Press "Enter" to skip to content

PDF Kalay Ralkap 2 Cu SAC Ralkap Nih An Thah Hna Ee

Kalay PDF Ralkap 2 Hna Cu SAC Ralkap Nih An Tlaih Hna Hnu Ah An Thah Hna. Kalaymyo peng, Doewaichaung(ဒိုးဝိုင်းချောင်း) khuapawng SAC ralkap nih December 4, chunhnu suimilam 1:00 hrawng ah lam aa chawkmi cu checkhlatnak an tuah hna, cu lio ah PDF-Kalay ralkap 2 cu an tlaih hna hnu ah an thah hna tiah theih a si.

SAC ralkap lei thawngthanhnak nih cun, lunghrinhmi cycle 1 kan hmuh i checkhlatnak tuah ding in dirter a si nain, dirlo in an zaam caah kan kah hna, PDF ralkap 2 ruak le pistol 1 kan lak tiah an langhter.

Mit hmutu pakhat nih cun ” an zaam caah an kahmi hna a si lo, an ruak zong buri chung ah an chiah hna hnu ah motor chung ah an khumh hna” tiah a chim.

Thah a tongmi PDF ralkap 2 chung ah pakhat cu Khuppi tiah auhmi a si i, a ruak zong a chungkhar nih an la kho rihlo tiah theih a si. Credit: The Chin Post

Relchap: AA nih Ralkap he kahdaihnak an tuahmi nih rampi dothlennak a hnawrsuang lai maw?

AA nih kawl Ralkap he kahdaihnak (temporary ceasefire) kan tuah tiah an thanh le cang ka in PDF Phu zeimazat nih an i lawmh lonak an hun langhter cio. A hlei in Rakhine ramri ah a ummi Palewa CDF ko an thin a phang. Rakhine ram Ralkap pawl tampi in kanmah sinah an rak thlah hna lai ti an phang.

U Khine Thu Kha nih a chim ning ah Rakhine ah tuhi Ralkap thong 40 tluk an um tiah a ti. Ralkap thong 40 cu AA he an inkah ti lo ahcun hmun dangdang ah an kuat khawh cang hna lai caah tlawmpal cu an sia a rem deuh suaumau lai ti cu a fiang.

Asinain, AA nih kahdaihnak an tuah ruangah thinphan tuk ding a um lo tiah expert pawl nihcun an zumh deuh. A ruang cu AA le Ralkap an i kah hlan in hi dothlennak hi caan sau nawn kalpi a rak si cang ko i zei ngaingai an i kah hnu in dan lam nak cu a um tuk lem lo tiah an ti ve. Amah belte rampi huap in hmun kip in ral rak thawh cio cu a herh hrimhrim ko lai tiah an ruah cio. Front tampi in ral rak thawh cio i tingzo loin tuah an hau. Credit: Tha Ceu Lian

Tedim Ah Tleirawl Pakhat Nih Nu Pakhat A Tlaihhrem Hnuah A Thah. Chin ramkulh,Tedim ah kum 20 tluk nu pakhat cu tleirawl kum 17 pa pakhat nih a tlaihhrem hnuah a thah, tiah theih a si.

Chin ramkulh, Tedim peng Kateel khua um Huaikhek(kum 20) cu a pa he December 2 zan sml 8:00 hrawngah mei an toh lioah an khuami Man Sian Thang(kum 17) nih dawr kalṭi dingin a sawm, tiah tuallchung mi hna sinin theih a si.

Cu zan ahcun Huaikhek cu inn a ṭin ti lo i December 3 zinglei ah an khua chak hmun pakhat ah a thilthuam hruk loin a hliamhma he a ruak cu an char, tiah theih a si.

Huaikhek a tlaihhremtu Man Sian Thang cu, India ram Mizoram ah a zam. Anih hi Mizoram ah rithaisii hman ruangah thong a tla lengmang mi a si i kumtling lo a si caah an thlah ṭhanmi a si, tiah theih a si.

Huaikhek a tlaihhrem i a thattu Man Sian Thang cu, Mizoram ramkulh le Chin ramkulh a ummi bu kip nih tlaihpiak dingin Chin mino bu nih nawlnak an tuah, tiah theih a si. Credit: The Chin Post

Yesakyo Peng Palik Sakhan Cu PDF Nih An Ka, SAC Ralkap 30 Hrawng An Thi. Magway ramṭhen, Yesakyo peng palik sakhan cu kan va kah caah SAC ralkap Officer telh in 30 hrawng an thi, tiah Myingyan Black Tiger (MBT) in ṭuanvo ngeitu nih a chim.

“Uico ralkap 30 leng cu an thi ko lai. A chung lei thawng kan theih ning ah uico ralkap ruak 15 hrawng cu lam cungah an ril ko, an char rih hna lo. Ralbawi deuh a thimi hna cu kethum ngei motor(tungbing) pahnih in an phorh hna. Zei bantuk rank a ngeimi dah an thi ti cu kan hngal lo,” tiah a chim chap.

Yesakyo peng palik sakhan kahdohnak ah Myingyan Black Tiger (MBT) nih an hruai hna i, Blck Wons၊ Yekin ၊ VOMDY-Front Warrior၊ MGN-35 le BURMESE GUERRILLA FORCE – BGF hna i bawm in an kah hna, tiah theih a si. Credit: The Chin Post

Midang nih sual an Kan phawt lio ah Jesuh nih thiam a Kan cheh.
===============================

Vawlei hi a hmun lai lo, ticu theih dihmi asi ko. Vawlei cungah biaknak hi tampi a um i cu biaknak lak ah a tam u nihcun “Van” va co te ding kha an i tinh ciao hna. Khrihfa mi hna i kan biaknak “Muru” cu thih hnu ah Jahovah PATHIAN nih sakmi minung kut in saklo mi inn ah Kan um lai tihi asi. (IIKorin 5:1-4).

