Press "Enter" to skip to content

Pangkhua khuataw Tipi Ah Ralzam Hna A Lak In A Phurtu Pu Hmun Sang Le Pu Bawi Cung

Pangkhua khuataw Tipi Ah Ralzam Hna A Lak In A Phurtu TCP Nih Kan Ton Hna: Nizan October 14, 2021 ah khan TCP nih cun Pangkhua khuataw tipi Ralvenchua, Mizoram le Chin ram pehtlaihnak lampi pakhat a simi cu a hmun ah kal in thilsining hlathlainak kan ngei.

Pangkhua khuami Pu Hmunsang le Pu Bawicung hi ralzam an um kaate in Myanmar lei in Mizoram lei ah Lawngin a phurtu an si. Ralzam an hung tam deuhdeuh i tangka a harmi tampi zong an um tawn caah September thla khan a lak tein ralzam hi Mizoram lei ah an thiar hna.

Ralzam hi nifatin cat loin an lut peng i 30, 40 tiang an i peh caan zong a um. Mizoram leiin CDF thilri chanh a herhmi le kir duhmi hna zong man ngei lo tein an phurh piak fawn hna. Pu Hmunsang le Pu Bawicung hi ho bawmhnak hmanh tel loin anmah pumpak i peknak bakin kan miphun caah a tuanmi an si. Ralvenchuah, Pangkhua khuataw tipi ah cun anmah pumpak rian zong kaltak in an riah hnawh. Pu Hmunsang nih cun September thla khan Lawng petrol (datsi) man ah India Rs 50,000 hrawng cu kan dih cang lai, tiah a kan chimh.

Cu hlan deuh i social media ah motor cycle phurhman kan lak, tiah a rak thangmi cu lihbia a si kong le zei bantuk thilri hmanh aman an lak hrimhrim lo kong a chim fawn. TCP nih zei bantuk lungput in dah hi bantuk bawmhnak hi nan tuah, tiah kan halmi cu,”kan unau hna nih an nunnak tiang an pek i an in le lo an ngeihchiah vialte an kaltak lio ah kannih nih man ngeiin kan lawng citte rding cu kan ruat ngam lo, kan miphun ca ah kan tuah khawh vemi a si,” tiah an kan leh.

Nihin October 15, 2021 tiangah hin Mizoram, Lawngtlai District chung ah aa dormi mining 3000 hrawng an um cang. Hi vialte lak i a tam deuh cu Pangkhua khuataw, ralvenchuah tipi leiin a rami an si hna.

Matupi, Chanpian khuapawng ralhrang phu hna cu Chin ralkap nih an kah hna, Mindat in kuan khamkho mi motor(သံချပ်ကာ) 2 telh in motor 25 cu Matupi lei ah an kal: Chin ramkulh, Matupi peng Chanpian khua hlun le khuathar kar ah nihin October 15, chunhnu suimilam 12:00 hrawngah ralhrang le Chin ralkap kahdohnak a chuak tiah khuachung thawngzamhnak nih a langhter.

Cu ralhrang hna cu Mindat in Matupi lei a kal mi ralhrang hna a khamtu lam a cimmi thianh piak ding a kalmi an si tiah theih a si. Kahdohnak nunnak a liammi hna le hliamhma a tuarmi kong thawngfiang theihmi a um rih lo. Motor lamthluan mincimhnak thianhhlimh a si lai caah na kan kap lai lo tiah nai ah khan Matupi khuachungah ralhrang hna nih loudspeaker in an rak au nain kah an tong.

Nihin chunhnu ah ralhrang hna kuan kham kho motor 2 telh in motor 25 hna cu Mindat in Matupi lei ah an kal i Mindat he meng 10 tluk a hlatnak hmun an phan cang tiah khuachung thawngzamhnak nih a langhter.

