Press "Enter" to skip to content

Oct 27 Zinglei Thawngpang Biapi Deuh Hna

US President Nih ASEAN Summit Ah Zeidah A Chim? : A voi 39 nak ASEAN Summit cu Oct 26, nizan ah thok a si cang. Tutan ah ASEAN chungtel ram 10 chungin Myanmar aiawhtu a bau ruangmang. Chungtel tling loin a voikhatnak an tuah a si. Tutan meeting ah US President amah pumpak in aa tel khawhmi hi lung a hmui ngai.

US President Joe Biden nih cun ASEAN Summit ah ralhrangbu nih hramhram a thiltuami vialte ngol ding, tlaihkhihmi vialte hna thlahpiak dih ding, ASEAN biakhiahnakl phun 5 zulh ding le democracy lei kar hlan ding timi bia a chim. A bik in ASEAN biakhiahnak phun 5 hna cu a tak in zulh ding le tuahsernak in langhter dingah US President Joe Biden nih cun a chim.

Monywa In A Chuakmi Ralhrang Mawtaw Bomb Puahhnawh An Tong I Ralhrang 10 Leng An Thi : Monywa khuapi in Sagaing lei ah a kalmi ralhrang mawtaw 13 hna cu Min Moe ( မြင်းမူ)peng ah voikhat, Sagaing peng ah voikhat bomb puahhnawh an tong i mawtaw pahnih an rawk, ralhrang 10 leng an thi tiah theih a si.

Tuni October 27, zinglei suimilam 5:00 Am hrawngah a chuak mi ralhrang mawtaw hna 13 cu 6:00 am hrawngah Min Moe (မြင်းမူ )peng Alakappa ( အလ္လကပ္ပ ) khua le Wan Pyih (ဝမ်းပြည့်) khua kar ah mipi vengtu ralkap hna nih bomb in an puahhnawh hna i mawtaw pahnih rawk, cun ralhrang 10 nak tlawm lo an thi lai tiah pawngkam thawnglatu hna nih an chim.

Ralhrang mawtaw bomb a puahhnawhtu hna hi zeibantuk dah an si ti theih an si lo. Mah Bomb puah a tong mi ralhrang mawtaw hna cu pehzulh in an kal i Sagaing peng, Natt Khayan (နတ်ခရိုင် ) khua pawngah zinglei Suimilam 6:30 hrawngah bomb an puahhnawh than hna. Hi zawn i a puahhnawhtu hna cu ralhrangbu dohtu People Army to Fight Dictatorship (PAFD) an si tiah theih a si.

Ralhrang Dirhkamnak Tuah Dingin Biohahmu(ဗျူဟာမှူး) Nih Minung 1000 Tel Hrimrhrim Dingin Nawl A Chuah : Shan ramkulh in ni chuah lei, Keng Tung(ကျိုင်းတုံ) pengkomh, Mine Pyin(မိုင်းပျဥ်း) pengah nawlngeihnak latu ralhrang dirhkamhnak tuah dingin Biohahmu nih minung 1000 nan rak i tel hrimhrim lai tiah nawl a pek hna tiah theih a si.

Oct 27, tuni nawlngeihnak latu ralhrang dirhkamnak tuah dingin Mine Pyin (မိုင်းပျဥ်း)ah biohahmu Bohmugyi Tan Htun Aung nih Oct 26 ah meeting tuah in USDP party chungtel minung 300, khuami minung 50 le mipi ralkap (ပြည်သူ့စစ်) pawl hna he fonh in minung 1000 cu nan ra hrimhrim lai, rat lo a ngah lo tiin nawl a chuah hi a si.

Oct 26 ah khan khuami pakhat nih “Thaizing ah ralhrang dirhkamnak tuah dingin Biohahmu Tan Htun Aung nih meeting a kan auh i tel lo a ngah lo tiah nawl a kan pek. Khuami hna zong cuticun hramhram in nawl a pek ve hna. Mong Hsat(မိုင်းဆတ်) zongah khuami hna cu hramhram in nawl a pek hna tiah” a chim.

Shan ramkulh ni chuahnak lei Mong Hsat(မိုင်းဆတ်) khuapi zongah Oct 25 ah ralhrang dirhkamnak cu an tuah. Khuami hna cu hramhram in an auh hna i cheukhat an kal ve. Asinain an au lo, cuka tiang kal ding an tinak hmun tiang lawng an zulh hna tiah theih a si.

