Press "Enter" to skip to content

Nu le pa caah Pathian thluachuah sunglawi bik hi fale an si kan ti tawn

Nu le pa caah Pathian thluachuah sunglawi bik hi fale an si kan ti tawn.Fale caah Pathian thluachuah kan rak hmuhton hmasa bik cu kan nu le kan pa hi an rak si ve.Nu le pa cu fale caah an nunchung caan a thaap mi an si.💔 …….

Kapa hi Rev.He ling asi.Ka nu min cu Pi Dar Zi asi.Kalay ah khua an sa. Kapa cu pastor in a pensionnak kum nga asi ve cang…. Kan I naihniam deuh mi nih capo ah an chim tawn mi hna cu sayapa hi TV 🖥️si I sayama nu hi control 🖱️asi an ti tawn😂. Kapa pulpit cung a tthut le a dir ah ka nu hi a lai I a hmaibik tthutnak ah a tthu tawn I an mit in an I chawn lengmang ttheu ,😁. Chim duh mi cu pakhat le pakhat ai veng mi, ai zohkhenh mi le ai hmuthiam mi an si.

📝📖Kapa zong kanu zong carel le cattial a huam mi an si.Caa tlawmpaal tete ka ttial tawn ah, na pa fa ciammam an ka ti ah khin kai lunghmuih tuk tawn.Kapa bantukin kanu hi a cattial ka uar tuk ve. Kanu ttial mi, 2005 lio CACC nih( Lai) movie an rak thlak mi “Kanu Dawtnak Mitthli”timi hi ka rak uar tuk. Nikhat khat ah kanu le kapa bantuk si kai zuam lai ka rak ti tawn.

#Kapa sining ka ruah tawn mi lak I keimah tein kai uang tuk tawn mi cu mi hmasa (lamsialtu dirhmun ) a rak si hi asi.Tlanglo Baptist Church (Pastor)hmasa bik, TABC(E&M secretary )hmasa bik, JMBC Thantlang (Church Pastor) hmasabik , TABC(Evengalist ) hmasabik, ZBC@CBC(Falam) Evengalist hmasabik, HLBC(Church Pastor) hmasabik a rak ttuan mi asi. Thil hmete a lo nain a rak har bak lai ka ti I ka upat ngai . A hlaan ah ka rak ttial cia bangkhan thil harsa cem a rak ton lio ah “ka ca’h a ttha ko, Pathian khuakhaannak hi”a rak ti ngam tu, ka caah zohchuntlak asi. Pathian nan ttih lai, Ngakttah le santlai lo nan dawt hna lai ti hi a kan cawnpiak cem mi asi.

#Kanpa nih a ka ti tawn mi cu “Tahan kapi(na nu) le inn kan phak hin ka kaathaw hlei tuk tawn eh”, a ka ti. Kanu nak in chumhchuan hi ka thiam deuh ko lai dah! Nain ka tluk lonak cu thawten ei hna seh,hi te nih hin thawt hna seh ,tiin a dawtnak a telh chih i tthaten a kan timhtuah piak mi cu a rak thaw hlei tuk .Thil a tuah mi ah timhtuahnak a nei tawn,ai biatak I a fel. Fale a dawt lawng si loin kan mo le le ka pasal tiang a dawt tuk hna.Cu lawng siloh, kapa lei chungkhat hrimhrim hi a dawt in a zohkhenh tuk hna. “Nupi ttha nih rualza pum” timi khi kanu ah ka hmuh.
,Hihi a fale nih kan tluk bak lo mi asi.

👨‍👩‍👧Kanu le kapa cung kai lawmhnak le an sining kai uar hnanak hi a tam tuk,. Nain nihin ka dirhmun ah an cung I kai lawmhnak tampi chung ah pahnih te chim hna ka duh. “nihin tiang nan ka nunpi caah kai lawm tuk. “❤️

Cun “keimah le keimah zei ka tuah poh ah ka tuahkhawh lai ti kai zumhnak (believe in myself)hi kanu le kapa nih nan rak ka zumh hmasa ruang ah asi tihi kai fiang caah nan cung ah kai lawm tuk.”ti hi asi. Pathian nih nunkhua saunak ,damnak le hnangamnak in pe hram hna seh.Kan dawt tuk hna.

Cu vial cun,
Doreen Dawt Chin Tial.

Be First to Comment

Leave a Reply

Your email address will not be published. Required fields are marked *