Philh Sual Lo Ding: Kan Cozah An Si Lo Caah Zei Bantuk Order An Chuah Zongah An Nawl Ngaih Bak Lo Ding

1. Kan cozah an si lo caah nawlngeihnak pek bak lo ding. An nawl kan ngaih ahcun nawlngeihnak kan pek hna a si caah an nawl ngaih bak lo ding. 2. Kan cozah an si lo caah zeibantuk ORDER an chuah zong ah kan i SAI LO hi philh lo ding. CDM lut zungrianțuan kan hawile zong zung kai țhan ding in heh tiah ORDER an chuahhnawh hna lai. Anmah ORDER he kan i SAI LO hi philh lo ding.

3. Kawlram minung sing 50 renglo a kan zuamcawhtu RALHRANG (terrorist) an si caah Kawlrampi RAL an si hi philh lo ding. 4. RALHRANG sin in thil țha i ruahchan lo ding. Kawlram mipi ca ah thilțhalo lawnglawng an khaan lai caah ORDER phunphun an chuah lai i fahnak lawng an kan pek lai hi philh lo ding.

5. CDM lut zungrianțuan kan hawile hna ca ah a har khunnak zawn a tampi lai hi philh lo ding. Ngiar bik mi cu anmah hi an si lai caah kan ti khawh mi lam poh in dirkamh le bawmh ding. Cun, zungrianțuan kan hawile zong con sual lo ding. Hmailei caan saupi ca ruat in țihnak ral tei khawh i zuam zungzal ding.

6. Rampi a zuamcawhtu ralhrang (terrorist) kan doh lio a si caah lungkhat tein um a herh khun caan a si hi philh lo ding. I funtom zungzal ding. Abu in fek tein dirți zungzal ding. 7. Ralhrang (terrorist) kan do nain kanmah cu hraan (violent) bak lo a herh ti philh lo ding. Kan hraan ni cu kan sungh aa thawk ni (Sang Hnin Lian) a si ti philh lo ding.

8. Cucaah, lamzawhnak ah siseh, hmun dangdang ah siseh a hrang mi lam i thim sual lo ding. Hriam i put lo ding. Lungtum, thingtan, namte, thirzum, chai tibantuk hmang in ralhrang pawl va doh sual lo ding.

9. Kan hraan sual ahcun, caanțha an i laak colh lai hi philh hrimhrim lo ding. Biaholh in siseh, kutke in siseh, a si khawh chung in nem (nonviolent) i zuam ding. (A hleikhun in tlangvaal, mino, thazaang ngei mi hna ca ko ah hin, a hrang mi hna lak i a nem mi lam (nonviolent way) i thim hi a har khun. Nain, a țha bik ko lai tiah kan ruah i kan i thim mi lam a si caah hi a nem mi lam cung ah in fek tein dir khawh tu i zuam ko hna u sih.)

10. Atutan ah țihnak ral kan tei hrimhrim a herh hi philh lo ding. Atu i kan ngeih mi țihnak phun hi kan naule, kan fale chan ah um ti hlah seh. Cucaah, nangmah le keimah nih ȚIH BU TEIN RALȚHA TEN kan doh a herh. “Țih bu tein ralțha ten” ka tinak cu, atu ah hin kan țih lo a si lo. Meithal in rak kah zong kan țih ve ko, thongtlak le hrem zong kan țih ve ko. Nain, kan țih ruang ah kan kiim lai lo. Hnu ah kan i thawn hlei lai lo. Kan dai lai lo. Ralhrang pawl hi kan tei hlan lo kan doh hna lai. Țih lo ding a kan țihtertu thil hi atutan kan tei hrimhrim a herh.

11. Biaknak pakhat le pakhat, bu-țhen (denomination) pakhat le pakhat, ramkhel party pakhat le pakhat sual i kawl, i soisel, i tihnawh lo ding. Atu kan caan hi i fonh dih i fek tein dirți a herh khun caan a si. Zeicahtiah, a kan zuamcawhtu ralhrang hna hi an der lo. Meithal le hriam dang tampi an ngei. Kannih mipi nih kan ngeih mi hriam țha bik pakhat cu ”kan zapi lungrual tein a dongh tiang fek tein dirți” hi a si.

12. A dongh tiang fek tein kan dirți ko hna i Pathian nih a kan dirpi ko ahcun a zei tin cun dah meithal le bom tehna lawng aa bochan mi ralhrang (terrorist) luklak nih cun an kan tei khawh lai! Teinak kan hmuh hrimhrim lai hi philh lo ding. Zeicahtiah kan tei hlan lo pei kan doh lai cu. Credit: Peter Hrang Lian Thang