Press "Enter" to skip to content

NLD Ruangah Party Dang Pawl Nih Zalong Tak In Ramkhel An Tuah Khawh Nak A Si (+Video )

Myanmar ram chung i thim nak nile can cu a nai thluahmah cang i party pakhat le pakhat an i zuam chin lengmang ko. party zapi tein thiltha tuah cu an i tim dih cio ko. Party pakhat nih miphun hrangah thilṭha lo tuah ai tim ticu an um bal lem loh.

Asinain, an tuah kho taktak ngai hnga dek maw? ti cu mipi pawl nih ruahding mi thil a si. Ṭhenkhat NLD lo cun cawlcangh khawh a si laoh e an ti. ṭhenkhat nih NLD cu miphun dang pawl nih hohami party a si ruangah Chinram hrangah zeihmanh an tuah kho taktak lai loh. Mah miphun party CNLD lawng nihChinram hrangah cun rian a tuan kho lai an ti.

Chinram hrang i riantuan tu ding NLD lamtang mi Dr.Sasa nih Myanmar cozahpi kaltlang in ramdang pawl pehtleih nak tuah a timh timi le zeihmanh tuah kho tung lo i, a au sawhsawh mi party i um a duh lo nak kong cu a chim.

“Bawlung chuih i goal ding ah cun bawlung kun chung i kan luh a hau. uniform i hruk tung i bawlung kun chung i um lo. lenglei long i kan au peng a siah cun, zeitik hmanh ah kan goal kho lai loh. Party tamtuk ah um len loin, cozah dir khotu party ah um uhsih law kan hlawh a tling deuh lai.

“CNLD zong ah chinmi kan zaten kan um dih loh. Miphun party timi pawl ah Chin miphun zatein i telnak party a um loh, NLD lawngah kan um dih. Tlangcung mi midang pawl zong NLD party ah an um dih.
“NLD cu kum 30 a tling cang. NLD a cawlcangh lio ah hin party dang zeihmanh a chuak rih loh. Cu lio i ram a khel mi minung cu thawngthlak ding an si bantuk in,NLD pawl zong thawng an rak tla dih.

NLD i an rak cawlcangh ruang ah pei tuah cun Party 90 hrawng an rak chuah khawh ko cu. Hi party 90 pawl nih hin NLD doh loin lunglomh nak biatu an chim deuh ding a si.A ruang cu NLD ruangah zalong tein ramkhel an tuah khawh nak zong hi a si” a ti.

Cun, Kawl uknak tang i cawlcangh nak hi a poi lo maw tiah an hal than i, Dr.Sasa nih “Politic ah miphun thleidan ding a si loh Myanmar ram tiin kalpi ding a si.

“Federal democracy kan ngah hlan lo cu zeihmanh kan tuah kho hlei lai loh. Mahcu ngah nak ding ah cun a ngah khawh nak party ah umding a si ko. kan chim cang bantuk in bawlung chuih na duh ah cun bawlung kun ah chuih ding si ko. TV i bawlung chuih na timh ah cun zeitik hmang ah na goal kho lai loh.

TV ahcun mi chuih lio long na hmuh khawh. na rak au len kho men. Dam lo a um tikah siizung i vakal pi a hau, siizung a kal a duh lo asi ah cun thih lawng a hmabak. Kan dam lo tikah siizung i kal ding kan si, siizung ah sibawi an um i kan damlonak pawl kan chimh khawh hna.

Miphun covo timi cu lak ding thil a si loh, tuah ding thil a si. Khawika i dah lak nai tim? Hngakchia pawl sianginn kai ter na duh bu i khuate ah na umpi peng hna a si ko ah cun zeitin dah siang inn cu an kai khawh hnga. fimthiamnak umnak hmun i na kal pi a hau” a ti.

a tanglei ah a video kan van chiah.

Be First to Comment

Leave a Reply

Your email address will not be published. Required fields are marked *