Press "Enter" to skip to content

R.I.P : Motor Chung I Ralhrang Pawl An Thahnak Ah A Nunnak A Liam Ve

Kangyidaungh, Kanyinng khua pawng ah SAC ralhrang motor pakhat chung ah PSTF phu nih Bomb an cheh hnawh i, SAC ralhrang 3 an thi pinah 2 nih hliamhma an tuar ti si. PSTF phu chungtel pakhat zong SAC ralhrang lei nih an kah i a hliamhma he an tlaih hnuah a nunnak a liam ve tiah Khit Thit Media nih a tarlangh.

Thil sining cu, Ayeyawaddy ramthen, Kangyidaungh myone, Kanyinngu khua Bus stand pawng ah SAC ralhrang motor pakhat cu nizan October 24 ni zan suimilam 6 hrang ah Pathein Special Task Force- PSTF timi Pathein District Myo Piah Pyauk Kyar ralkap phu nih bomb an cheh hnawh caah SAC ralhrang 3 an thi i, 2 nih hliamghma an tuar ti si.

Cu SAC ralhrang pawl an thahnak ah PSTF lei in mipi ralkap pakhat a nunnak a liam ve. Cu dohnak ah SAC ralhrang lei in meithal in an kah i hliamhma he an tlaihmi PSTF chungtel pakhat a nunnak a liam ve tiah theih a si.

“Bomb a puah i SAC ralhrang motor cu a cungkhut a choih dih. Ahnubik thawng kan theih ning ahcun 3 an thi i, 2 hliamhma an tuar ti si. Cun anmah SAC ralhrang lei nih an kah ve i motorcycle cung i mipa pakhat an khenh i an tlaih. An tlaih hnu ah an velh i a thi ve” tiah mithmutu khuami pakhat nih Yangon Khit Thit Media ah a chim.

Cu kahdohnak chungah a nunnak a liammi PSTF ralkap chungtel Maung Kyaw cu Pathien Special Task Force phu nih tantakmi chungkhar an ngaihchiatnak an hrawmhpinak kong, Ko Maung Kyaw he a nunnak a liammi an ralkap pawl dihlak, dai tein i din chun u law, dohthlennak kan tei tiang hnu kir loin kan dohlai tiah PSTF phu nih cathanh an chuah.

Bomb a puah hnu ah a thimi hna le hliamhma tuarmi SAC ralhrang hna cu mizaw phurhnak motor in an kalpi i cu khua hrawnghrang cu SAC ralhrang nih lam hna an phit dih i kherhhlainak an tuah tiah theih a si. Tu bantukin security a tuanmi SAC ralhrang motor chungah bomb cheh an puah hnawhmi hi Ayeyawaddy ramthen chungah a voikhatnak a si ti zong in theih a si. Ref; KTM

Be First to Comment

Leave a Reply

Your email address will not be published.