Nihin Champhai Ah Laipa Nih A Nupi Tthing Pi Siang Nun Par A Thah
Mizoram Ah Laipa Nih A Nupi Țhing Meithal In Thilak A Kah. Central Lairam, Lawngtlai, 2023 Nohawng 15 : Mizoram, Champhai khua ah Laipa Pu Bawi Ro Piang nih a nupi țhing Pi Siang Nun Par kum 46 cu nihin Nohawng 15 zaanlei suimilaam 6:45 hrawng ah meithal in thilak a kah.
An nih chungkhar hi Mizoram Champhai ah an umnak kum caan sau pah cang, a pasal hi rithaisii ruangah tlaihkhih a tongmi a si i, thonginn in a chuahnak zong a sau rih lo.
Pu Bawi Ro Piang hi leileng in a nupi țhing inn ah kal riangmang in biaalnak tuah in meithal in a paw ah a kah hnuah leileng in a zaam, Pu Bawi Ro Piang hi East Lairam, Falam peng Wabulah khua pawng Zalang khuami a si. Nikum zong ah Pu Bawi Ro Piang nih hin Siang Nun Par hi thah a rak timh bal cang. Credit_The Lairam Times
KNU Hmunhma SAC Nih Thla Khat Chung Ah Vanral Dohnak Voi 60 Hrawng A Tuah, KNU hmunhma January thla chung ah SAC ralkap nih vanlawng le hriamngan hmang in kahdohnak a tuah ruang ah kum 2 tluk ngakchia 1, Pastor 1 le RC Saya 1 telh in tualchung mi 13 an nunnak a liam tiah KNU nih February ni 14 ah cathanh a chuah.
SAC ralkap nih Jet Fighter le Helicopter hmang in KNU brigade 5, Karen ramkulh Hpapon pengkomh le brigade 6 Kawkareik, Kyainnsaitkyi, Myawaddy pengkomh chung January thla ah vanral dohnak voi 57 a tuah tiah an langhter.
Vanral dohnak a tuah ruangah siangniamruun, sianglairuun, mipi siizung, phungki sianginn, RC biakinn pakhat le Baptist biakinn 3 an rawk i tualchung mi hna umnak inn 57 hrawng bomb ci nih a hrawh tiah theih a si.
Cu ka hmunhma cu SAC caah a biapitnak hmunhma a si caah fak deuh in le tam deuh in cawlcanghnak an tuah hi a si tiah KNU in Padoe Saw Tawni nih a chim.
SAC nih vanral dohnak caah bomb lung 208 a hman, vanlawng ah hmanhmi meithal hmang in voi 30,000 hrawng kahdohnak a tuah tiah KNU nih a thanhmi ah a langhter chih.
January thla khat chung KNU hmunhma ah kahdohnak voi 436 a chuak, cu kahdohnak ah cun SAC rallap le BGF in minung 469 an thi tiah KNU nih a thanhmi ah a langhter.
SAC nih uknak a laak kum 2 chungah KNU le ṭangṭi phu chung in minung 24 an nunnak a liam, 79 nih hliamhma an tuar.
KNU hmunhma SAC nih uknak a laak hnu kahdohnak ruang ah ralhrial dirhmun a phanmi sing 4 hrawng an si tiah KNU nih an cathanh chuahmi ah a langhter. RFA
Nihnih Chung Ah SAC Ralkap Doh Kan Timhnak Hmun 19 Kan Doh Khawh, SAC Ralkap 31 An Thi – NUG, Magway vanlawng umnak headquarters telh in Magway ramṭhen chung doh kan timhnak hmun 19 cu NUG Ministry of Defence he pehtlaihnak a ngeimi phu hna le PDF nih doh an si, SAC ralkap 31 an thi tiah NUG Ministry of Defence nih cathanh a chuah.
February ni 8 le ni 9 ah Magway ramṭhen chung Tayat, Magway, Salin, Saitphyu, Poah, Yesagyo, Saw, Htilin le Gangaw peng doh kan timhnak hmun ah a ummi SAC ralkap hna cu kahdoh an ton ruang ah 31 an thi, hliamtuar an tam tiah an langhter.
Cu an dohnak hmun hna cu runvennak thilri serchuahnak sehzung, palik sakhan, pyusawhti umnak sakhan, vanlawng umnak headquarters le pengkulh khuabawi zung hna an si, cu chung ah leilawng, hriamthil le kuanfang, raltuknak caah hmanmi thilri zong kan laak khawh tiah an langhter chih.
SAC ralkap le an kuttang a ummi pyusawhti dohnak ah tualchung hriamtlai phu lei aa hliammi zong an um ve tiah NUG Ministry of Defence nih February ni 14 ah a langhter.
BVJ