Mindat-Matupi lam cu meng 102 tluk a saumi a si, cu ka lamthluan cu Matupi le Mindat CDF hna nih an ngiat pengmi a si. A luancia thla ah cu Mindat-Matupi lam ah ralhrang le CNA,Matupi-CDF, Mindat-CDF kahdohnak a rak chuak i ralhrang lei in duh-bu-hmu-gyi Zaw Zaw Soe tel in ralhrang tampi an rak thi.

Ralhrangbu Nih A Tlau Cangmi A Limhang A Hmuh Than Khawhnak Dingah Ramkhel Hi Chuahtak Seh Tiah KNU Nih Halnak Cathanh A Chuah: Nawlngeih latu ralhrangbu nih a tlau cangmi a limhang vialte a hmuh than khawhnak dingah Federal Democracy dirhnak rian le ramkhel dangdang i aa telnak in chuak seh tiah Oct 15, tuni ah KNU nih cathanh a chuah.

NCA kumruk tlinnak ni ah atu bantukin KNU nih cathanh a chuah hi a si. Cathanh ah cun ramhchung hmunkip ah a chiahmi ralhrang vialte hna hi la dih sehlaw cu hnuah ram pumpi kahdaihnak phuang seh tiah an langhter.

Cu lawng si loin KNU nih NCA ah a hmasa bik hnatlaknak min a thut i midang zong an i tel ve nak dingah a si khawh chungin kan i zuam. Asinain nawlngeihnak lak ni Feb 1 thok in NCA riantuannak vialte cu a dir i ralkap khongton uknak tangah kan tla than tiah cathanh ah an langhter fawn.

NCA kum 6 tlin ni ah tlangcung hriamtlaitu hna chungin minung 114 cu ralhrangbu nih sualpuhnak (case) an phih piak hna: Rampum huap kahdaih hnatlaknak NCA kum 6 tlin ni, nihin October 15 ni ah tlangcung hriamtlaibu le anmah hna he pehtlaihnak a ngeimi minung 114 cu sualpuhnak phihpiak an si cang tiah ralhrang nih cathanh an chuah. NCA kum 6 tlin ni lomhpinak caah atu bantukin sualpuhnak kan phihpiak hna hi a si tiah ralhrangbu lei in ralbawi duh-bu-choh-gyi Awng Lyin Dwe minthut he cathanh an chuahmi a si.

Sualpuhnak an phihpiak mi hna chungin Yakhine ralkap (AA) minung 61, Kachin ralkap(KIA) in minung 23, Karen (KNU/ KNLA PC) in minung 1 le Myanmar democratic ralkap (MNDAA) in minung 1, Shan ramkulh (RCSS) in minung 12, Shan ram thanchonak party (SSPP) in minung 5 le Ta’Ong (TNLA) in minung 11 hna an si tiah cathanh ah cun an langhter.

Ramchung kahdaih hnatlaknak minthut NCA cu President U Thein Sein chan 2015 October 15 ni ah KNU telh in tlangcung hriamtlaibu 8 ni minthutnak rak tuahmi a si. NLD party cozah hruainak chan ah Lahu democratic party(LDU) le Mon pyitit party(NMSP) hna cu NCA ah an rak i tel ve caah NCA ah min a thumi hriamtlaibu dihlak 10 an si.

Kaya Ramkulh Ah Ralhrang 300 Leng An Thi Cang: Ralhrangbu nih nawlngeihnak an lak ni, Feb 1 in October 15, tuni tiang ah Kayinni (Kaya) ramkulh chungah ralhrang le khuami a thimi dihlak hi minung 476 an si tiah PKPF nih nihin October 15 ni ah cathanh a chuah.

Ralhrangbu nih nawlngeihnak an lak hnu March thla in October 15 tiangah Kayinni(Kaya) ramkulh chungah kahdohnak voi 91 a um i ralhrang 325 an thi. Kaya ramkulh mipi vengtu ralkap 30 an nunnak a liam ve. Cu kahdohnak ruangah khuami 94 an nunnak a liam tiah cathanh ah an langhter chih. By. Tluanga Zathang, Flowery Par

Be First to Comment

Leave a Reply

Your email address will not be published.