Press "Enter" to skip to content

Nizan i NLD Headquarter (Rangon) Ah Tuahmi Thawngpang Fianternak ; U Soe Win (NLD MP)

Ralkap Nih NLD Party Hrawh An Duh: U Soe Win (NLD MP)

Ralkap nih nawlngeihnak an lak hnuin thimnak ah teinak a hmumi party a simi NLD cu hrawh le vaivuanh an duh caah party zung cheukhat ah hramhram in an lut i sualpalhnak an hawl tiah NLD chungtel hlutdaw palai U Soe Win nih a chim.

Nizan i NLD Headquarter (Rangon) ah tuahmi thawngpang fianternak ah U Soe Win nih “NLD sualpalhnak an hawlmi a si. Party hrawh tiang zong an tuah khawh. Kanmah hi ningcang loin sual an kan phawt hnuah thong an kan thlak lai i party hi an hrawh khawh ko lai, an hrawh ko lai. Sualnak a ngei lomi sualpuh in an hrawh lai ti hi a fiang ko” tiah a chim.

Ralkap nih nawlngeihnak an lak hnuin Rangon i NLD Headquarter telh in ramthen le ramkulh NLD zung cheukhat cu ralkap nih hramhram in an luhhnawh, party tuanvo ngeitu tam nawn an tlaih cang hna.

A luanciami Feb 9 i NLD Headquarter an luhhnawh lioah khan palik le ralkap an i tel. Cucu CCTV record ah fiangtein a lang. A biapimi ca, mei nih a kangh khawh lomi thirbawm chung i tangka le bank cauk a tlau. Cun pehtlaihnak thilri vialte an chah/hrawh dih.

Hi kongah NLD Upa hna nih Bahan palik zungah report nak an tuah nain atu tiangin zeihmanh tawlrel a si lo tiah theih a si.

U Soe Win nih “Hi case hi a rannak in hlathlai dingah ca kan pek cang hna. Tha tein an tawlrel lo ahcun cunglei ah kan kai lai. Home Affair zungpi tiang kan kai lai. Hi kong hi kan chiah sawhsawh lai lo. Phungning tein kan pehzulh lai. A dik loningin kan thilri pei an fir, an lak cu” tiah a chim.

Ref: Irrawaddy News

Be First to Comment

Leave a Reply

Your email address will not be published. Required fields are marked *