Nikhat chung kahdohnak ah ralhrang 32 an thi i PDF 3 an nunnak a liam ve

Myanmar ram pumpi dohthennak tuah a si hnu nizaan March 2, nikhat chung kahdohnak ah ralhrang 32 an thi i PDF 3 an nunnak a liam, tiah Yangon Khat Tit nih cazin a langhter ning in theih a si. Cazin ning ah ralhrang lei a thi mi hi Kayin ramkulh Lay Ka Kaw/ Phalugyi ah 5, Mandalay ramṭhen Minchian peng ah 19, Sagaing ramṭhen Tanhse ah 3 le Depeyin ah 5, an dihlak 32 an si i, PDF lei in bomb i lam sual ruang ah Taningtari Palaw ah 2 le Minchian ah 1 an dih lak 3 an nunnak a liam ve. Credit: The Chin Post

Ayeyawady ramṭhen, ChaungTa (ချောင်းသာ)peng ah ralhrang thawngpetu tiah theih mi minung pahnih cu February thla zarh dongh lei ah an kah hna i an thi, tiah Pathein Western Defence Force (PWDF) in rianngeitu pakhat nih a chim.

February 21 ah khan ChaungTa peng, Kangyi(ကံကြီး) khua ah ralhrang thawngpetu tiah a minthang mi Tan U(သန်းဉီး) cu meithal in an kah. Cun, February 27 ah Aungkaung(အောင်ကောင်း) khua ah pyosawthi training ni 5 a kai dih hnu ah a rak kir mi Tin Win(တင်ဝင်း) cu meithal in an kah ve, tiah PWDF in rianngeitu pakhat nih a chim.

Cu ralhrang sin thawngpetu pahnih cu alliance force a si mi Pathein Western Defence Force(PWDF), Beach Defence Force(BDF), le West Coast Defence Force(WCDF) hna i bawm in an fimtawl hna i an phu chung minung aa khawngdeng mi an um lo, tiah PWDF in rianngeitu pakhat nih a chim.

India-Myanmar ramri Falam peng Rih khua ah a ummi ralhrang sakhan ah minung 35 in thazaang an chap, tiah Chin ralkap hna sin in theih a si. “Atu i riahhmun an sernak zawn hi a biapitnak hmun hma a si. Ramri tiva le a pawngkam khua hna ah nawl ngeih an duh caah a si lai,” tiah CDF-Hualngo in chimphuannak nawl ngeitu nih a chim.

Atu lio ah cun an cawlcangnak hmuh an si rih lo nain a pawngkam inn 5 cu an umnak in an thialter hna. Khor an cawh i saupi um khawh nak ding sakhan an i siamremh caah kan ngiat ko hna, tiah a chim chap.

Ralhrang nih thazaang an chapnak hi February 13 Napyidaw ah tuah mi Min Aung Hliang le a hnuzul minister pawl meeting ah Chin chief minister Ngun San Aung nih ramri chawlehthalnak gate phihpiak ding le CDF-PDF hna nih an control khawh ruang ah ralkap thazaang chap ding in a nawl ruang ah a si, tiah a chim.

Mizapi vengtu ralkap lei nih ramri chawlehnak le ramchung chawlehnak cu a dihlak in an control i, zatlang uknak a ṭhancho khawh nakding an timhtuah lio ah atu bantuk in SAC ralhrang nih thazaang an hun chap hi a si.

Asinain, zei ngai aa thleng mi um lai lo, tiah a chim. Chin mipi dihlak cu SAC ralhrang he naihniam in um lo ding in forhfial an si i zei bantuk zawtlaknak kan ton zong ah mipi he hmunkhat te ah ṭangrual in SAC ralhrang cu an hram cah tiang in kan doh lai, tiah a chim chap. Credit: The Chin Post