Karen ramkulh, Laykekaw ah nihin April 19 zing Sml 11:00 hrawng ah kahdohnak a chuak i Cobra (KNLA phufonh) hriamngan kah mi nih SAC ralkap an khen hna i 5 an thi tiah theih a si. Zinglei ah SAC ralkap lei nih sniper in Cobra phu hna cu a thithup in an kan kah ko hna nain hliamtuar kan um lo, Hriamngan in kan kah than ve hna tiah Cobra nih thawng an thanh.
Nizaan April 18 zaan Sml 11 hrawng ah khan SAC ralkap nih Swedaw(စွယ်တော်) le Kyatkin(ကဿ်ကင်) an ummnak tlangbo (sakhan) Laykawkaw hmunhma ah hriamngan in an kah. Nihin April 19 zingka Sml 6:30 ah ATR 42 mingai tu vanlawng in voi 7 hlathlainak a tuah/ hel hna tiah Cobra nih an chim.
Kinmah Khua SAC Ralkap Hriamngan In An Kah Mipi Inn 19 An Khangh, Pauk peng, Kinmah(ကင်မ) khua cu April 18 ah SAC ralkap nih hriamngan in an kah i inn 19 a ciam tiah Pauk peng thlanglei pyohcia phu sin in theih a si. SAC ralkap nih Kyauk Oo(ကျောက်အိုး) khua an khangh i an kir lei ah Kinmah khua chung ah an lut i hriamngan in an kah hi a si tiah theih a si.
Cun Karen ramkulh, Hpa- An( ဘားအံ) peng, Hpa – An – Thaton mawtaw lampi, Warboo ramlak lamthen um SAC ralkap umhmun khuarnak chek gate cu nihin April 19 zinglei Sml 8:00 hrawng ah kah an tong i SAC ralkap 5 hrawng an thi kho tiah tualchung mi hna sin in theih a si. ” Hpa – An – Thaton mawtaw lampi cung um mi Warboo gate cu zinglei Sml 8:00 hrawngah an rak kah.
Cu gate ah cun SAC ralkap 8 hrawng an um i minung 5 hrawng cu an thi lai, Minung 3 cu an zaam manh, Zei bantuk hriamtlai phu nih an kah hna ti theih a si lo, Dooyin Seik ( ဒူးရင်းဆိပ်)lei ah a um mi palik le SAC ralkap hna an rak phan cang ” tiah khuami pakhat nih Yangon khitthit ah a chim. Kah an tonnak hmun cu KNU Brigade 1 hmunhma ah a um mi a si i Hpa – An in Kahmah Muang ( ကမမောင်း), Phapon ( ဖာပွန်) hna tlunkal nak lampi asi.
”Kyauk Oo khua in a kir mi uico ralkap hna nih April 18 chun Sml 12 tluk ah Kinmah khua cu hriamngan in an kah i khuachung ah an rak lut, mipi inn 19 an khangh i a ciam. Khuami 4 an tlaih hna i pahnih cu an kal pi hna,” tiah tualchung mi pakhat nih a chim. Cu SAC ralkap hna nih Pauk peng Kinmah khua an khangh nak hi a voi 3 nak a si i inn 400 leng a ciam cang tiah theih a si. the Chin Post
Be First to Comment