Press "Enter" to skip to content

Pathian nih a thimsual i a hlawt tthanmi, Saul siangpahrang le US Mirang Evangelical Khrihfa pawl nih an rak thimsual cikcekmi, Donald Trump

Pathian nih a thimsual i a hlawt tthanmi, Saul siangpahrang le US Mirang Evangelical Khrihfa pawl nih an rak thimsual cikcekmi, Donald Trump
————————–β€”β€”β€”-
Khrihfa tampi nih nan i thawh i Pu Trump cu Pathian thimmi a si, Khrihfa ttha a si, Khrihfa a kan dawt, a kan ttanpi nan ti. Asinan cucu a hman lo. A palh tukmi ruahnak a si. 1 Samuel 8:4-9 kan rel ahcun Israel upa hna nih Samuel cu an thawh i kan innpa ram hna nih siangpahrang an neih bantuk in kannih zong siangpahrang kan chiahpiak ve an tinak kan hmuh. Atak te cun Israel upa hna nih siangpahrang neih an duhmi cu Pathian le Samuel hna a tla lo/ an duh lo. Aruang cu Israel miphun i an siangpahrang cu Jehovah Pathian kha a si ko. Cuve bantuk in Mirang evangelical khrihfa (US Laimi khrihfa telh in) pawl nih US president caah an thimmi Donald Trump cu Pathian a lungtling ve lo.

Israel upa pawl i siangpahrang halnak cu Pathian le Samuel an lungtling lo buin Pathian nih Samuel cu Saul kha siangpahrang ttuanding ah chiti a thuhter. Pathian nih Israel upa pawl i an halmi cu Pathian nih a el siang hna lo caah Saul cu an siangpahrang caah a pek hna/a thimpiak hna. Asinan Pathian nih Saul cu Israel miphun siangpahrang caah a thimsual ve ti uh sih law kan palh lai lo dah. Aruang cu Saul siangpahrang nih Pathian nawl le Samuel chimmi cu a ngai duh ti lo/a zul duh lo. 1 Samuel 15:1-9 chungah Saul nih Samuel chimmi a ngai duh lonak kan hmuh. Ahme 9 ah kan hmuhmi cu “Sihmanhsehlaw Saul le mi hna nih khan Agag le tuu lak i a αΉ­ha bik hna le cawtum lak i a αΉ­ha bik hna le cenhmi saαΉ­il thauthau hna lakin a αΉ­ha bik hna le, tuufa hna le a αΉ­hami vialte kha an zuah hna i an hrawk cikcek duh hna lo; a αΉ­halo le santlailo vialte lawng kha an hrawh cikcek hna.

” Mah ka hin Saul duhfah hakkauhnak le amah ca lawng a ruahnak kan hmuh khawh. Cutik ah “Bawipa bia cu Samuel sinah a ra phan: ‘Saul cu siangpahrang i ka rak ser caah hin kaa ngaichih; zeicahtiah keimah zulhnak in aa mer cang i ka nawlbia kha a tuah hna lo,’ tiah a ti. Cun Samuel cu a thin a hung i Bawipa kha zan khuadei in a auh” (1 Samuel 15:10-11). Saul nih Pathian nawl a ngai duh lo tikah Pathian lila cu a ngaichih tuk, Saul cu siangpahrang tuanding ah a thimmi cu. Cucun Pathian thlarau nih Saul cu a chuaktak i David cu Israel miphun siangpahrang ttuan dingah a thim tthan. Phundang kan chim ahcun Pathian thlarau cu David sinah a tthial. 1 Samuel 16 ah kan hmuhmi cu David cu Israel miphun siangpahrang caah chiti thuh a si i Saul chungah thlarau ttha lo a lut cang. Mahtik ah Saul cu a zaw i David nih tingtang a tumpiak caan poah a dam. Thlarau ttha lo a chung i a luh caan poah David cu thah ding in a dawi peng/thah a zuam peng. David sinah Pathian thlarau a tthial cu Saul nih a hnahchuah tuk.

Mirang Evangelical Khrihfa nih Trump cu US president ttuan dingah kum 4 an thim i amah chungkhar sipuazi hlawknak le miaknak le amah pumpak duhfah hakkauhnak lawng a ruat tikah atu cu Pathian thlarau nih a chuah tak ve Pathian thlarau cu Biden sinah a tthial ve cang. Kum 4 a ttuan chungah Pathian duhnak le Khrihfa cawnpiaknak he a tlakning in a um duh lo/a ttuan duh lo/a zul duh lo. Phundang in kan chim ahcun Trump nih US president kum 4 a ttuan chungah Pathian duh lomi, tthat lonak a phun2 a tuah ve. Cutik ah Mirang Evangelical khrihfa nih an thimsual mi Trump cu Pathian nih a duh ti lo/a hlawt cikcek cang i Biden a thim. Mahcu Trump a hnahchuak tuk ve i Biden le Democratic party pawl cu hehtiah a phun2 in hnahnawhnak le harnak a pek hna. A buai hnawh peng rih ko hna. Hi hnu zongah buainak, hnahnawhnak, le harnak pek ding a tim len rih. Saul chungah thlarau ttha lo a luh tikah David cu thahding in a dawi peng bang Trump zong thimnak in a sungh cang tikah Biden te phu cu a phun2 in hna a hnawh ve hna/a buai hnawh ve hna. January ni 6 le ni 20 zongah zei bantuk buainak le hnahnawhnak dah a tuah te lai i a chuahpi te lai ti kan theih kho rih lo. A tuahte lai ti zumh cio a si ko. Biden le a party cu fir a phun2 a puh hna. Lih le hrokhrawl a puh hna. Asinan pakhat hmanh a piah khawhmi a um fawn lo. COVID ruangah mail in thimnak tuah a si tikah buainak tete le tlamtling lonak tete a um kho timi zong a ruat duh lo.

Pathian nih Saul cu Israel miphun siangpahrang ttuan dingah a thimsual bang US Khrihfa tampi (Laimi khrihfa telh in) nih Pu Trump cu US president caah an thimsual cikcek ve. An i palh cikcek ve cang. Mahtik ah Pathian nih Saul cu a hlawt bantuk in Trump zong a hlawt ve i Pathian thlarau cu David cungah a tthial bang Biden sinah a tthial ve cang. Duhfahnak le hakkauhnak le mah ca lawng a ruatmi Saul siangpahrang le Donald Trump cu Pathian thlarau nih a chuahtak cang hna/a hlawt cang hna. Saul nih David cungah hnahnawhnak, buainak le harnak a phun2 a tuah bang in Trump le Khrihfa tampi zong nih Biden le Democratic party cungah hnahnawhnak, buainak, le harnak a phun2 hi hnu thlahnih chung cu tuah dawh ve in an um. US ram le US president caah thimmi Biden caah fak piin thlacam rih hna uh sih. Van Tum

Be First to Comment

Leave a Reply

Your email address will not be published. Required fields are marked *