Mipi nih thimmi cozah sin in nawlngeihnak latu ralhrangbu cu atu tiang ramdang nih siseh ramchung ummi hna nih siseh lungtlinnak le cohlannak an tuah lo. A hawikom tha bik China, Russia le Thailand hmanh nih hnu an chit chin lengmang cang. Cu lioah ASEAN ah siseh UN le ramdang dang ah mipi nih an kan duh ko dahkaw ti kha lih in langhter an duh caah anmah dirkamhnak tuah dingin hramhram in khuami an fial hna hi a si. TachileikNewsAgency

PDF nih hmunhma an zohfelnak ah ralhrang meithal 8 le pyusawthi chungtel 3 an tlaih hna, Taningtari ramthen Palaw peng, Mithkyaungtait(မိကျောင်းသိုက်) khua pawng ah October 21 in 24, nili chungah ralhrang le khuachung PDF phufonh hna kahdohnak a chuak. Cu an i kahnak hmun cu October 26, nizan ah mipi vengtu ralkap nih an va zohfel i ralhrang meithal 8, kuan le phaisa zeimawzat an lak pinahi pyusawthi chungtel 3 an tlaih hna tiah theih a si.

Mithkyaungtait (မိကျောင်းသိုက်) khuapawng ralhrangbu ခလရ 285 le mipi vengtu phu i Palaw-PDF, LPDF le PRPDF hna fonh in ralhrang cu an kah hna, cu an i kahnak hmunhma zohfelnak an tuahnak ah ralhrang meithal 8 le pyusawthi chungtel 3, ralhrang thilthuam, phaisa le kuan kan tlaih hna tiah Puhlaw mipi vengtu nih cathanh an chuah. Khit Thit Media

Demosu kahdohnak ah ralhrang 10 hrawng an thi tiah KNDF nih a thanh, Kaya ramkulhDemosu peng chungah nizaan October 26, zaanlei ah i kahdohnak a um i ralhrang 10 hrawng an thi tiah Kaya (Kayinni) ralkap (KNDF) nih cathanh an chuah.

Demawhsu peng chung Thuilwinbila(ထွီလွီးဘီလာ) le Ngwe Taung(ငွေတောင်) khuathar kar ah ralhrangbu le Kayinni ralkap (KA), KNDF cu nizaan zaanlei suimilam 2:30 hrawng tiang an i kap. Ralhrangbu nih Demosu peng chung Kawi biaknak inn chay-ya-daw(ခြေရာတော်) hmun pawngah umhmun khuar in minung umnak sangchungah hriamngan le hriamhme hmang in an kah tiah KNDF nih an cathanh ah an langhter.

A luan cia ni tlawmpal chung zongah ralhrang phu nih hriamngan in an kah hna caah Moebe(မိုးဗြဲ) khuami minung pakhat a nunnak a liam, ngakchia pahnih tel in khuami minung 6 nih hliamhma an tuar tiah BBC nih a tial.

Shan Ramkulh Ah Tlangcung Hriamtlai TNLA Le RCSS An I Kap, Khuami An Thin Phang : Shan ramthen chaklei ,Kyaukmay ( ကျောက်မဲ ) peng chungah Kyu Shaw (ကြူရှော) khua pawngah tlangcung hriamtlaibu pakhat le pakhat an i kah caah khuachung inn cheukhat kuan nih a khen. Khuami hna cu thinphang le lungrethei in an um ko tiah theih a si.

October 27, 2021 zing suimilam 3:00 am hrawng in Kyu Shaw (ကြူရှော) khua pawng ah kahdohnak thawng cu kan theih i zing sml 8:00 hrawngah khuachung inn cheukhat kuan nih a khen. October 22 khan Kyaukmay ( ကျောက်မဲ) peng Pan Hone (ပန်းဟုန်း)khua le Pan Pyat (ပန်ဖြတ်)khua hna pawngah TNLA le RCSS hna hmaitonh kahnak a um i nifatin hriamngan le hriamhme kah thawng hna cu a pawngkam khua hna nih an theih.

TNLA le RCSS kahdohnak ruangahkhuami hna cu thinphan dai loin an um. Khua chuahtak in ramlak a himnak hmun i a zammi hna zong atu tiang khua ah an tlung ngam rih lo tiah Thachileik News Agency nih a tial. The Chin Post

Be First to Comment

Leave a Reply

Your email address will not be published. Required fields are marked *