Ngeihchia A Si Ka Celh bak Lo || Nulepa Lo kal kar ah An Unau (3) Tein Lente An i Celh nak ah Thingkuang Chung ah Tawpit In An Nunnak A Liam
မော်လမြိုင်ကျွန်းမြို့ (Mawlamyinegyun), ဖိုးခမှီဒေါင့် khua i a um mi hngakchia unau pathum cu an unau thum tein lente an i celhnak ah thingkuang chung ah an thi .Hi hna unau pathum hi an nulepa lo ah an kal i an mah unauthum tein lente an rak i celh tawn . Nikhat cu an nulepa lo an kal kar ah cun nidang bantuk cun an unau thum te cun lente an i celh than hna thingkuang chung ah an lut an chuak i cuti cun nuam ngai cun an i tuai hna .
Cuti cun vanchiat ah thingkuang chung ah an unauthum tein an lut lio ah a lenglei in thingkuang tawhhrenh nak cu a tla i a mah tein ai hrenh ruang ah lenglei in onh piak tu an um ti lo caah an thawpit i thingkuang chung te ah cun an unauthum tein an nunnak a liam ruangmang .a thimi hna unaupathum i an nulepa hi nichiar te zinglei suimilam 5 in lo ah an nupa in an kal tawn i chun suimilam 10 hrawng ah inn ah an rak tlung than tawn .
Inn an rak tlun tik ah cun an fale an hmu ti hna lo i thingkuang chung an zoh tik ah cun an unauthum tein an rak thi cang ngeihchia a si ning hi ruah hmanh ah celh ding a si hrim lo . Thingkuang tawhhren a lenglei in a tla i ai hrenh sual ruang ah a thimi an si i an unauthum tein an hmur zong a rak duk dih ti a si . A ran nak in sizung ah an tlikpi hna nain doctor te nih an nunnak a um ti lo an rak ti hna i ngeihchia ngai in innlei tu ah an fale ruak pathum cu an nupa in an i kirpi than .
A thimi unau pathum hna an min cu kum 8 le kum 6 mi pa pahnih an si i kum 1 le thla 8 mi nu a si .Anmah chungkhar hi minung 6 an si i anmah unau lak i upa bik hi kum 15 asi cang , vanchiat an ton ni ah hin lo ah a nulepa a zul ve hna i a naule pathum tu hi inn ah an kaltaak hna .Hi thihnak kong he pehtlai in Mawlamyinegyun palik pawl nih hlathlai nak zong tha tein an tuah i thawpit ruang ah a thimi an si ko tiah fehter nak an tuah .a thimi unau pathum cu sizung in lawipi an si hnu ah an mah phunglam ning tein vuinak an ngeih hna. Credit : Duwun
