Press "Enter" to skip to content

Ralhrang A Dohtu Zeibantuk Bu He Paoh Kan I Bawm Lai Tiah KIO/KIA Chairman Nih A Chim

Ralhrang khongton uknak a dohtu zeibantuk bu he paoh kutsih in kan i bawm lai i ralhrang hna cu kan doh lai tiah KIO/KIA chairman N’Ban La nih Oct 25, tuni ah tuahmi KIO kum 61 tlinnak lawmhnak puai ah a chim.

KIO Chairman nih cun Kawl miphun pi lungput ဗမာလူမျိုးကြီးဝါဒ) le khongton uknak hi atu i kan hrawh khawh lo ahcun hmailei ah cun hrawh ding a har chinchin lai tiah a chim fawn. Cu lawng si loin tlangcungmi hna he pehtlai in a launcia mi ah KIO nih cozah he tonbiaruahnak ngei in an i zuamnak kong zong a chim chih.

KIO nih 1948 thok in Panglong hnatlaknak hna a tak in tuanchuah dingah Phah-sah-pah-lah (ဖဆပလ) cozah, Innhngak cozah le mah-sah-lah (မဆလအစိုး) cozah he voi tampi tonnak an ngei nain hlawhtlinnak a um kho lo.

Nah-wah-tah (နဝတ) le nah-ah-phah (နအဖ) cozah chan zongah KIO nih kahdaihnak tuah i ramkhel biaruahnak ngeih dingin an rak hal ko nain “Kannih ralkap cozah cu ramkhel biaruahnak tuahnak nawl kan ngei lo, mipi thimmi cozah an kai tikah i ruah te ko u” tiah an rak leh hna. Cuticun President Thein Sein chan ah “ram pumpi kahdaihnak” policy an thok nain ralhrangbu nih anmah hlawknak lei in an kapi caah biaruahnak kalpi a har.

NLD cozah chan ah Panglong hnatlaknak tuanchuah dingin 21 Panglong conference zong tuah a si nain NLD party hruaitu le ralhrang bawi hna biachim lawng kan ngai khim ko tiah KIO chairman N’Ban La nih cun a chim.

Kachin Independence Organization (KIO) cu Oct 25, 1960 ah an dirh i a hmaikum, Feb 5, 1961 ah Kachin Independence Army (KIA) cu minung 100 in an dirhmi a si. Ref: The 74 Media. Credit : The Chin Post

Be First to Comment

Leave a Reply

Your email address will not be published.