Press "Enter" to skip to content

Putin cu that tim tu nih aa citmi mawtaw cu a hmailei ke puah hnawh

Russia President Putin cu thah timh a si ko nain hlawh a tlin lo caah nungdam tein a luat than tiah, Euro Weekly News nih september 15 ah a tial tiah theih a si. Putin citmi mawtaw cu a hmailei ke puah hnawh a si nain a himnak hmun tiang mawtaw an khalh than khawh caah hlawh tling a si lo tiah, Euro Weekly News cun a tar.

Putin thah timhnak kongah mi tampi zong tlaih an tong nain Putin thahtimhmi ni le caan le hmun tucu langhter chih a si lo. Russia nih Ukraine a tuk hnu in Putin thah timhnak thawngpang hi a rak len pah ngai, Putin nih cun voi 5 tiang thah an ka timh cang nain nungdam tein ka luat peng tiah, 2017 lio ah mizapi hlan ah a rak chim bal.

AA le SAC ralkap kar kahdohnak pehtlaiin a umnak le eidin a cahnak Chin ramkulh Paletwa ah SAC ralkap nih man fawi tein eidin thilri zuar an timh tiah Paletwa khuami nih an chim. Arti hi a leng ah pumkhat 1000ks in kan cawk tawn nain, SAC ralkap nih pum khat ah 100ks in kan zuar lai tiah an chim.

Cu thil zuarnak cu nihin September 16 in kan thawk lai tiah an chim nain tilawng a phak rih lo caah nihin cu an tuah kholo tiah theih a si.
SAC ralkap nih a tu bantuk in thil man fawi tein zuar an timhnak cu SAC ralkap nih mipi zohkhenhtu kan si tiah chim in langhter an duh caah a si tiah tualchung mi hna nih cun an chim.

Tu bantuk in man fawi tein thil zuarnak cu sipin nih ṭuanvo lak in an tuah lai i, chungkhar cazin ning in chungkhar pakhat ah minung pakhat nih cawk a ngah lai tiah an chim. Paletwa lawngah siloin Chin ramkulh chung khuapi kip ah tuah an i zuam i a cheukhat hmunhma ahcun an tuah dih cang tiah theih a si.

Sagaing ramṭhen, Sagaing peng khuate ah September 1-17 tiang ah tualchung mi 7 nak tlawm lo thah an tong. A thimi hna chungah khuabawi zong an i tel, tiah mi bawmchantu phu sinin theih a si.

“Nizan September 16 ni zinglei sml 2:00 hrawng ah Sagaing peng Sinmay(ဆင်မြေ) khuami Nan Aung Thu(50) le Phyo Min Thu(35) hna cu an inn ah hriamtlai phu khat nih an thah hna,” tiah mi bawmchantu pakhat nih a chim.

September 14 zan sml 11:00 hrawng ah Sagaing peng Aungsipin(အောင်စည်ပင်) khua i, inn zaa uktu Win Khine cu a inn ah a um lioah hngalh lomi hriamtlai phukhat nih an thah, tiah theih a si.

September 12 zanlei sml 4:00 hrawng ah Sagaing khua Nilar sang No.3 Sagaing-Shwe Bo pengkomh kalnak lam ah kum 20 tluk nu pakhat le kum 30 tluk nu pakhat cu an hmai hup buin thah an tong. An ruak pawng ah kum 2 tluk ngakchia pakhat zong an hmuh, tiah theih a si.

September 8 zanlei sml 1:00 hrawng ah Sagaing peng Htantaw(ထန်းတော) khuami Zaw Ye Aung cu a inn ah hngalh lomi hriamtlai phu nih nam in an sawh i a thi. September 1 zinglei sml 6:00 ah Sagaing khua Seti(စည်တီး) sang ummi Kyaw Naing zong minung 2 nih an rak kah thah. the Chin Post

Be First to Comment

Leave a Reply

Your email address will not be published. Required fields are marked *