Press "Enter" to skip to content

Nupi, Pasal, Nei Cangmi Nihcun Hihi Theih Hrimhrim Ding Rak Lenh Tak Hrimhrim Hlah

Nule Va cu pumkhat kan si bantuk tein, kan ruahnak kan duhnak, kan i tinhmi pakhat le pakhat aa chim dingle aa ruah tti dingmi kan si ko.Minung kan si bangin kan ruahning le kan hmuhning thil aa dang mi a tampi, kan ruahning aa dan ruangah, kan ruahning aa khah khawhnak hnga, i ceih tti, i ruah tti i, lungkhat tein Chungkhar caah a ttuan tti ding kan si.

Kan inn Chungkhar kongah, Hringtu kan Nule kan Pa hna zong, kan sining kan tthutdir ning, a si khawh chungin chimh le theihter hi kan rian a si ko.Sinian kan Inn Chungkhar kong an theih a herhlomi tampi a um ve, cutikah kan tonmi, pakhatkhat thil a um tikah, Hringtu kan Nule Pa sin kan chim hlanah khin, Kan Nu Va tein i ceih hmasa i, hi konghi kan chim hna lai maw? chim ah maw a tthat hnga chimhlo ah dah a tthat hnga tiah, kan Nu Pa tein kan i ceih a herh, cu hnu ah chimh an herh si le pahnih lungtling tein chimh ding, chim haumi thil si lo kan ti si le, chimlo in um ding si ko.

Cubantuk tthiamtthiam cun,midang nih kan Inn Chungkhar ah thil pakhatkhat tuah a herhmi um ahcun, Nu na si ahcun nan Pa umlo karah Nangmah nawl lawngin midang kha nan Inn Chungkhar ah na cawlcangh ter hna awk a si lo, Pa na si zongah cu tthiamtthiam, Na Nupi chim ta loin, nan Inn chung ah midang hmunhma pek ngah ve lo.

Mi zeimaw nih thil in zorh hna sehlaw, nan pahnih in nan um ahcun, cawk herh ahcun caw tti ko uh, cawk herhlo ahcun caw lo ko uh, sinain na Nupi maw na Pasal dik, a umlo ahcun, nangmah nawl lawngin thil tuah hlah.Nule Va simi nih kan theihding mi cu’ midang sinah kan Sining chim ding le chimlo ding.

Hringtu Nule Pa sinah kan Chungkhar kong chim ding le chimlo ding.Ule nau sinah, kan Inn Chungkhar kong chim ding le chimlo ding.Kan Fale sin hmanhah khin, kan chim dingle chimlo ding bia a um ti theih a hau. Kanmah Nupa lawng nih kan theih dingmi bia, thil an um ti kan fian a hau.

Cubantuk kan i fian lo ahcun, Nule Va karlak ah i siknak a tam, i theihthiam lonak a tam.Nule Va kan si ahcun, kan Thinlung kan i hmuh thiam a herh, Pa kan si ahcun kan Nupi le nih an duhlomi tuah lo kani zuam awk a si i, Nu kan si ahcun,kan Pasal le nih an duhlomi tuahlo i zuam ve kan herh.Pakhat le pakhat nawl i ngaihpiak, i theihthiam piak, thinlung i hmuh piak hi Nu le Va simi nihcun kan i zuam a herh. Catial tu:Dingdi

Be First to Comment

Leave a Reply

Your email address will not be published. Required fields are marked *