a tax record ningin cun theih khawh a har ngaingai. China ah projects dirh a duh caah, company hmatete 5 ah $192,000 hrawnghrang invest a tuah, timi belte cu a tax record nih a langhter ko. 2010 lio i cu company 5 nih an hmanmi phaisa hi a tlawmbik $97,400 hrawnghrang a si i, cu chungah cun tax le accounting fees an pekmi pawl zong ai tel dih, ti a si.

Asinain, Trump nih China ah chawlehnak tuah ai timh taktakmi hi cu Trump International Hotels Managment hi a si i, hi min in hin Chinese bank account zong cu ai tuahmi a si. Hi company nih hin THC China Development i ownership hi ai ngeih pinah, vawlei pumpi i Trump nih ai ngeihmi inn le lo vialte management tuahnak zongah ai tel ve thiamthiam. Cu tikah, a tax record lawng zoh chom in cun, China he pehtlaihnak a ngeimi Trump company pawl an chawva luhchuah, tawlrelnak hi theih awk a tha hrimhrim lo. Kum khat a hmuhmi income a zat le zuhpiak awk a thami a dangdang a phaisa hmannak tete a langhter tikah hin dollar million tlawmte lawng a langhter tawn.
2017 ah khan cuhlannak in tam ngaiin a income a langhter – $17.5 million a si i, cuhlan kum 5 chung a income vialte fonhmi nakin a tamdeuh. Cu kum lila ah cun a company nih ai ngeihmi a nganbikmi a account hmangin $15.1 millon bak a zuh/ chuah than.

Cu kum i mipi sin i a chawva cazin a langhtermi ah a income a langhtermi hi a tam ngamsam i, “hi pawl hi management fees le a dang contract payments in ka hmuhmi an si” tiin a chim. 2017 lio i New York ah a ummi SoHo hotel he management contract an tuahmi in a hmuhmi phaisa hi $6 million hrawnghrang a si, tiah Bloomberg nih a chim.

Bloomberg nih a chimmi phaisazat kongah a sihni Mr Garten nih zei bia a chim lem lo. Asinain, “hi contract kan tuahmi ruangah kan company income tampi ai chap. Cun a tangmi kan income pawl zong hi China he pehtlaihnak pakhat hmanh an ngei lo” tiin Garten nih a chim.

China a lenglei tu ah hin ramdang ah hmunhma a khuarmi anmah China mirum chawlet pawl he tu hin Trump hi a riantuan a hlawhtlinter khawh deuh. Las Vegas le Vancouver, British Columbia i a hotel le towers pawl nih hin real estate invest a tuahtu Chinese pawl an lung a laak khawh ngaingai hna i, Chinese tampi nih an cawk i, voikhat le bang cu Federal Bureau of Investigation sin tiangin a thawngpang a thang.

2016 presidential campaign lio ahkhan, Vancouver ah a ummi Chinese nuva hna nih an control mi phaisa kuatnak company nih Trump le casino ah minthang a si mi Phil Ruffin he i hrawm in an ngeihmi Las Vegas tower i unit 11 cu in $3.1 million in an cawk. “F.B.I agents nih an kal len i, ka i cawknak kongkau he pehtlaiin bia an kal hal. Keimah theih lo in Trump company nih ka office address cu FBI an rak chimh. Ka address an chimh hna ruangah a tu bantukin in biahalnak an ka tuah hi a rak si, tiin Las Vegas ah hmunhma a khuarmi phaisa kuatnak lei company ngeitu nih a chim.
Hi kongah FBI hi kan tong bal hrimhrim hna lo, cucaah biahalnak le hlathlainak a cung i an tuahmi hi a ruah awk zong kan theih bak lo mi a si, tiin Mr Garten nih a chim.

2016 lio i Vancouver ah a ummi Trump hotel le tower ah unit tampi a cawtu Chinese mirum tampi hna cu an project hmangin an licensing fee hi $5.8 million tiang in an karsoter khawh, tiah tax record nih a langhter. Hi project hi Canada ah hram a thlami company nih a dirhmi a si i, cu company cu Malaysia mirumbik Tony Tiah Thee Kian chungkhar ta a si. Kian hi China le ka dangdang ah hotel tampi a ngeitu a si. Vancouver i an riantuannak nih ai tinhbik mi cu Ivanka Trump runven a hauhmi kong i counterintelligence tuah an duh caah a si, tiin 2018 ah khan CNN nih thawng a thanh.

2016 i buan a co tlawmpal lawng a rauh ah khin, Manhattan i inn tampi ka ngeihmi lakah a tangnungbik (mengithat) a inndot cu Chinese-American business nu Xiao Yan Chen sinah $15.8 million in ka zuar, tiah Trump nih a chim. Puaisa khah tel lo tein, Ivanka Trump le a vapa Jared Kushner nih an i ngeihmi unit a chawtu zong a si. Ms Chen hi international consulting company a ngeitu a si i, China cozah le politic lei milianngan pawl he naihniamtein pehtlaihnak a ngeimi zong a si.

2017 i president a tuan kum a kum khat nak i a tangnungbik a inndot a zuarmi chungin a miak a hmuhmi hi a tlawmbik $5.6 million hrawng a si, tiah a tax record nih a langhter. Source: New York Times. Chelsea Bawi

Be First to Comment

Leave a Reply

Your email address will not be published. Required fields are marked *