Press "Enter" to skip to content

POLITICS (Nainganzi) AH PASTOR AI-TELAWK A SI MAW?

Hi biahalnak hi Bible ning te in ‘Yes’ zong kan tikhawh, ‘No’ zong kan tikhawh tiah ka ruah. Pastor cu Politics (Nainganzi) ah ai telawk a si hrimhrim loh, vawlei rian le Pathian rian cu kemhding a si loh ‘ timi hi cu, kan pawm dihngawt lai; chim tam hau lo-ah ka ruah.

Pastor le Pathian riantuantu hna zonghi Ram le Miphun nih a herhtuk lio caan ahcun politics( Nainganzi) zongah an rian ( Pathian rian) dawn/tul lo in, an itel kho ko: an itel khawhnak tawi te in kan vun zoh tuah lai.Judah mihna kha, Pathian biakam ning te-in, DAVID siangpahrang thutdanh ihruainak/uknak in DAVID hrinsor/tefa hna nih chankhat hnu chankhat an pen/uk hna: David, Solomon,Rehiboam,Abijah,Asa, Jehoshaphat, Jehoram (Joram), Ahaziah etc ti in an ihruai. Biaknak lei hruaitu hna cu: an Tlangbawi te le an Prophet hna an si.Siangpahrang AHAZIAH pennak a dihbak khan, DAVID Bawi thutdanh in ihruainak /uknak kha kum 6 hrawng tiang a rak rawk/tlau.

Pi ATHALIAH( Ahaziah Nu); David hrinsor/tefa a si lomi nih Judah rampi cu Kum 6 hrawng a pen/uk diam hna!
Prophets chimchung bia Messiah cu DAVID tefa/hrinsor chung in Bethlehem ah a chuak te lai timi kha pakpalawng ah acang deng mang!ATHALIAH hi Siangpahrang sualbik/chiabik tiah theihmi AHAB le JEZEBEL ( chaklei pennak siangpahrang)fanu a si. Judah siangpahrang JORAM Nupi a si: a pasal JORAM he, a fapa AHAZIAH he; DAVID chiah piakmi lam tha zul lo-in AHAB le JEZEBEL zulhmi lam thalo ah a pial tertu hna Nupi/Nu sual/thalo a si.

ATHALIAH nih cun DAVID Siangpahrang thutdanh in ihruainak/uknak cu a fapa (AHAZIAH) a thih bak in a cuh hna! Siangpahrang tuan kho ding: a tu le tete (AHAZIAH fapa nghakchia tete hna) kha a thahter dih hna i;Judah Ram siangpahrang Nu (Queen) ah ahung cang. Kum 6 hrawng a pen/uk hna.Kha thawng chia kha, JEHOSHEBA( Siangpahrang AHAZIAH far Nu) le a va pa: JEHOIADA ( Tlangbawi minthang) nih an rak theih ziar caah, Siangpahrang fapa hniang JOASH (an Pu te) kha a thli te in (ATHALIAH theihlo kar ah)an lak i, Pathian Biak inn ah Kum 6 chung an rak thuh/cawm tiah Bible ah kan hmuh ( Atang lei References hna khi zoh te).

Queen ATHALIAH nih a thi diam tiah a ruahmi,David hrinsor/tefa (Ngakchia pa te): JOASH cu Kum 7 a hung ti ai.
Tlangbawi minthang: JOHOIADA le Judah mipi hna bomhnak thawng-in Queen ATHALIAH cu an tleih, an thah i; Kum 7 lawng a simi JOASH cu David hrinsor/tefa hna Siangpahrang thutdanh ahcun siangpahrang caah anhun thutter! Praise the Lord. Who is the youngest king in the Bible? Indeed, JOASH.

Kan bia a sau sual lai; Judah mi hna politics(Nainganzi) ram ah, Tlangbawi JEHOIADA hi thukpi in a rak itel tinak a si. Biakam Hlun lio i, Tlangbawi hna cu Nihin Pathian riantuantu/Pastor te hna he-hin tahchun khawh an si.
Cucaah, Nihin Biaknak hruaitu/Pastor te zawnghi Ram le Miphun nih a herhtuk lio caan ahcun, ramkhel riantuannak ah an itel kho ko kan ti khawhnak a si. Amah belte, Pathian rian an tuanmi a dawn lai lo. Mah pumpak miaknak, hakkauhnak zawng aitel lai lo; Ram le Miphun dawtnak ruangah a si hnga. Prophet Samuel, Nathan, Isaiah le Hoshea te hna zawng kha, an mah chan lio cio-ah, Ramkhel riantuantu Siangpahrang hna ruahnak tha petu, thazaang petu an rak si.

Tlangbawi JEHOIADA nih hin JOASH hi kum 6 khengte Siangpahrang ah thukho te dingin a rak cawm, a rak cawnpiak. Siangpahrang a tuan hnu zawngah (Kum 7 te lawng a si rih caah), kum tampi a rak dirkamh, lam a rak hruai caah, Judah mi hna Ramkhel ihruainak a rawk cuahmah mi kha ai/an remhthan khawhnak a si.Cu ti cun, Politics ( Nainganzi) ah Biaknak lei HRUAITU /PASTOR te hna hi, Ram le Mipi nih an herhtuk lio caan ahcun, an rian ( Pathian rian) dawn/tul lo in, an itel phung a si ko, an itel kho ko timi hi fiang te in kan theihcang theu lai! Blessings
JSD, Rangoon
References:
1. BIBLE: 2Kings 11,12 and 2 Chronicles 22-24 chapters.
2. DICTIONARIES: Today Dictionary of the Bible ( Bethany House Publishers), The New Bible Dictionary ( IVF), The Lion Handbook to the Bible ( LION), Bible Knowledge Dictionary ( SP), Brown’s Dictionary of Bible( Dr. John Brown of Haddington).ZAHNAKTLANG
By:Jeremiah Sang Dun

Be First to Comment

Leave a Reply

Your email address will not be published. Required fields are marked *