Press "Enter" to skip to content

PDF Hna Nih SAC Ralhrang An Kahdoh Hna, Thi An Tam

Nizan zing suimilam 8:45AM hrawng ah ralhrang motor rual cu Tapikung khua lei panh i an kal cuahmah lio ah Pale PDF nih hriannam ngan le mine bomb hmang in an rak kah hna i ralhrang minung 8 an thi, motor pakhat a rawk dih tiah theih asi.

Mah lawng hmanh si lo in Pale PDF rual nih nizan thiam ah Mungywa, Sagaing mawtaw lampi kam Awng Taw khua an tihmi ah SAC ralhrang motor rual cu bomb an rak puah hnawh tiah theih a si fawn.

Cun nizan thiam ahcun Kachin State, Main Nawng le Ma Hman Kaing khua karlak ah SAC ralhrang minung 150 rual motor he a kal cuahmah mi hna cu KIA nih mine bomb hmang in an rak tthuat hna. Thi le hliam an um maw um lo tihmi cu KIA lei nih fiang in an thei kho lo.

Cun nizan thiam ah Maung khuapi Kin an tihmi khua kam ah SAC ralhrang motor 1 cu PDF nih bomb in an chep hna i ralhrang minung 3 an thi i, minung 5 hliam an tuar tiah theih a si. Nizan zing suimilam 10 ah KNDF B-09 ram chung 6 mile Zii Phy lampi ah SAC ralhrang cu an rak kah hna mi 4 an thi, minung 5 hrawng hliamhma an pu tiah theih asi.

Relchap; SAC Ralhrang nih Yangon ah an Tlaihmi Johnson Van Biak Lal a Nunnak a Liam. Bomb puahnak hliamhma he Yangon ah SAC ralhrang nih an rak tlaihmi kum 17 Lai mino Johnson Van Biak Lal cu December 14 ah a nunnak a liam, tiah thawng kan theih.

November 25 ah khan Yangon ramtthen, North Dagon ah a ummi inn pakhat ah mahte sermi bomb a puak sual i Johnson Van Biak Lal le Aung Khant Paing cu hliamhma a pu i, an hawipa Kyaw Thiha cu a nunnak a liam.

SAC ralhrang nih Johnson Van Biak Lal le Aung Khant Paing cu a hliamhma he an tlaih i, Mingalardon ralkap sizung ah an chiah hna. Ni 20 a rauh hnu December 14 ah Johnson Van Biak Lal a nunnak a liam hi a si.

Johnson Van Biak Lal hi Rev. John Ngun San Luai i a fapa pathumnak a si. Nihin December 16 zaanlei sml. 3:00 ah ruakthlaknak an tuah, tiah thawng kan theih. Crd; The Chin Journal

Be First to Comment

Leave a Reply

Your email address will not be published.