Chuncung le Dokthek kar ah minute 10 chung kahdohnak chuak, ralhraang 13 an thi. 2022 May 3 zaanlei suimilaam 4:30 tluk, Chuncung le Dokthek kar ah CDF Hakha ralkap le SAC ralhraang kar ah minute pahra chung kahdohnak a chuak i ralhraang minung 13 nak tlawm lo an thi tiah theih a si. “Kan kah hna hi ruah a sur ca ah hmunkhat an um lio ah a si. 40MM le Sniper deuh kan hman. A bu in an umnak hmun ah kan bomb zong a tla.
Minung 13 nak tlawm lo cu an thi lai,” tiah CDF Hakha ralkap lei sin in kan theih. CDF Hakha nih an kah mi hna hi Hakha in May 2 ah Kalay lei panh in a kal mi ralhraang minung 100 leeng le raltuknak motor (Armoured vehicle) pahnih le motor 20 leeng kha an kah mi hna a si. Hakha in an chuah ni May 2 zong ah CDF Hakha nih Hakha le Chuncung kar ah an kah hna i ralhrang minung pathum an rak thi. Nihin kahdohnak ah CDF ralkap lei in hliam a tuar mi le a thi mi an um lo tiah theih a si.The Hakha Post
April 30, 2022 ah SAC Cozah tang i Ministry of Home Affairs nih Myanmar ram pumpi ah pengkomh 46 an chap tiah theih a si. Myanmar ram pumpi ah pengkomh 75 a um i atu i an chap mi pengkomh 45 he cun pengkomh 120 a si cang lai. SAC nih cun 2008 phunghrampi ning in ramkhel, uknak, chawkhelrian le zatlangnun a ṭhancho khawh chinchin nak ding ah pengkomh tam deuh kan chapnak a si, tiah an thanh.
Chin ramkulh zong ah pengkomh pahnih chap a si ve. Chin ramkulh pengkomh pali a um i cu hna cu Hakha Pengkomh, Falam Pengkomh, Matupi Pengkomh le Mindat Mindat Pengkomh hna an si. SAC nih an chap mi pengkomh thar pahnih cu Tidim Pengkomh le Paletwa Pengkomh an si. SAC nih cun ramkhel, chawkhel, uknak le zatlangnun a ṭhancho khawh nak ding ah pengkomh kan chap mi a si, tiah an thanh nain ramkhel thiamsang cheukhat nih cun 2023 ah thimnak an tuah ding mi ruahchan in pengkomh hi an chap mi a si, tiah an chim ve.
SAC party a si mi USDP le ramkhel party cheukhat nih thimnak ah hman an duh mi Proportional Representation (PR) thimning ah cun pengkomh a tam deuh poh ah party hme deuh mi hna caah ruahchannak a tam. Kum 2023 thimnak ah SAC, USDP le anmah lei ṭanhtu party hme hna nih teinak an hmuh khawh nak ding ah PR thimning hman an i timhmi le pengkomh tam deuh an chapmi a si, tiah ramkhel thiamsang cheukhat nih an chim.
CNDP General Secretary hlun a si mi Salai Ceu Bik Thawng nih cun, “Chin miphun chung ah lungrualnak rawk sehlaw pengkomh a pek mi hna nih ka cung ah i lawm hna seh ti a duh caah a si,” tiah a chim ve. Tutan khuapau dohthlennak zoh tik zong ah SAC nih pengkomh thar an pek mi Paletwah le Tidim hi peng dang tluk in an cawlcang lo tiah hmuh khawh a si. CDM tuah loin SAC tangah rian a ṭuan mi le sianginn a kaimi an tam biknak peng zong an si fawn, tiah theih a si. The Chin Post
Be First to Comment