#A si Kun ahcun zeitindah “Van” minung kut in saklo mi Jahovah PATHIAN nih remh mi in cu kan co khawh ne lai?

Thih hnu ah vaa dinhnak ding hmun hi biaknak dang nih cun phun tampi in an chim. Asullam cu thih hnu thlarau vaa dinhnak ding hmun kong ah “doctrine” zumhning aa dang lengluang ciao. Islam biaknak phung le bang ahcun an pathian lei ttuanvo a umlo ti tluk khi asi. Kan thi lai i kan thih tikah Kan nun Liao i kan tuahmi kha an laak lai i cuaithlaainak cungah an thlaai lai i kan nun lio i thilttha Kan tuahmi nih cuaithlaainak ah a tei ahcun vaan Kan kaai lai tiah an zumh. A sullam cu mah tthatnak tuahnak in “Vaan” co khawh arak siko tinak kha asi.

Culak ah thih hnu pin lei nun a umlo. Vancung khua a umlo, vaanmi an umlo, thlarau zong a umlo tiah Saddusi biaknak le zumhnak a rak i tlaaih tawk zong an tampi.

Zeikhom hmanh va sisehlaw, (Christians) Khrihfa mi hna Kan caah cun thi hnu pin lei nun cu a biapi bik ah Kan chiah mi le Kan biaknak “Muru” bak cu arak si.

#Asi Kun ah zeitindah Khrihfa mi hna nih vaan cu kan co khawh ne lai? A pakhatnak ah “Vaan” Kan co khawh nak hnga ding ahhin minung tuahnak zeihmanh a rak i tal lo. Genesis 3:21, nak Kan zoh tikah verse 21. Cun Bawipa Pathian nih Adam le a nupi cu saphaw hnipuan a serpiak hna i a aihter hna.

Hi Adam le Eve i an hmuhmi saphaw hnipuan kongah porhlaw awk an rak ngeilo. A ruang cu anmah tuahnak pakhat hmanh a rak i tal lo caah asi. Saphaw hnipuan an neih hlaan ah theipi hnah tahin khua an sa i antak an i huh ko. Cu nih cun zungzal a rak deih hna lo. Cu nih a rak langhter mi cu minung tuahttuannak le zuamnak nih PATHIAN he remnak a ser khawhlo i khamhnak co khawh awk in zeihmanh a tuah kholo tinak asi.

Efesa 2:8-9 Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. 9 Hi kongah hin nan i porhlawt khawhmi zeihmanh a um lo, zeicahtiah nanmah òuannak thawngin nan hmuhmi a si lo.

Efesa Khrihfabu hna sinah Paul nih ca a kuat hna tikah khamhnak kong ah hin maw i porhlaw sual lai u ci, nanmah tuahmi le nan ttuanmi pakhat hmanh aa tal baklo hih Vel an ngaih hna catu ah asi khah tiah Paul nih a rak ti hna. Cu ve bantukin “Khamhnak” hi Kan mah tuahnak le ttuannak in comi asilo tihi nihin tiang zong ahhin “Biatak” cu asi.

Tulio na dirhmun kha mitampi nih an in zoh i sual an in phawt kho men. Cu nih cun na lung an dongter in vawlei chuah taak hmanh na duh kho men. Unau, ttha tein ngai mu Kan chimh lai, vawlei cung minung vialte nih cun mu sual Kan phaw hna hmanh sehlaw
“Vaan inn” a ngeitu Kan BAWIPA Jesuh Khrih nih cun mu sual an phaw hrimhrim lo. Hallelujah.

Rome 5:16 Cun Pathian laksawng le mipa pakhat sualnak kha an i lo lo. Kha sualnak a hun zultu kha cu, “Na sual,” ti biakhiahnak a si; sihmanhsehlaw sualnak hi zat riamruam a hun zultu cu, kan phu kan tawk lopi a simi laksawng, “Na sual lo,” ti biakhiahnak hi a si.

Na suallo ti biakhiahnak Kan sin i a phaak ni cu mu van sunparnak vialte kal taak in vawlei misualmi hna na suallo ti biakhiah awk ah naute fapa Jesuh Khrih vawlei i a rat nak in khan aa thawk mi asi.

Mi cheukhat hna le Sehtan nihcun nihin tiang hmanh sual a Kan phawt ko lai. Sihmanhsehlaw, kanphu kan tawklo pin Kan sual cuahmah lio ah sual a Kan phawlotu Jesuh Khrih hi panh ve hna usihlaw, Amah caah nun i tim ve hna usih!

Vawlei mi nih kutdong in sual an Kan phawt lio ah Jesuh nih a ttangnem cungah a Kan pom hlawm tihi thaazaang peek Kan duh mi hna cu asi . Cucaah, khamh Kan co khawhnak a ruang cu kanmah tuahnak thawngin sihin lo tein Jesuh Khrih thawngin asi.

Amah nih thiam a ka cheh cang tiah a zumtu vialte hna khamhtu cu Jesuh Khrih asi. Hawinu/pa khamhnak kong an fian ve khawhnak hnga Share nak zong in thawngttha rak chim ve khawh asi. Reltu vialte BAWIPA nih nan herh ning cio in thluachuahnak in pe ko hna seh! Amen. Credit: Johnson Bawi Lian

Be First to Comment

Leave a Reply

Your email address will not be published. Required fields are marked *